საქართველოს ბანკის Impact Hub Tbilisi-სთან ერთად უკვე მეოთხე წელია ატარებს Social Impact Award-ს. ის ყველაზე მასშტაბური სტუდენტური პროგრამაა სოციალური მეწარმეობის მიმართულებით, რომელიც 20 ქვეყანაში პარალელურად მიმდინარეობს. პროგრამა ორიენტირებულია სტუდენტების განათლებაზე და ბიზნესის მხარდაჭერაზე სოციალური მეწარმეობის დარგში.
სოციალური მეწარმეობა და ბიზნესის ხელშეწყობა ერთ-ერთ პრიორიტეტულ მიმართულებას წარმოადგენს პროგრამაში ჩართული მხარეებისთვის. აღსანიშნავია, რომ ახალგაზრდული პროგრამისადმი ინტერესი წლიდან წლამდე იზრდება. ამის მიზეზი ისაა, რომ პროგრამის განხორციელების მიზანი იმ ახალგაზრდების და ინოვაციური იდეების მხარდაჭერაა, რომლებსაც აქვთ უნარი, რეალობა უკეთესობისკენ შეცვალონ. სოციალური მეწარმეობა არის ბიზნეს მოდელი, რომელიც ორიენტირებულია ადგილობრივი ეკონომიკური განვითარების ხელშეწყობაზე. სწორედ აღნიშნული ღირებულებების მატარებელია Social Impact Award-ი. ამ პროცესში ახალგაზრდებს უდიდესი როლის შესრულება შეუძლიათ, შესაბამისად მნიშვნელოვანია მათი აღჭურვა საჭირო უნარებითა და ცოდნით, რაც პროექტის ფარგლებში გარანტირებულია კიდეც.
იმაზე, რომ პროექტი წარმატებულია, მეტყველებს ის საბოლოო პროდუქტი, რასაც კონკურსში გამარჯვებული კომპანიები დებენ. ერთ-ერთი ასეთი, 2018 წლის გამარჯვებული სოციალური საწარმო „ჩუ“-ა. მისი დამფუძნებელი სალომე წიკვაძე პროგრამის მნიშვნელობაზე გვიყვება და აღნიშნავს, რომ საქართველოს ბანკის, გაეროს განვითარების პროგრამის (UNDP) და Impact Hub Tbilisi-ის მხარდაჭერით, განხორციელებული პროგრამა სტარტაპისთვის დიდი სტიმულის მიმცემია.
„Social Impact Award-ის პროექტის დამსახურებაა, რომ საქმიანობა დავიწყეთ, ჩვენი ბიზნეს იდეა განვახორციელეთ და იქ მიღებული გრანტის სახით საწყისი კაპიტალი მოვიპოვეთ. ის ძალიან მნიშვნელოვანი იყო იმ კუთხითაც, რომ სხვადასხვა საკითხებში კარგი გამოცდილება დავაგროვეთ, მაგალითად როგორიცაა ბიზნესის მართვა და მარკეტინგი. პროექტმა საშუალება მოგვცა გაგვეცნო უამრავი ადამიანი, რომლებთანაც დღეს უკვე თანამშრომლობის და ბიზნესსაქმიანობის გაგრძელების შესაძლებლობა გვაქვს.
„ჩუ“ არის სტარტაპი, რომელიც შესაძლებლობას გვაძლევს ვისწავლოთ ჟესტური ენა და გავიმარტივოთ კომუნიკაცია სმენის პრობლემების მქონე ადამიანებთან. სამაგიდო თამაში „ჩუ“, სხვაგვარად კი ჟესტური ენის პოპულარიზაციის მიზნით შექმნილი სოციალური საწარმო, სამაგიდო თამაშების მეშვეობით ცდილობს საზოგადოებაში თანაბარი შესაძლებლობების გაჩენას“, - აცხადებს სალომე წიკვაძე.
ინფორმაციისთვის, Social Impact Award-ი ახალგაზრდებს თავიანთი ბიზნეს იდეების განსახორციელებლად ათთვიან საგანმანათლებლო კურსს სთავაზობს. პროგრამის განმავლობაში ახალგაზრდები გადიან მთელ პროცესს იდეის გენერირებიდან, ბიზნეს გეგმის შედგენამდე. პროგრამა მეორე წელია ხორციელდება გაეროს განვითრების პროგრამის (UNDP), შვეიცარიის განვითარებისა და თანამშრომლობის სააგენტოსა (SDC) და ავსტრიის განვითარების თანამშრომლობის (ADC) მხარდაჭერით.
ახალგაზრდული პროგრამის, Social Impact Award 2020-ის ფინალისტები სულ ცოტა ხნის წინ გამოვლინდნენ. პროგრამის ფარგლებში 94 საკონკურსო განაცხადი შემოვიდა და დამოუკიდებელმა ჟიურიმ, მათ შორის, ექვსი საუკეთესო პროექტი შეარჩია. გაეროს განვითარების პროგრამის (UNDP) ინიციატივით, რეგიონების გაძლიერების მიზნით, ძირითადი ფინალისტების გარდა საქართველოს რეგიონებიდან დამატებით ოთხი ფინალისტი გუნდი გამოვლინდა.
(R)