11 იანვარს მოსკოვში ვლადიმერ პუტინის, ილჰამ ალიევის და ნიკოლ პაშინიანის შეხვედრის დროს გადაწყდა, რომ მხარეები მთიანი ყარაბახის აღდგენის და განვითარების საკითხებთან დაკავშირებით სპეციალურ სამუშაო ჯგუფს შექმნიან.
უახლოეს დროში, სამი ქვეყნის პრემიერ-მინისტრი რეგიონის ეკონომიკის და სატრანსპორტო ინფრასტრუქტურის განვითარების გეგმებს წარადგენენ. ჯგუფის პირველი სხდომა 30 იანვრამდე ჩატარდება.
პუტინმა განაცხადა, რომ მხარეების სამშვიდობო შეთანხმების შესრულებას ახერხებენ, ნოემბერში ხელმოწერილი ცეცხლის შეწყვეტის შემდეგ სერიოზული ინციდენტები თითქმის არ ფიქსირდება.
რუსეთის პრეზიდენტის თქმით, ყარაბახში უკვე 48 000 ლტოლვილი დაბრუნდა.
„ამ ეტაპზე ენერგეტიკის, საცხოვრებელი სახლების და ინფრასტრუქტურის აქტიური აღდგენა მიმდინარეობს“ - განაცხადა პუტინმა.
3 სახელმწიფოს მეთაურის შეთანხმების მიხედვით, სამუშაო ჯგუფის პირველი შეხვედრა 30 იანვრამდე ჩატარდება, ხოლო 1 მარტს ჯგუფმა მხარეებს რეგიონის აღდგენის კონკრეტული ზომები და მათი რეალიზების განრიგი უნდა შესთავაზოს.
ამ ეტაპზე პრიორიტეტი სარკინიგზო და საავტომობილო მიმოსვლას ენიჭება. მოსკოვი, ბაქო და ერევანი ამ საკითხებში სამუშაო ქვეჯგუფებს შექმნიან სადაც მთავრობების, პროფილური უწყებების და ორგანიზაციების წარმომადგენლები შევლენ.
აზერბაიჯანის პრეზიდენტის ილჰამ ალიევის თქმით, მთიანი ყარაბახის ტერიტორიაზე სარკინიგზო ინფრასტრუქტურის შექმნა იგეგმება, რომელიც სამხრეთ კავკასიის მთელ სატრანსპორტო კონფიგურაციას შეცვლის.
ახალი რკინიგზა სომხეთს რუსეთთან აზერბაიჯანის გავლით დააკავშირებს.
„ჩვენთვის ასევე ძალიან მნიშვნელოვანია, რომ ამ გზის მეშვეობით ბაქო პირველად 30 წლის შემდეგ სატრანსპორტო კავშირს ნახიჭევანის ავტონომიურ ოლქთან დაამყარებს. გარდა ამისა, ამ მარშრუტის წყალობით აზერბაიჯანი თურქეთთან დამაკავშირებელ ახალ მაგისტრალს მიიღებს, ხოლო სომხეთი - პირდაპირ კავშირს რუსეთთან. გარდა ამისა, შეთანხმების რეალიზება სომხეთ-თურქეთის საზღვრის გახსნას გულისხმობს, შესაბამისად, სომხეთს ახალ ბაზრებზე წვდომა ექნება“ - განაცხადა ალიევმა.
მისი აზრით, სატრანსპორტო კავშირი რეგიონის 5 ქვეყანას შორის ეკონომიკური კავშირების გაფართოვების და გაძლიერების დიდ პერსპექტივებს ქმნის.
„ჩვენი განცხადების მიზანია რეგიონში სრულიად ახალი რეალობის შექმნა - სატრანსპორტო კომუნიკაციების გახსნა“ - მიიჩნევს აზერბაიჯანს პრეზიდენტი.
მოლაპარაკებების შედეგებით უკმაყოფილო მხოლოდ სომხეთის პრემიერ-მინისტრი ნიკოლ პაშინიანი დარჩა. მისი თქმით, ყარაბახის კონფლიქტი დაურეგულირებელი დარჩა და მხარეები მნიშვნელოვან საკითხებზე ვერ შეთანხმდნენ - მაგალითად, სამხედრო ტყვეთა გაცვლაზე.
„ერევანი ეუთოს მინსკის ჯგუფის ფორმატში ყარაბახის სტატუსის განხილვის გასაგრძელებლად მზადაა. ჩვენ ცეცხლის შეწყვეტას მივაღწიეთ, თუმცა, ჯერ კიდევ ბევრი საკამათო საკითხი დარჩა“ - განაცხადა მან.
თუმცა, სომხეთის ლიდერი თავის კოლეგებს იმ მოსაზრებას დაეთანხმა, რომ ახალი შეთანხმებები რეგიონის უსაფრთხოებას გააძლიერებენ და მის ეკონომიკურ იერსახეს მკვეთრად შეცვლიან.
წყარო: lenta.ru