„დაფიქსირდა ქართული კომპანიების ფინანსური შესაძლებლობების ზრდა და ამის პარალელურად, წინა წელთან შედარებით, სავალო ვალდებულებების მკვეთრი კლება - 10.8-ჯერ,“ - ამის შესახებ ეკონომისტმა სოსო არჩვაძემ საქსტატის მიერ გამოქვეყნებული 2022 წლის პირდაპირი უცხოური ინვესტიციების მაჩვენებლების შეფასებისას განაცხადა.

მისივე განმარტებით, ქვეყანაში მოქმედმა კომპანიებმა ბიზნეს-აქტიურობის გაფართოების სტრატეგიაში არსებითი კორექცია მოახდინეს - სესხების აღებიდან მათ მასშტაბურ გასტუმრებაზე გადავიდნენ

„2021 წელთან შედარებით სააქციო კაპიტალის ზრდა 3.3-ჯერ (210.3 მლნ. აშშ დოლარიდან - 686.3 3 მლნ. აშშ დოლარამდე), აგრეთვე რეინვესტირების მოცულობის მატება 67.5 პროცენტით (769.9 მლნ. აშშ დოლარიდან 1289.4 მლნ. აშშ დოლარამდე) - ეს მიანიშნებს როგორც საქართველოში მოქმედი კომპანიების საკუთარ ფეხზე უფრო მყარად დგომის შესაძლებლობას, ისე უცხოელი ინვესტორების მზაობას, უფრო გაახანგრძლივონ საკუთარი საინვესტიციო საქმიანობა საქართველოში.

პირდაპირ უცხოურ ინვესტიციებში დასავლური - ევროკავშირის, ბრიტანული და აშშ წარმომავლობის კაპიტალის სიჭარბეა. - მათზე მოდის უცხოური ინვესტიციების თითქმის ¾.

აღნიშნული გარემოება უკავშირდება, როგორც საქართველოში არსებულ პოზიტიურ ბიზნეს-გარემოს და, ბიზნესის წარმოებისათვის ხელსაყრელ პირობებს, ისე საქართველოს ხელისუფლების პოლიტიკას უცხოური საინვესტიციო პროექტების საქართველოში რეალიზაციის ხელშეწყობის, კვალიფიციური ხარჯების ანაზღაურებისა და მთლიანობაში, მაღალი დამატებული ღირებულების მქონე სექტორებში კაპიტალის მოსაზიდად. საქართველოში მსხვილმასშტაბიანი პროექტების რეალიზაცია (ანაკლიის პორტის მშენებლობა, შავ ზღვაზე გამავალი მაღალი ძაბვის დენის კაბელის გაყვანა და სხვ.) უახლოეს მომავალში უზრუნველყოფს საინვესტიციო აქტიურობის მხრივ საქართველოს კიდევ უფრო ფართო და მსხვილმასშტაბიან საინვესტიციო პოლიგონად გადაქცევას“, - აცხადებს არჩვაძე.

ეკონომისტი ფიქრობს, რომ ინვესტიციების ზრდა საკმაოდ მგრძნობიარე და ობიექტური ინდიკატორია უცხოური კაპიტალის, საქმიანი წრეებისა და ბიზნესმენების მხრიდან საქართველოში არსებულ სამეწარმეო და საინვესტიციო გარემოზე და პოზიტიურ მოლოდინებზე უახლოესი წლების მანძილზე.

წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2022 წელს 2 მილიარდი აშშ დოლარი შეადგინა, რაც 2021 წლის დაზუსტებულ მონაცემებს 61.1 პროცენტით აღემატება. ზრდა განპირობებულია პირდაპირი უცხოური ინვესტიციების ორი კომპონენტის - სააქციო კაპიტალისა და რეინვესტიციის მაჩვენებლის გაზრდით.