„ქართული ბაზარი საკმაოდ პატარაა იმისათვის, რომ თქვენმა სტარტაპმა საკმარისი თანხა გამოიმუშაოს სწრაფი ზრდისა და შემდგომი განვითარებისთვის, სწორედ ამიტომ მნიშვნელოვანია აქტიურად იფიქროთ გლობალურ ბაზრებზე გასვლასა და დამატებითი შესაძლებლობების გამოყენებაზე.
მინდა ჩემი გამოცდილება გაგიზიაროთ ამ მიმართულებით და გითხრათ რომ საერთაშორისო აქსელერაციის პროგრამის გავლა თქვენგან ძალისხმევას, დროის დათმობას და მოტივაციას მოითხოვს, შედეგი კი თქვენი სტარტაპისთვის საკმაოდ საინტერესო, დიდი გამოცდილების და წარმატების მომტანი შეიძლება გახდეს.
F6S.com დღეისათვის მსოფლიოს ერთ-ერთი ყველაზე დიდი პლატფორმაა, რომელზეც თავმოყრილია ყველაფერი რაც დამფუძნებელს სჭირდება: ღონისძიებები, დაფინანსების შესაძლებლობები, აქსელერაციის პროგრამები, გრანტები და ა.შ. ეს არის ბაზა, რომელიც დაგეხმარებათ შეარჩიოთ თქვენზე მორგებული პროგრამა, დარეგისტრირდეთ, დისტანციურად გაიაროთ შერჩევის პროცესი და წარმატების შემთხვევაში მოხვდეთ რომელიმე ქვეყნის წარმატებულ აქსელერატორში.
გიზიარებთ 3 მნიშვნელოვან ნაბიჯს, რომელიც F6S-ის სწორად გამოყენებაში დაგეხმარებათ:
1. პირადი პროფილის რეგისტრაცია - შეგიძლიათ გაიაროთ თქვენი Facebook ან LinkedIn-ის ანგარიშით.
2.სტარტაპის რეგისტრაცია - ძალიან მნიშვნელოვანია დაამატოთ და დეტალურად შეავსოთ თქვენი სტარტაპის პროფილი, რომლითაც შემდგომში შეძლებთ სხვადასხვა ღონისძიებებზე, აქსელერაციის პროგრამებზე დარეგისტრირებას.
3.სწორი აქსელერატორის შერჩევა - დღეისათვის მსოფლიოში ძალიან ბევრი აქსელერატორი მოღვაწეობს და თითოეულის ამოცანა სტარტაპის ხელშეწყობაა სხვადასხვა პირობებით, როგორც წესი სხვადასხვა სტარტაპს სხვადასხვა მიმართულება აქვს, მაგალითად, ფინტექი, აგროტექი, ხელოვნური ინტელექტი (AI) და ა.შ. მნიშვნელოვანია თქვენს მიმართულებაზე მორგებული აქსელერატორი შეარჩიოთ, გაეცნოთ მათ პირობებს და მხოლოდ შემდგომ შეავსოთ მათი განაცხადის ფორმა.
საიტზე საკმაოდ მარტივია სასურველი აქსელერატორის მოძიება, ამისთვის დააჭირეთ ღილაკს “Apply”, ხოლო შემდგომ, შეარჩიეთ აქსელერაციის პროგრამები. პროგრამები შეგიძლიათ გაფილტროთ ლოკაციის, ბაზრის ტიპის, ინდუსტრიის, ინვესტიციის მოცულობის და წილის მიხედვით, რომელსაც აქსელერატორი იღებს, პროგრამაში მონაწილის დაფინანსების შემთხვევაში.
აქსელერატორის შერჩევის შემდეგ აკეთებთ განაცხადს მათ პროგრამაზე და გადიხართ შერჩევის ეტაპებს, რომლებიც თითოეულს ინდივიდუალური პრინციპით აქვს დაგეგმილი.
დანარჩენი უკვე იმაზეა დამოკიდებული, როგორ მიაწვდით ინფორმაციას აქსელერატორს, რამდენად კარგად გაქვთ ნაფიქრი თქვენი პროდუქტის კონცეფციაზე და გაქვთ თუ არა მინიმუმ დატესტილი პროტოტიპი მაინც, იმისათვის, რომ მარტივად დაადასტუროთ რომ სწორ მომხმარებელზე მორგებულ პროდუქტს ქმნით.
წარმატებებს გისურვებთ საერთაშორისო ასპარეზზე მიმავალ გზაზე!“ – თამთა გველესიანი, სპარკის მარკეტინგის ექსპერტი, რადიო „კომერსანტის“ გადაცემის - „სტარტაპი ქართულად“ წამყვანი