Starbucks-ის უახლეს კაფეს ერთი მნიშვნელოვანი ელემენტი აკლია – ელემენტი, რომელსაც მომხმარებელთა უმეტესობა მიჩვეულია. ეს მოლარეები არიან.

ყავის გლობალურმა ქსელმა Amazon Go-სთან პარტნიორობით ხუთშაბათს თავისი პირველი კაფე გახსნა, სადაც მომხმარებლებს მაგიდასთან დასხდომა და ლატესთან ერთად სენდვიჩის მირთმევა შეუძლიათ, თუმცა უცნაურია, რომ კაფეში მოლარეები არ დაგხვდებიან.

აშშ–ის შრომის ბაზრის კრიზისის გამო, Starbucks-ი და სხვა კომპანიები ადამიანური კაპიტალის გამოყენების შემცირებას ცდილობენ, ამისათვის ისინი ხელოვნურ ინტელექტს, რობოტიკასა და ციფრულ სენსორულ ეკრანებს იყენებენ.

White Castle-ი რობოტი მზარეულის გამოცდის პროცესშია, Domino’s Pizza ექსპერიმენტებს ატარებს თვითმართვადი მანქანების მიწოდებისთვის. IBM კი შეკვეთების ავტომატიზებულ მიღებას McDonald’s–ის დრაივისთვის ავითარებს.

აშშ-ის რესტორნების პერსონალის დონე ჯერ კიდევ მინიმუმ 10%-ით დაბალია, ვიდრე პანდემიამდე, რაც ხელს უწყობს მარჟის გაზრდას, თქვა Rabobank-ის ანალიტიკოსმა ტომ ბეილიმ. ციფრული ავტომატიზაციის ზოგიერთ ინსტრუმენტს უკვე ნახავთ სხვადასხვა რესტორანში, რაც თანამშრომელთა დეფიციტის შევსების ერთ–ერთი გზაა.

Starbucks–მა თავისი განვითარების სტრატეგია მაღაზიის ახალ ფორმატებზე გადაიტანა.

Starbucks-ი და Amazon-ი 2022 წელს კიდევ ორი ახალი კაფეს გახსნას გეგმავენ, განაცხადა Starbucks-ის გლობალური ზრდისა და განვითარების უფროსმა ვიცე-პრეზიდენტმა კეტრინ იანგმა.

ნიუ-იორკში, ახალ ლოკაციაზე Starbucks-ის ბარისტები სასმელებს და დანარჩენ მენიუს ჩვეულებრივ დაამზადებენ, კაფეს პერსონალის იგივე რაოდენობა ეყოლება, როგორც სხვა Starbucks-ს, აღნიშნა იანგმა.

მომხმარებელს შესაძლებლობა ექნება, Starbucks-ის აპლიკაციის მეშვეობით გააკეთოს შეკვეთა და ყავა კართან ახლოს, დახლიდან აიღოს. ან გამოიყენოს საკრედიტო ბარათი, Amazon–ის აპი ან Amazon One ანაბეჭდის წამკითხველი დანარჩენ სივრცეში შესასვლელად, თაროებიდან საჭმლის ასაღებად ან მაგიდასთან დასაჯდომად.

წყარო: forbes.ge