ჭიათურა, ჭიათურა ორი კაციც და გავიდა...

ქუთაისი აქეთ, ქუთაისი...

თუ ერთხელ მაინც გაგივლიათ დიდუბის ავტოსადგურის მიმდებარე ტერიტორიაზე ეს სიტუაცია თქვენთვის უცხო არ იქნება -  ქაოსი, რომელიც თბილისის ავტოსადგურებში წლებია მოუგვარებელია. „კომერსანტი“ დაინტერესდა ამ ქაოსში დაცულია თუ არა მგზავრთა უსაფრთხოების ელემენტარული პირობები და არის თუ არა გამართული საქალაქთაშორისო სატრანსპორტო საშუალებები.

„საქართველოს ტრანსპორტისა და გზების ასოციაციის“ ხელმძღვანელი დავით მესხიშვილი აცხადებს, რომ რეგიონებში საზოგადოებრივი ტრანსპორტით გადაადგილება საფრთხის შემცველია. მისი თქმით, საქალაქთაშორისო ტრანსპორტის მდგომარეობა სავალალოა, საკითხით კი სახელმწიფო უწყებები არ ინტერესდებიან.

„საქალაქთაშორისო ტრანსპორტი კორონავირუსის გავრცელებამდეც და მას შემდეგაც კანონგარეშეა, პრაქტიკულად კანონის მოქმედებიდანაა გასული. სტრუქტურულად საკითხი ეკონომიკის სამინისტროს ეხება, მაგრამ კონკრეტული უწყების პოვნა ვინ არის პასუხისმგებელი საგზაო უსაფრთხოების პოლიტიკაზე, კონკრეტულად საქალაქთაშორისო სამგზავრო ტრანსპორტზე გაგიჭირდებათ. ერთი რაც ვიცით, არის სადგურები, რომელთაც აქვთ ვალდებულება, რომ სადგურიდან გასული ტრანსპორტი იყოს უსაფრთხო, თუმცა ამის მონიტორინგს ვინ ახორციელებს სრულიად გაუგებარია.

სანამ კორონავირუსთან დაკავშირებული აკრძალვები ამოქმედდებოდა, ჩვენ გვქონდა შემთხვევები, როდესაც მგზავრების რაოდენობა იყო გადატვირთული, პერიოდული ტექნიკური ინსპექტირება მკაცრად არ მოეთხოვებოდათ, ამ სატრანსპორტო საშუალებებს გავლილი აქვთ თუ არა ტექდათვალიერება ყოველთვის კითხვის ნიშნის ქვეშ არის. იგივე შეგვიძლია ვთქვათ შატილის ტრაგედიაზე, სამგზავრო ტრანსპორტზე გვაქვს საუბარი, რომელიც პერიოდულ ინსპექტირებაზე არ გამოცხადდა. მიკროავტობუსი ტექდათვალიერებაზე, რომ მისულიყო დიდი ალბათობით ტრაგედიას თავიდან ავირიდებდით. ეს ერთი მაგალითია, ხოლო ყველა სხვა დანარჩენ შემთხვევაში ეს მიმართულება არის მიშვებული და მასზე ზედამხედველობა არ არსებობს“, - განაცხადა დავით მესხიშვილმა.

საქართველოს ტრანსპორტისა და გზების ასოციაციის ხელმძღვანელი ამბობს, რომ დღემდე, ყველა პასუხისმგებელმა უწყებამ: სადგურებმა, შსს-მ, ეკონომიკის სამინისტრომ იცის, რომ საქართველოში მგზავრების 90 პროცენტის გადაყვანა სატვირთო მიკროავტობუსებით ხორციელდება, თუმცა პრობლემის მოუგვარებლად ქმედით ნაბიჯს არც ერთი სახელმწიფო უწყება არ დგამს.

„21 - ე საუკუნეში მგზავრების გადაყვანა სატვირთო ტრანსპორტით ხდება და არა სამგზავრო ტრანსპორტით. ისე როგორც გადაიტანდით ნებისმიერ პროდუქტს მაგალითად, კარტოფილს ან სამშენებლო მასალას. მგზავრები აი ამ გადაკეთებული სატრანსპორტო საშუალებებით გადაჰყავთ. გადაკეთება არ არის აკრძალული, მაგრამ პერიოდულ ტექნიკურ ინსპექტირებაზე ბევრი არ მიდის ან ისე აწესრიგებს ავტომობილს, რომ ინსპექტირება გაიაროს. დათვალიერების შემდეგ კი სკამს კუსტარულად ამატებს. მიკროავტობუსების აბსოლუტურ უმრავლესობაში ავარიული გასასვლელი ჩაკეტილია ან გაუქმებულია. ეს ყველასთვის ცნობილია. ადამიანები გადარჩებიან თუ ეს საკითხები მოწესრიგებული იქნება, თუმცა რეაგირება არავის აქვს“, - განმარტავს დავით მესხიშვილი.

