სოფლისა და მშვიდი დასვენების მოყვარულებისთვის „სკიჯის სახლი“ უკვე ერთი თვეა რაც გაიხსნა.

იმის გასარკვევად, თუ რა გავლენა იქონია მსოფლიო ლოქდაუნმა მცირე ბიზნესზე, „კომერსანტი“ საოჯახო სასტუმრო „სკიჯის სახლის“ დამფუძნებელს დარეჯან ბერძენიშვილს დაუკავშირდა.

„შიდა ტურიზმი აქტიურია და ჯავშნებიც გვაქვს. დაინტერესება როგორც გასტრონომიულ ტურიზმზე, ასევე დასვენებაზეც მაღალია. პანდემიას სასტუმრო ბიზნესზე არსებითი გავლენა არ მოუხდენია და არც ფასის ცვლილებაზე იმოქმედა. განსხვავება ის არის, რომ უცხოელი სტუმრები ადგილობრივებმა ჩაანაცვლეს.“ - განმარტავს დარეჯან ბერძენიშვილი

„სკიჯის სახლის“ კიდევ ერთი წარმატებული პროექტი ჩირის წარმოებაა, რომელიც თავდაპირველად „აწარმოე საქართველოშის“ ხელშეწყობით განხორციელდა. ოჯახური ბიზნესის მფლობელი კი სამომავლოდ კიდევ ბევრ საინტერესო პროქტს გეგმავს.

„ჩირის წარმოებისა და სასტუმრო ბიზნესის განვითარებას ვგეგმავთ. ეზოში კიდევ რამდენიმე კოტეჯის დამატებას ვაპირებთ. ასევე, საჩვენებელი მეურნეობის გაკეთება გვსურს, რომელიც ჩირის როგორც ტურისტული პროდუქტის ჩამოყალიბებას გულისხმობს, - აცხადებს დარეჯან ბერძენიშვილი.

გურიაში, ჩოხატაურის მუნიციპალიტეტში მდებარე საოჯახო სასტუმრო „სკიჯის სახლი“ 2014 წლიდან ფუნქციონირებს. მისულ სტუმრებს კი სხვადასხვა ტიპის მომსახურებას სთავაზობს. მათ შორის არის კულინარიული, საოჯახო თუ მებაღეობასთან დაკავშირებული მასტერკლასები.

ანი ცარციძე