საქართველოს კომუნიკაციების ბაზრის ერთ-ერთი უმსხვილესი მოთამაშე „სილქნეტი“ ზარალზეა. კომპანიამ წლის პირველი ნახევარი თითქმის 40 მლნ-იანი ზარალით დაასრულა. კომპანიას შემოსავლები უმნიშვნელოდ აქვს გაზრდილი, წლიურ ჭრილში ზრდა მხოლოდ 870 ათასი ლარია.
აღსანიშნავია, რომ თიბისი კაპიტალის დახმარებით „სილქნეტმა“ საჯარო ემისიის სახით 2019 წელს 200 მლნ. დოლარის 5-წლიანი არაუზრუნველყოფილი ევროობლიგაციები განათავსა. ფასიანი ქაღალდების კუპონმა 11% შეადგინა და ობლიგაციები 100%-იანი ღირებულებით განთავსდა. ევროობლიგაციები ინვესტორებმა სხვადასხვა ქვეყნიდან შეიძინეს.
„კომერსანტი“ დაინტერესდა შეძლებს თუ არა ზარალზე გასული კომპანია მოემსახუროს ობლიგაციონერებს. თიბისი კაპიტალის მმართველი დირექტორი მერი ჩაჩანიძე „კომერსანტთან“ საუბრისას აცხადებს, რომ საოპერაციო მოგება კომპანიას დადებითი აქვს და სავსებით საკმარისია იმისთვის, რომ თავის ყველა ვალდებულებას მოემსახუროს.
„კომპანიას საოპერაციო ზარალი არ ჰქონია და ამ მხრივ ის მომგებიანია, შესაბამისად საკმარისი ფულადი სახსრების გენერირებას ახორციელებს იმისთვის, რომ მიმდინარე ვალდებულებებს რაც აქვს, ასევე კაპიტალურ დანახარჯებს სრულად მოემსახუროს. ფინანსური უწყისების მიხედვით, პანდემიის მიუხედავად „სილქნეტი“ ზრდას აგრძელებს და ზარალი რომელიც მას ჰქონდა კურსთაშორის სხვაობასთანაა დაკავშირებული. ევროობლიგაცია დოლარში ნომინირებულია და მოხდა კურსთაშორის ზარალის გადაფასება, ამან გამოიწვია ზარალი, რაც პოზიტიური ცვლილება არ არის, თუმცა ვალდებულებების მომსახურებას შეძლებს“, - განაცხადა მერი ჩაჩანიძემ.
„სილქნეტის”კორპორაციული კომუნიკაციების ხელმძღვანელი ლიკა მეტრეველი „კომერსანტთან” აცხადებს, რომ კომპანიის წმინდა ზარალი სრულად გამოწვეულია გრძელვადიანი სავალუტო ფინანსური ვალდებულებების საკურსო გადაფასებით, შესაბამისად ზარალი არარეალიზებულია.
„კომპანია ინარჩუნებს მყარ ლიკვიდობას და ფიქრობს, რომ არც ევრობონდის და არც რომელიმე სხვა სასესხო ვალდებულების მომსახურებას საფრთხე არ ემუქრება. უფრო დეტალურად რომ განვიხილოთ მიმდინარე წლის პირველი ნახევრის ანგარიში: 2020 წლის პირველი 6 თვის განმავლობაში, სილქნეტის საოპერაციო მოგებამ და EBITDA-მ, რომელიც სატელეკომუნიკაციო კომპანიების მომგებიანობის ერთ-ერთი ყველაზე გავრცელებული ინდიკატორია, შეადგინა შესაბამისად 37 მლნ ლარი და 102 მლნ ლარი. Covid19-ით გამოწვეული მაკროეკონომიკული წნეხისა და ქვეყანაში ტურიზმის დონის მკვეთრი ვარდნის მიუხედავად, კომპანიამ შეძლო საცალო შემოსავლების და ძირითადი საოპერაციო მაჩვენებლის შენარჩუნება და გარკვეულ შემთხვევებში, ზრდა წინა წლის იგივე პერიოდის მაჩვენებლებთან მიმართებაში, რაც არსებულ ვითარებაში, კომპანიის მდგრად ოპერირებაზე მიუთითებს. პირველი 6 თვის საცალო შემოსავლები გაზრდილია 3%-ით, EBITDA გაიზარდა 2%-ით, ხოლო საოპერაციო მოგება - 4%-ით”, -განმარტავს ლიკა მეტრეველი.
აღსანიშნავია, რომ 2019 წლის კონსოლიდირებული აუდიტორული ანგარიშის თანახმად, გასული წელს „სილქნეტის“ ჯამური შემოსავალი 387.2 მილიონი ლარს შეადგენდა, რაც 2018 წელთან შედარებით 12.44%-ით მეტი იყო. კომპანიის მმართველობითი ანგარიშის თანახმად, ზრდა ძირითადად შემდეგ ფაქტორებს უკავშირდება: 1. “სილქნეტმა” ჯეოსელი 2018 წლის პირველ კვარტალში შეიძინა, შესაბამისად შეძენამდე პერიოდის მაჩვენებლები 2018 წლის ანგარიშში სრულად არ შედის; 2. ფიქსირებული ინტერნეტის, Pay TV-ისა და მობილური ინტერნეტის შემოსავლების ზრდით.