სომხეთისა და აზერბაიჯანის საზღვარზე ვითარება უკიდურესად დაიძაბა. მხარეები სამხედრო შეტაკებების და მსხვერპლის შესახებ იუწყებიან.
აზერბაიჯანული მედიის ცნობით სომხეთის მხრიდან დღეს დილით ფართომასშტაბიანი შეტევა განხორციელდა. შედეგად არის მსხვერპლი. მათ შორის მშვიდობიანი მოქალაქეების მხრიდან.
როგორც აზერბაიჯანის თავდაცვის სამინისტროში ამბობენ აზერბაიჯანელმა სამხედროებმა საპასუხო ცეცხლი გახსნეს. გამოყენებულია მძიმე ტექნიკა და არტილერია.
სომხეთში კი აცხადებენ, რომ აზერბაიჯანის მხრიდან დაწყებულია შეტევა მთიანი ყარაბაღის მიმართულებით. განცხადება სომხეთის პრემიერ-მინისტრმა ნიკოლ ფაშინიანმა გააკეთა.
სომხეთის თავდაცვის სამინისტრო კი იტყობინება, რომ სომეხმა სამხედროებმა ორი აზერბაიჯანული ვერტმფრენი და უპილოტო საფრენი აპარატი ჩამოაგდეს. მათივე ცნობით, სროლის ხმა ისმის სტეპანაკერტშიც.
მთიან ყარაბაღში მოქალაქეებს ურჩევენ, სახლიდან არ გავიდნენ და ბუნკერებში ჩავიდნენ.
ეუთო-ს მინსკის ჯგუფის თანათავმჯდომარეები მთიანი ყარაბაღის კონფლიქტის ზონის შეხების ხაზზე ფართომასშტაბიანი სამხედრო მოქმედებების შესახებ გავრცელებულ ცნობების გამო შეშფოთებას გამოთქვამენ. ამის შესახებ ნათქვამია ეუთოს ვებგვერდზე გავრცელებულ განცხადებაში.
„ჩვენ მკაცრად ვგმობთ ძალის გამოყენებას და მწუხარებას გამოვთქვამთ მშვიდობიანი მოქალაქეების დაღუპვის გამო. თანათავმჯდომარეები მოუწოდებენ მხარეებს, დაუყოვნებლივ შეწყვიტონ ძალადობა და განაახლონ მოლაპარაკებები, რათა კონფლიქტის გადაჭრის მდგრადი გამოსავალი იყოს მოძიებული“, – აცხადებენ ეუთო-ში.