მთავრობა ხორბლის მოსავლის ზრდას გვპირდება, სიღნაღში კი ნათესებს მავნებლები და სოკოვანი დაავადებები ანადგურებენ. როგორც აღმოჩნდა, პრობლემა უამინდობამ გამოიწვია. სიღნაღელი ფერმერი ბონდო ბორაშვილი ,,კომერსანტთან“ ამბობს, რომ მავნებლების გავრცელებამ შეიძლება მოსავალი დაახლოებით 50-60%-ით შეამციროს.

,,ხორბლის მოსავლიანობას ყველაზე მეტ საფრთხეს უამინდობა უქმნის. ბოლო პერიოდის განმავლობაში უმეტესწილად ნალექიანი ამინდია, ნათესებს გაუჩნდა სოკოვანი დაავადებები, მათ შორის, ჟანგა და სეფტორიოზი, რამაც მდგომარეობა გაართულა. ახლა ამინდი გამოსწორებისკენაა, თუმცა ნათესები დაავადებების გამო საფრთხეშია. დაავადებაც საკმაოდ მძიმეა, რასაც შეუძლია მოსავლის დაახლოებით 50-60%-ით შემცირება. საქმის კურსშია მთავრობაც. მოსახლეობაც ინფორმირებულია. დაიწყო კიდეც ნათესების დამუშავება, რაც არ უნდა მოინდომოს მთავრობამ, გარემო პირობების გავლენა საკმაოდ დიდია და რისკი მატულობს. სხვა მუნიციპალიტეტებში რა ხდება, არ ვიცი, თუმცა სიღნაღის მაგალითით რომ ვიმსჯელო, საქმე გართულდა, თუმცა იმედს ვერ გადავიწურავთ, ჯერ კიდევ შეიძლება შეიცვალოს მდგომარეობა, საბოლოოდ ისევ ამინდზე ვართ დამოკიდებული“, - აცხადებს ბორაშვილი.

შეგახსენებთ, რომ ხორბლის თვითუზრუნველყოფის მაჩვენებელი საქართველოში 15%-ის დონეზეა, რაც დიდი პრობლემაა ქვეყნისთვის.

არსებული გამოწვევების ფონზე საქართველოსთვის პრინციპულად მნიშვნელოვანი საკითხია თვითუზრუნველყოფის ზრდა. როგორც გარემოს დაცვისა და სოფლის მეურნეობის მინისტრმა აპრილში, პარლამენტში ანგარიშის წარდგენისას განაცხადა, მეცნიერებთან და სექტორის წარმომადგენლებთან ერთად მუშავდება პროგრამა, რომელიც ხელს შეუწყობს ხორბლის წარმოების ზრდას  დაახლოებით 30%-დან 50%-ის ფარგლებში.

ცნობისთვის,  დღეისათვის საქართველოს 100 ათასი ტონა ხორბალი მოჰყავს, ქვეყნის მოხმარება კი, 700-800 ათასი ტონაა.

მარი ჩიტაია