სქროლავთ თქვენს ფოტოებს გასული შაბათ-კვირის ივენთიდან და გეცინებათ იმის გააზრებაზე, თუ როგორ ჰგავს ისინი The Hangover-ის კადრებს? ბრაზობთ თქვენს ამჟამინდელ ხელმძღვანელზე ან თანამშრომლებზე და გსურთ, რომ ამის შესახებ სოციალურ ქსელში დაწეროთ? კარგად დაფიქრდით…

სოციალურმა ქსელებმა, როგორიცაა Facebook, TikTok და Instagram, ორგანიზაციებს კანდიდატის შესწავლისა და მათი დაქირავების შესახებ გადაწყვეტილების მიღების ახალი ინსტრუმენტი მისცეს. 

დასაქმების ვებგვერდის – CareerBuilder-ის კვლევის თანახმად:

• დამსაქმებელთა 70% იყენებს სოციალურ მედიას კანდიდატის შესამოწმებლად დაქირავებამდე 
• დამსაქმებელთა 54%-მა უარი თქვა განმცხადებლის დასაქმებაზე მის სოციალურ ქსელში ნანახი კონტენტის გამო
• დამსაქმებელთა თითქმის ნახევარი (48%) ამოწმებს ამჟამინდელ თანამშრომლების გვერდებს სოციალურ მედიაში
• დამსაქმებელთა მესამედმა (34%) უსაყვედურა თანამშრომელს ან გაათავისუფლა ის მის მიერ გამოქვეყნებული კონტენტის შინაარსის საფუძველზე.

CareerBuilder-ის მკვლევრებმა ასევე გამოიკვლიეს სამუშაოს მაძიებელი 266 ამერიკელის Facebook გვერდი.

„მათ მიერ გამოქვეყნებული ზოგიერთი ინფორმაცია მოიცავდა სფეროებს (განათლება, სამუშაო გამოცდილება და სხვა აქტივობები), რომლებსაც ორგანიზაციები რეგულარულად და ლეგიტიმურად აფასებენ დაქირავების პროცესში. მაგრამ პროფილების მნიშვნელოვანი წილი შეიცავდა დეტალებს, რომელთა გათვალისწინებაც შეიძლება, იურიდიულად აეკრძალოთ კომპანიებს, მათ შორის სქესი, რასა და ეთნიკური წარმომავლობა (გამოხატულია პროფილების 100%-ში), შეზღუდული შესაძლებლობები (7%), ორსულობა (3%), სექსუალური ორიენტაცია (59%), პოლიტიკური შეხედულებები (21%) და რელიგიური კუთვნილება (41%)“, ‒ ვკითხულობთ კვლევის შედეგებში.  

როგორც კვლევიდან ირკვევა, სამუშაოს მაძიებელთა მრავალი პროფილი ასევე მოიცავდა ინფორმაციას, რომელიც პოტენციურ დამსაქმებლებს აწუხებდა: 

• 51% შეიცავდა უხამსობას
• 11% მიუთითებდა აზარტულ თამაშებზე
• 26% აჩვენებდა ან მიუთითებდა ალკოჰოლის მოხმარებაზე
• 7% მიუთითებდა ნარკოტიკების მოხმარებაზე

„თქვენ ხედავთ, რატომ უყვარს ბევრ დამსაქმებელს სოციალური მედია – ეს საშუალებას აძლევს მათ, აღმოაჩინონ ყველა ინფორმაცია, რის შესახებაც კითხვის დასმის უფლება ინტერვიუს დროს არ აქვთ“, ‒ ამბობს ჩად ვან იდეკინჯი, აიოვას უნივერსიტეტის პროფესორი და კვლევის ერთ-ერთი ავტორი. 

სოციალური ქსელები გვთავაზობენ უფასო, ადვილად მისაწვდომ პორტრეტს აპლიკანტზე, რაც გარკვეულ წარმოდგენას იძლევა იმის შესახებ, მიაღწევს თუ არა ის წარმატებას სამსახურში. თუმცა, როგორც ირკვევა, მსგავსი წარმოდგენების წინასწარ შექმნა, არც ისე გამართლებულია: 

„შედეგებმა აჩვენა, რომ სოციალური მედიის შეფასებები არ აუმჯობესებს პროგნოზს იმის შესახებ, თუ როგორ შეასრულებს განმცხადებელი მომავალ სამუშაოს“, ‒ ვკითხულობთ ამერიკის ფსიქოლოგთა ასოციაციის მიერ გავრცელებულ სტატიაში. 

ბაზარზე არსებული ვითარებიდან გამომდინარე, ევროკავშირის მარეგულირებლები მენეჯერებს უკვე უკრძალავენ კანდიდატის სოციალურ ქსელებზე თვალის დევნებას, თუ არ იქნება აღნიშნული პირის პირდაპირი თანხმობა. 

„არ ვამბობთ, რომ სოციალურ ქსელებში მოცემული ინფორმაცია დამსაქმებლისთვის უსარგებლოა“, ‒ აღნიშნავს აიოვას უნივერსიტეტის პროფესორი და მკვლევარი, – „მაგრამ ჩვენ ჯერ არ გვაქვს ინსტრუმენტები, რომლითაც ვიპოვით სიგნალს მთელ ამ ხმაურში.“

წყარო: businessfeed.ge