ყავახანების ამერიკული ქსელი Starbucks მანჰეტენის ცენტრში, Amazon-თან ერთად, პიკაპ-კაფეს ხსნის, სადაც საცალო ვაჭრობის გიგანტის უნაღდო ტექნოლოგიას გამოიყენებს. CNBC-ის ცნობით, კომპანია ამას დროში შეზღუდული მომხმარებლების მისაზიდად აკეთებს, რომლებსაც ყავის ან საკვების სწრაფად შეძენა სურთ.

„Amazon-თან პარტნიორობა Starbucks-ის გეგმის უახლესი ნაბიჯია, რათა თავისი ადგილმდებარეობები მომხმარებელთა ახალ ჩვევებს მოარგოს,“ - იუწყება CNBC.

პირველი Starbucks Pickup ნიუ-იორკში, პარკ ავენიუსა და ლექსინგტონ ავენიუს შორის, Amazon Go-ის მაღაზაიში იხსნება. გარე დროშებზე ორივე კომპანიის ლოგო ფრიალებს. სიეტლში დაფუძნებული კომპანიები, მომდევნო წლის განმავლობაში, მინიმუმ, ორი ლოკაციის ერთობლივად გახსნას გეგმავენ. მეორე კაფე, ასევე, მანჰეტენის შუაგულში, New York Times Building-ში გაიხსნება.

მომხმარებლები Starbucks-ის მობილური აპლიკაციის გამოყენებით, ყავას წინასწარ უკვეთავენ. შემდეგ ახალი მაღაზიის დახლიდან სასმელს Amazon-ის „Just Walk Out“ ტექნოლოგიაზე ხელის გულის დადებით ყიდულობენ, თუ ისინი Amazon One-ში არიან დარეგისტრირებული. წინააღმდეგ შემთხვევაში, მათ შეუძლიათ, მაღაზიაში არსებული Amazon-ის აპლიკაციის კოდი ან საკრედიტო ბარათი გამოიყენონ. შესასვლელთან ახლოს მდებარე კიოსკი მომხმარებელს საშუალებას აძლევს, Amazon One-ზე საკრედიტო ბარათის ჩასმით და ხელის გულის სკანირებით დარეგისტრირდეს.

Starbucks-ის თანამშრომლები კიოსკთან ახლოს დგანან, რათა მომხმარებლებს შესვლის დროს დაეხმარონ. თუმცა ზოგიერთი მომხმარებელი ტექნოლოგიას უკვე იცნობს, რადგან Amazon Go-ს რამდენიმე მაღაზია მანჰეტენზე უკვე მუშაობს.

„Just Walk Out“ ტექნოლოგია ნიშნავს იმას, რომ მომხმარებელს მოლარესთან გადასახდელად მისვლა აღარ უწევს. მის ნაცვლად სასწორები, კამერები და თაროების სენსორები მომხმარებლების შენაძენს აფასებენ, აჯამებენ და თანხას მაღაზიიდან გასვლის დროს ანგარიშიდან აჭრიან.

„თქვენ არ გჭირდებათ ლოდინი, რომ რიგში დადგეთ და გადაიხადოთ,” - აცხადებს Amazon-ის საცალო ვაჭრობისა და ტექნოლოგიების ვიცე პრეზიდენტი, დილიპ კუმარი.

ახალ მაღაზიაში არის დასაჯდომი ადგილები შეხვედრების დიდი ჯიხურებით, ასევე, ინდივიდუალური სასადილო ჯიხურებით იმ მომხმარებლებისთვის, რომლებიც შესაძლოა, დისტანციურად მუშაობენ ან სწავლობენ. მათ შეუძლიათ, ყავა Starbucks-ის აპლიკაციის საშუალებით ან დახლთან ბარისტს შეუკვეთონ.

bpn.ge