„ჩვენი ხელისუფლება მუდმივად ატყუებს აშშ-ს და ისინი ყველაფერს ძალიან კარგად ხედავენ. ეკონომიკის მინისტრმა ამერიკის ელჩს შეხვედრაზე უთხრა, რომ 34 პროცენტითაა გაზრდილი ამერიკული ინვესტიციები საქართველოში. თუმცა, ამ ამერიკულ კომპანიებში ჩამოთვლილია რატომღაც ქართული ტელეკომპანია POSTV და სხვა კომპანიები, რომელთა 90 პროცენტი შექმნილია ირანული კაპიტალით საქართველოში. არანაირი ინვესტიციები არ გაზრდილა ჩვენს ქვეყანაში და რაც დრო გადის მეტი სიცხადე შედის ამ ყველაფერში. ყველაფერმა კომბინაციაში გამოიწვია ის, რომ პრაქტიკულად სანქცირებაზე გადადის შტატების ხელისუფლება,“ - ამის შესახებ „კომერსანტს“ ამერიკული კომპანია „ფრონტერას“ გენერალურმა დირექტორმა ზაზა მამულაიშვილმა აშშ-ს კონგრესის საბიუჯეტო კანონპროექტის შეფასებისას განაცხადა, სადაც საუბარია საქართველოსთვის განკუთვნილი დახმარების 15 პროცენტის გაყინვის შესახებ.
ცოტა ხნის წინ ცნობილი გახდა, რომ აშშ-ის წარმომადგენელთა პალატამ ასიგნებების კომიტეტის მიერ წარდგენილი კანონპროექტი გამოაქვეყნა, რომელშიც ნათქვამია, რომ 2021 წელს დახმარების სახით განკუთვნილი 132 025 000 აშშ დოლარის 15 პროცენტის საქართველოსთვის გადაცემა შესაძლოა, შეჩერდეს იქამდე, ვიდრე საქართველოს მთავრობა შესაბამის ნაბიჯებს არ გადადგამს დემოკრატიული ინსტიტუტების გაძლიერების, კორუფციასთან ბრძოლის, კერძო სექტორში კანონის უზენაესობის, ქვეყანაში უცხოური ბიზნესის დაცვის კუთხით.
გამომდინარე იქიდან, რომ სტრატეგიული პარტნიორის მხრიდან კიდევ ერთხელ იქნა ხაზგასმული უცხოური ბიზნესის შევიწროების პრობლემა საქართველოში, „კომერსანტმა“ სიტუაციის შეფასებისთვის ამერიკული „ფრონტერას“ დირექტორს მიმართა, რომელსაც სახელმწიფოსთან დავა ჰქონდა საარბიტრაჟო სასამართლოში. ზაზა მამულაიშვილი აღნიშნავს, რომ ერთ-ერთი განმაპირობებელი ფაქტორი სტრატეგიული პარტნიორისგან მსგავსი სანქციების, სწორედ ამერიკული ინვესტიციების განდევნა და სასამართო სისტემის არამიზანმიმართულად გამოყენება გახდა.
„ბოლო 4-5 წლის განმავლობაში ვხედავთ, თითქოს ესკალაცია ხდება ამერიკის მხრიდან ამ დამოკიდებულების. სახეზე გვაქვს ქვეყანა, რომელსაც არ აქვს დემოკრატიული ღირებულება, გამეფებულია კორუფცია ხელისუფლებაში და მზარდი მტრული დამოკიდებულებაა ამერიკული ინვესტიციების მიმართ. 2018 წელსაც ახსენეს ეს მტრული დამოკიდებულება ამერიკელებმა უცხოელი ინვესტორების მიმართ საქართველოში, მაგრამ ხელისუფლებამ არაფერი არ იღონა. შესაბამისად, სტრატეგიული პარტნიორი უკვე ქმედით ნაბიჯებზე გადადის, რომ გავლენა მოახდინოს საქართველოს ანტიამერიკულ კურსზე. ოლიგარქიული მმართველობის ფორმა მიუღებელია ცივილიზებული სამყაროსთვის და ვხედავთ, რომ უკვე არასახარბიელო გარემო იქმნება ყველაფრისთვის. ამას თუ ემატება მიზანმიმართულად ამერიკული კომპანიების განდევნა ქვეყნიდან, ამერიკული არასამთავრობოების დისკრედიტაცია და მათი პოლიტიკოსების ლანძღვა, რომლებიც მხარს უჭერენ საქართველოს ეკონომიკურ წინსვლას - ეს ყველაფერი არის იმის მიზეზი, რაც აისახა ამერიკული საბიუჯეტო კანონპროექტის ტექსტში. უნდა შეწყდეს დევნა ამერიკული კომპანიების, აღარ უნდა იყოს სასამართლო გამოყენებული, როგორც იარაღი ბიზნესის და პოლიტიკური პატიმრების წინააღმდეგ. ეს თუ შეწყდა და შეიქმნა უკეთესი გარემო ბიზნესისა და არჩევნესითვის, გვექნება ის ღირებულებრივი თანხვედრა, რაც საქართველოს უნდა აკავშირებდეს შეერთებულ შტატებთან,“- აცხადებს „ფრონტერას“ დირექტორი.
კანონპროექტში ასევე აღნიშნულია, რომ დახმარების შეჩერება არ შეეხება იმ პროგრამებს, რომლებიც ხელს უწყობენ დემოკრატიას, კანონის უზენაესობის, სამოქალაქო საზოგადოების, მედიის განვითარებას ან მიმართულია გენდერული ნიშნით ძალადობის შემცირებაზე.
მარიამ მორგოშია