უკვე მეორე წელია, Startup Grind-ის თბილისის ოფისის ორგანიზებით, საქართველო მსოფლიოს ერთ-ერთ უდიდეს ტექნოლოგიურ კონფერენციას - Europe-Asia Connect-ს მასპინძლობს. ღონისძიება 10-12 დეკემბერს ვირტუალურად გაიმართება და 5,000-ზე მეტ მონაწილესა და 100-ზე მეტ სპიკერს გააერთიანებს. მართალია, ღონისძიების ორგანიზება საქართველოში ხდება, თუმცა, მასში ჩართულია Startup Grind-ის 90-მდე ოფისი, 50-მდე ქვეყნიდან. ეს ამ კონტინენტზე მდებარე ქვეყნების თითქმის 50%-ია.

სტარტაპ გრაინდი არის სტარტაპების, ანტრეპრენერებისა და ინვესტორების მსოფლიოში ყველაზე დიდი გაერთიანება. მისი მისიაა მსოფლიოს მასშტაბით სტარტაპებმა მიიღონ განათლება და ჰქონდეთ ის შესაძლებლობები, რაც მათ თავიანთი იდეების განხორციელებისთვის სჭირდებათ.

კომუნა ამერიკელმა დერეკ ანდერსენმა დააფუძნა და დღეს, მსოფლიოს მასშტაბით, 600 ოფისს და 3,5 მილიონ ანტრეპრენერს აერთიანებს. კომპანიის დაფუძნებაში დიდი წვლილი მიუძღვნის Google for Entrepreneurs, რადგან ის ღონისძიებების ტექნოლოგიური და ფინანსური მხარდამჭერია.

2012 წლიდან მოყოლებული, Startup Grind-მა 6,000-მდე ღონისძიებას უმასპინძლა. მართალია, მსოფლიოს მასშტაბით, გრაინდის სახელით წელიწადში ასობით ღონისძიება ტარდება, თუმცა, მათგან სამი უდიდესია: სილიკონ ველიზე, ლონდონში და თბილისში. საქართველოსთვის კი უდიდესი პასუხისმგებლობაა, რომ ევროპა-აზიის კონფერენციას სწორედ თბილისი უკვე მეორედ მასპინძლობს. ყველა კონფერენციას ერთი მიზანი აერთიანებს - ცოდნის გაზიარება, მნიშვნელოვანი კავშირების დამყარება, სტარტაპ საზოგადოების ფორმირება და ეკოსისტემის განვითარება.

Europe Asia Connect-ის პირველი საერთაშორისო კონფერენცია თბილისში 2019 წელს რუსთაველის თეატრში გაიმართა, რომელსაც 1,700-ზე მეტი მონაწილე და 40-ზე მეტი სპიკერი ესწრებოდა.

მართალია პანდემია დიდი გამოწვევა იყო ორგანიზატორებისთვის, რადგან ღონისძიებამ ფიზიკურიდან 100%-ით ონლაინ გადმოინაცვლა, მაგრამ სანაცვლოდ, ისინი უფრო დიდ მასშტაბებს გვპირდებიან. წელს Europe Asia Connect 100+ სპიკერს გააერთიანებს.

სპიკერები არიან როგორც ბიზნესის წამყვანი ფიგურები მსოფლიოში, ასევე ლოკალური გმირები, მაგალითად, ზაზა ფაჩულია, თამაზ გიორგაძე, ჯორჯ არისონი და ა.შ. მსოფლიოს ვარსკვლავებიდან ღონისძიების ერთ-ერთი სპიკერია მარკეტინგის გურუ - გაი კავასაკი. ის არის მრავალი ბესტსელერის ავტორი, მენტორი და ერთ-ერთი საუკეთესო გამომსვლელი ინოვაციების, ტექნოლოგიებისა და სტარტაპებისთვის განკუთვნილ არაერთ პლატფორმაზე. სპიკერებს შორის არის თანამედროვე მეწარმეობის დამფუძნებელი, სტივ ბლანკიც.

ბილეთების შეძენა შესაძლებელია სტარტაპ გრაინდის ოფიციალურ ვებგვერდზე: www.startupgrind.ge

(R)