„დანერგე მომავალში“, რომელიც არის მრავალწლიანი კულტურების დაფინანსებისა და მხარდაჭერის პროგრამა, ჩნდება ახალი კომპონენტი, რომელიც ითვალისწინებს სტიქიური უბედურებების დროს დაზიანებული ნერგების სრულად ანაზღაურებას, - ამის შესახებ, მთავრობის სხდომის დასრულების შემდეგ გამართულ სხდომაზე სოფლის მეურნეობის მინისტრმა, ლევან დავითაშვილმა განაცხადა.

„ბოლო წლებში, ჩვენ თანმიმდევრულად ვავითარებთ აგროდაზღვევას, რომელიც სტიქიური შემთხვევებისგან ჩვენი ფერმერების დაცვის საშუალებას იძლევა,. აგროდაზღვევა არის ის სტაბილური მექანიზმი, რომელიც მოსავლის გადარჩენის საშუალებას მოგვცემს და კომპენსირებას გაუკეთებს დანაკარგებს. თუმცა, ჩვენ დავინახეთ, რომ გარკვეული მიმართულებები აგროდაზღვევის მხრიდან არ იფარება“, - განაცხადა ლევან დავითაშვილმა.

სოფლის მეურნეობის მინისტრის განმარტებით, ზოგიერთი სტიქიური მოვლენის შემდეგ მეურნეობები ფაქტობრივად სრულად ნადგურდებოდა და ამ ახალი კომპონენტით სახელმწიფო თითქმის 100%-ით აანაზღაურებს დანაკარგს.

„თუ ფერმერებს ექნებათ სურვილი რომ ახალი, სხვა კულტურის ბაღები გააშენონ, მათ ამის საშუალებაც ექნებათ. სახელმწიფო სრულად 100%-ით დააფინანსებს. ეს ეხება როგორც მრავალწლიან კულტურებს, ასევე ვენახს. გამონაკლისის არის რქაწითელი, რადგან მოგეხსენებათ უკვე წლებია სახელმწიფოს რქაწითელის სუბსიდირება უწევს, რადგან ბაზარზე არის ჭარბი წარმოება და ეს საკითხი უნდა დავაბალანსოთ და გამოვასწოროთ. “, - განაცხადა ლევან დავითაშვილმა.

მინისიტრის განცხადებით, სტიქიის შედეგად დაზიანებულ დაახლოებით 1000 ჰექტრამდე ტერიტორიაზე ახალი ბაღების გაშენებას სახელმწიფო დააფინანსებს. დავითაშვილის თქმით, იმისათვის, რომ ხელისუფლებამ ფერმერის კუთვნილ ნაკვეთზე ახალი ბაღი გააშენოს, ლევან სამხარაულის ექსპერტიზის დასკვნაა საჭირო, რომელიც დაადასტურებს, რომ „იქ არსებობდა ბაღი, მოხდა სტიქიური მოვლენა, დაზიანდა და ჩანაცვლებას ექვემდებარება“.

„ჩვენ ამ შემთხვევაში არ გვაქვს აღწერა, მაგრამ დაახლოებით ვიცით, შეფასება გვაქვს გაკეთებული რამდენ ათას ჰექტარს ფარავდა სტიქია. სტიქია ფარავდა დაახლოებით 4 000 ჰექტარს, თუმცა ეს არ იყო 100%-იანი დაზიანება. სხვადასხვა პროცენტით იყო დაზიანება მიყენებული და ჩვენ ვფიქრობთ, რომ შეიძლება 1000 ჰექტრამდე ახალი ბაღების გაშენება დაფინანსდეს სახელმწიფოს მხრიდან თუ იქნება ფერმერების მაღალი აქტივობა. პროცედურის მიხედვით მათ სჭირდებათ ლევან სამხარაულის ექსპერტიზის დასკვნა, ეს არის ერთადერთი მოთხოვნა, რომელიც დაადასტურებს, რომ იქ არსებობდა ბაღი, მოხდა სტიქიური მოვლენა, დაზიანდა და ჩანაცვლებას ექვემდებარება, მეტი სხვა მოთხოვნა არ არის“, - განაცხადა დავითაშვილმა.