დავით მესხიშვილი აცხადებს, რომ დღეს სტანდარტი არ არსებობს. მისი თქმით, უნდა განისაზღვროს სტრუქტურა, რომელიც საქალაქთაშორისო გადაყვანაზე იქნება პასუხისმგებელი და კანონის აღსრულებას დაიწყებს.

„რომელიმე სახელმწიფო სტრუქტურამ პასუხისმგებლობა უნდა აიღოს მათ ზედამხედველობაზე, პრევენციული ღონიძიებების გატარებაზე, კონტროლზე და მონიტორინგზე, ისე როგორც ეს არის განვითარებულ ევროპულ ქვეყნებში. მარტო ჯარიმებით პრობლემები არ მოგვარდება. მათ ხომ უნდა ჰქონდეთ თანამედროვე სტანდარტი რომელის მიხედვითაც სატრანსპორტო საშუალება იქნება წესრიგში და გადაადგილება იქნება უსაფრთხო. ჩვენ გვაქს პერიოდული ინსპექტირება, მაგრამ აღსრულება სუსტია. უნდა დავიწყოთ ევროდირექტივების დანერგვა, უნდა არსებობდეს ტაქოგრაფების სისტემა, რომელიც გააკეთებს ჩანაწერს, რა სიჩქარით მოძრაობდა სატრანსპორტო საშუალება“, - აცხადებს დავით მესხიშვილი.

დავით მესხიშვილი ამბობს, რომ არსებობს უკანონო, თვითორგანიზებული სადგომები, საიდანაც ე.წ. „ხიშნიკი“ მძღოლები გადიან, რომელებიც მგზავრებს გზადაგზა იყვანენ. მისი თქმით ამით საგზაო უსაფრთხოების სტანდარტი მნიშვნელოვნად უარესდება. „ხიშნიკი“ მძღოლები, რომ დიდ პრობლემას წარმოადგენს ადასტურებს დიდუბის ავტოსადგურის ხელმძღვანელი ნესტორ მიქატაძე. „კომერსანტის“ კითხვაზე ხდება თუ არა მგზავრების სტანდარტების დაცვით, უსაფრთხოდ გადაყვანა მიქატაძე გვპასუხობს, რომ ქვეყანაში საკანონმდებლო ხარვეზებია და რეგულაციების დაცვა არ ხდება.

„სად არის ეს რეგულაციები? სად არის ევროდირექტივები? ამას ვითხოვ რაც თანამდებობაზე მოვედი. სავალდებულო ნორმები, რომ დავიცვათ, „ხიშნიკები“, რომ არ მოძრაობდნენ და კანონიერი გადასახადის გადამხდელები არსებობდეს. ამ ყველაფერს 5 წელია ვითხოვ და ვერაფერს მივაღწიე. ყველა ინსტანციას ვთხოვ რეგულაციების დაწესებას და საკითხის მოგვარებას. ნახევარი დიდუბის ტერიტორია, რომ უკანონო მგზავრების გადაყვანით არის დაკავებული ეს უნდა შეიცვალოს. ყველა სახის კომუნიკაცია მაქვს როგორც წერილობითი ასევე ზეპირი მაგრამ პრობლემა დღემდე მოუგვარებელია“, - განუცხადა „კომერსანტს“ დიდუბის ავტოსადგურის ხელმძღვანელმა.

ნესტორ მიქატაძე ამბობს, რომ დიდუბის ავტოსადგურში არც ერთი სატრანსპორტო საშუალებაა არაა ისეთი, რომელსაც ტექდათვალიერება არ აქვს გავლილი:

„ტექდათვალიერების გარეშე სატრანსპორტო საშუალებას მარშუტზე არ ვაყენებთ, ხელშეკრულებას არ ვუფორმებთ. უსაფრთხოებაზე პასუხს ვერ ვაგებ, მაგრამ საბუთი, რომ ტექდათვალიერება გავლილი აქვთ, ვინც ხაზზე გადის ყველას აქვს. მძღოლები დამატებით სკამებით აღარ სარგებლობენ, ჰქონდათ ვიღაცებს და ამოვაღებინეთ. გუშინ თუ ჩადო საღამოს არ ვიცი, მაგრამ ასეთ სატრანსპორტო საშუალებას ხაზზე არ ვუშვებთ. ამას პერიოდულად ვამოწმებთ“, - განმარტავს ნესტორ მიქატაძე.

საქართველოში საქალაქთაშორისო ტრანსპორტის პოლიტიკას ეკონომიკის სამინისტოში შემავალი სახმელეთო ტრანსპორტის სააგენტო განსაზღვრავს. უწყება ვალდებულია მგზავრთა გადაყვანის და ასევე ტვირთების გადატანის უსაფრთხოებაზე იზრუნოს. იმის გასარკვევად, კონკრეტულად რა ღონისძიებებს ახორციელებს სააგენტო ეკონომიკის სამინისტოს დავუკავშირდით, თუმცა კითხვებზე პასუხი ამ დრომდე არ მიგვიღია.

ბაჩო ადამია