სოციალურად დაუცველი მოქალაქეების დასაქმების პროგრამას საქართველოს მთავრობა ოფიციალურად ერთ კვირაში წარადგენს. იქიდან გამომდინარე, რომ საჯარო სექტორში დასაქმების რესურსი რეალურად არ არის, სპეციალისტები ფიქრობენ, რომ სოციალური სტატუსის მქონე ადამიანების დასაქმების სფერო იქნება კერძო სექტორი, განსაკუთრებით კი სოფლის მეურნეობა, მშენებლობა და ვაჭრობა, სადაც ამ მხრივ მეტი პოტენციალია.

ექსპერტი ეკონომიკურ და სოციალურ საკითხებში პაატა აროშიძე ,,კომერსანტთან“ საუბრისას არ გამორიცხავს, რომ ამ მოქალაქეების გარკვეული ნაწილი უკვე იყოს დასაქმებულიც, რის გამოვლენაც აქამდე ჭირდა.

,,პროგრამის ამოქმედების შემდეგ სოციალურად დაუცველი მოქალაქეები მეტს იზრუნებენ დასაქმებაზე, თუკი ეცოდინებათ, რომ მათ სტატუსზე გავლენას არ იქონიებს. ამიერიდან მათ არ ექნებათ განცდა, რომ დასაქმებით შემწეობის თანხას დაკარგავენ. ნაწილი შეიძლება არის კიდეც დასაქმებული, მაგრამ არ ჩანს. ამასთან, როცა სოციალურად დაუცველი ადამიანების დასაქმების პერსპექტივაზეა საუბარი, გასათვალისწინებელია, სად არის მოთხოვნა დამატებით სამუშაო ძალაზე, სავარაუდოდ, ეს შეიძლება იყოს სოფლის მეურნეობა, მშენებლობა, ვაჭრობა, ასევე ტურიზმიც, სადაც წელს სავარაუდოდ დასაქმების მეტი პერსპექტივა გაჩნდება. ერთ-ერთი პრობლემა კვალიფიკაციაა, მაგრამ ესეც მოგვარებადია სახელმწიფოს მაღალი ჩართულობით, მათ შორის ფინანსური და ადმინისტრაციული რესურსის გამოყენებით. კონკრეტული პროგრამები ამაზე უნდა აიგოს“, - ამბობს აროშიძე ,,კომერსანტთან“.

ამდენად, ექსპერტი ფიქრობს, რომ შრომის ბაზარზე დიდი ცვლილებების დროა, რაც დაიწყო საკანონმდებლო ხარვეზის გამოსწორებით და ხელს შეუწყობს კონკურენტუნარიანი შრომის ბაზრის ჩამოყალიბებას საქართველოში. ეს კი, მისივე შეფასებით,  ერთადერთი გზაა, მოქალაქეები ხელმწიფოს შემწეობაზე არ იყვნენ დამოკიდებული და დასაქმების მეტი მოტივაცია ჰქონდეთ.

შეგახსენებთ, რომ პრემიერ-მინისტრმა ირაკლი ღარიბაშვილმა რამდენიმე დღის წინ გააკეთა განცხადება სოციალურად დაუცველი შრომისუნარიანი მოქალაქეების დასაქმებასთან დაკავშირებით.

ღარიბაშვილის ინფორმაციით, ქვეყანაში დღეს დაახლოებით 600 000 სოციალურად დაუცველი მოქალაქეა. მათგან თითქმის ნახევარი შრომისუნარიანია, რომლებიც არსებული სოციალური პოლიტიკის გამო, სამუშაო ადგილების მოსაძებნად არ არიან მოტივირებულები.

მარი ჩიტაია