საინტერესოდ ვითარდება მეზობელი სომხეთის სატელეკომუნიკაციო ბაზრის გადანაწილების მორიგი რაუნდი და მასში წარსულში თავისი საქმიანობით საქართველოსთან დაკავშირებული პირებიც მონაწილეობენ.
როგორც „ბანკები და ფინანსებს“ სომხეთიდან ინფორმირებულმა წყარომ აცნობა, ადგილობრივი უმსხვილესი ინტერნეტ პროვიდერის, კომპანია Ucom -ის თანამფლობელთა შორის სკანდალური უთანხმოებაა.
კერძოდ, კომპანიის თანამშრომელთა დიდი ნაწილი პროტესტის ნიშნად მას შემდეგ ტოვებს კომპანიას, რაც მათთვის ცნობილი გახდა, რომ საკონტროლო პაკეტის მფლობელებმა გენერალური დირექტორის თანამდებობაზე „ბილაინ სომხეთის“ ხელმძღვანელი ანდრეი პოტიახინი დანიშნეს, ისე, რომ ამის თაობაზე მოქმედი გენერალური დირექტორი აიკ ესაიანი საქმის კურსშიც არ იყო.
ეს ის ანდრეი პოტიახინია, რომელიც 2009-2011 წლებში „ბილაინ საქართველოს” ხელმძღვანელობდა და კომპანიის დატოვება საკმოდ მძიმე ბრალდებების ფონზე მოუხდა. მაშინ საქმე სისხლის სამართლის პასუხისმგებლობამდე არ მისულა, მაგრამ სატელეკომუნიკაციო ბიზნესით დაინტერესებულ წრეები პოტიახინის მოსკოვში „დაწინაურებას“ ბილაინის ქართულ ოფისში „გამსკდარ“ მასშტაბურ და სისტემურ უკანონო საქმიანობას უკავშირებდნენ.
სომხური Ucom -ის მიმდინარე სკანდალს წინ უძღოდა Ucom -ის მიერ „ბილაინ სომხეთის“ აქციათა სრული პაკეტის შესყიდვა, თუმცა აღმოჩნდა, რომ „ბილაინ სომხეთის“ ხელმძღვანელობა ახლა უკვე უკვე გაერთიანებული კომპანიის მართვის გაგრძელებასაც აპირებს.
Ucom -ის გენერალურმა დირექტორმა აიკ ესაიანმა, რომელიც ძმასთან ერთად კომპანიის 6%-ს ფლობს, სხვა აქციონერებს შესთავაზა, რომ კომპანიის სრულად გამოისყიდდა, მაგრამ ეს შეთანხმება არ შედგა. საბოლოო ჯამში, მაჟორიტარმა აქციონერმა ახალი გენერალური დირექტორი ა. ხაჩატრიანი დანიშნა და ცდილობს იმ 800 ვაკანსიის შევებას, რაც მასობრივი დათხოვნის ფონზე წარმოიშვა.
Ucom -ის ძირითადი აქციონერები პატიმრობაში მყოფი სომხეთის სახელმწიფო შემოსავლების კომიტეტის ყოფილი მმართველის გაგიკ ხაჩატრიანის შვილები და ახლო ნათესავები არიან. გურგენ, არტემ და არა ხაჩატრიანები ახლა ძებნაში არიან და ბრალად გამოძალვა, ასობით მილიონი დოლარის მითვისება და სხვა მძიმე დანაშაულებები ედებათ. მათგან ერთ-ერთის, კერძოდ გურგენ ხაჩატრიანის დაპატიმრების შუამდგომლობა სულ ახლახანს, 30 აპრილს გამოიცა და ის ძმებიდან ერთადერთია, ვინც სომხეთში იმყოფება. სხვებმა უკვე მოასწრეს ქვეყნის დატოვება.
სომხეთში, პრაქტიკულად, ძნელია ადამიანის პოვნა, რომელიც რაიმე კომერციული საქმიანობით არის დაკავებული და არ შეჩეხვია ხაჩატრიანების გვარის წარმომადგენელთა მხრიდან კანონსაწინააღმდეგო ქმედებას.
ეს მიმართულება, როგორც ჩანს, გრძელდება, რადგან ხაჩატრიანების დანაშაულებრივი კლანი, პანდემიის გამო ქვეყანაში გამოცხადებული საგანგებო მდგომარეობის მიუხედავად, ცდილობდა სწორედ ამ პერიოდში განსაკუთრებულად მნიშვნელოვანი ინტერნეტპროვაიდერის სათავეში ანდრეი პოტიახინის მიყვანას.
Ucom -ის განთავისუფლებულ თანამშრომელთა შორისაა მთელი ტექნიკური პერსონალი. ცხადია, მათ გარეშე კომპანია პარალიზებულია. ახალი ხელმძღვანელობა ტექნიკური პერსონალის მოზიდვას უკვე სხვა ქვეყნებიდან ცდილობს, რადგან ხაჩატრიანების დანაშაულებრივ კლანთან თანამშრომლობას, რომელსაც სომხეთის საზოგადოება კარგად იცნობს, უკვე ყველა ერიდება. როგორც ჩანს, ტექნიკური პერსონალის მობილიზების კრიტიკული საჭიროების გამოა, რომ სწორედ პოტიახინის მეშვეობით უკვე დაწყებულია ქართველი ტექნიკოსების სომხურ კომპანიაში მუშაობით დაინტერესება.
თუ ხაჩატრიანების კლანს Ucom -ის გაკონტროლების ოპერაცია გამოუვა, ამ შემთხვევაში, პოტიახინის ქართული ბეგრაუნდიდან გამომდინარე, სომხეთის საზოგადოება უნდა ელოდოს, რომ სომხეთის უმსხვილეს ინტერნეტპროვაიდერსაც რთული პერიოდი ელის.
გაზეთი „ბანკები და ფინანსები“