დავით ზეიკიძის წინააღმდეგ მისმა სიძემ, „ლიდერ ფუდის“ დამფუძნებელმა ირაკლი დუმბაძემ პროკურატურას მიმართა.
დუმბაძე საკუთარ სიმამრს ცრუ-დასმენაში ადანაშაულებს და ამბობს, რომ კომპანიის წილებთან დაკავშირებით უზეანეს სასამართლოში ჩანიშნულ პროცესამდე რამდენიმე დღით ადრე მის წინააღმდეგ დაგეგმილი ბინძური ცილისწამებები გააქტიურდა.
დუმბაძე სამართლებრივ დავას აწარმოებს მის მიერ დაფუძნებული კომპანიის წილების დაბრუნების მიზნით, მას შემდეგ რაც მოტყუებისა და იძულების მსხვერპლი გახდა საკუთარი სიმამრის, დავით ზეიკიძის მხრიდან.
„წელიწადზე მეტია მიმდინარეობს სასამართლო განხილვა და ამ ეტაპზე ირაკლი დუმბაძის მოთხოვნა დაკმაყოფილებულია ორი ინსტანციის მიერ და იმედი გვაქვს, რომ დავა საბოლოოდ მისი გამარჯვებით დასრულდება.
მას შემდეგ, რაც დავა ორ ინსტანციაში დუმბაძის სასარგებლოდ დასრულდა, რამდენიმე თვის განმავლობაში, საქმის განხილვა გასცდა სამართლებრივ სივრცეს. დავით ზეიკიძე და მისი ადვოკატი არჩილ კბილაშვილი ყველანაირი ხერხით ცდილობენ სასამართლოს ბოლო ინსტანცია მოაქციონ ზეგავლენის ქვეშ და ავრცელებენ ცრუ ინფორმაციას.
დავით ზეიკიძემ და მისმა ადვოკატმა წამოიწყეს ბინძური კამპანია მედიის საშუალებით და ისეთ გარემოებებზე დაიწყეს ყურადღების გამახვილება, რაზეც არ უსაუბრიათ სასამართლოში დავის განხილვისას, დაიწყეს შეურაცხმყოფელი განცხადებების გაკეთება, მეტიც არ მოერიდნენ დანაშაულის დაბრალებასაც, რამაც გვაიძულა დღეს მიგვემართა მთავარი პროკურატურისთვისაც ცრუ დასმენის გამო გამოძიების დაწყების მოთხოვნით.
განსაკუთრებით სამწუხაროა, რომ მთელი ამ ბინძური კამპანიის წარმოებაში დავით ზეიკიძეს ხელს უწყობს საქართველოს ყოფილი მთავარი პროკურორი, არჩილ კბილაშვილი, რომელმაც წესით კარგად უნდა იცოდეს, რომ ცრუ დასამენა დანაშაულია.
იმედი გვაქვს, რომ პროკურატურა დროულად გაატარებს აუცილებელ ღონისძიებებს და დადასტურდება ჩვენს მიერ წარდგენილ განცხადებაში მითითებული გარემოებები“,- აცხადებს ადვოკატი ავთანდილ თეთრაშვილი.
ადვოკატის თქმით, მოახლოებულია სასამართლო პროცესი უზენაეს სასამართლოში და მათი მოწინააღმდეგე მხარე მაქსიმალურად ცდილობს საზოგადოების შეცდომაში შეყვანას.
„ძალიან მოკლედ შეგახსენებთ, რამდენიმე მნიშვნელოვან დეტალს, რაც გამორიცხავს ყველა ცრუ ბრალდებას“
1. დავით ზეიკიძე ამბობს, რომ ის პატიოსანი ბიზნესმენია და რომ მოსარჩელეს ჩემთვის სარჩელი არ გამოუგზავნიაო, სარჩელის ნაცვლად სხვა დოკუმენტი გამომიგზავნა და შემდეგ ეს სარჩელის ჩაბარებად წარმოაჩინა სასამართლოშიო. ხან ამბობს, რომ სასამართლოსთან კორუფციულ გარიგებაში ვართ, ხანაც კი თითქოს შეცდომაში შევიყვანეთ სასამართლო თაღლითური სქემით. რეალურად, დავით ზეიკიძემ სასამართლოს დაუმალა ის უმნიშვნელოვანესი მტკიცებულება (კონვერტი), რომლითაც ჩაბარდა სარჩელი და მასალები და რაც იოლად დაადასტურებდა დავით ზეიკიძის სიცრუეს, რომ თითქოსდა სარჩელის ნაცვლად სხვა რამ მიიღო.
2. 2019 წლის მიწურულს, ამ ე.წ პატიოსანმა ბიზნესმენმა, რომელმაც ნაკისრი ვალდებულება არ შეასრულა, თავის ვაჟებს დააფუძნებინა ახალი კომპანია ფაქტიურად იმავე სახელწოდებით შპს „ლიდერ ფუდი“. აღნიშნულის მიზანი იყო სადავო „ლიდერი-ფუდიდან“ მთელი ქონების ახალ კომპანიაზე გადატანა და ირაკლი დუმბაძის გამარჯვების შემთხვევაში, მისთვის გაკოტრებული კომპანიის დატოვება. მანამდე კი, 2019 წლის მაისში, როდესაც ირაკლი დუმბაძის ოფიციალური მოთხოვნა მიიღო სახელშეკრულებო ვალდებულების შესრულების შესახებ, წავიდა საჯარო რეესტრში და თვალთმაქცურად შეეცადა სადავო ქონება სხვა პირებზე გადაეფორმებინა. საბედნიეროდ, ორივე თვალთმაქცური სქემა დროულად იქნა გამოვლენილი ჩვენს მიერ და აღკვეთილი სასამართლოს მეშვეობით.
3. ამ ე.წ პატიოსანი ბიზნესმენის განცხადებით არც ერთი პროცესი არ ჩატარებულა, ისე ჩამოართვა სასამართლომ 50% წილი და დაუბრუნა ირაკლი დუმბაძეს. მაშინ როდესაც მოცემულ საქმეზე 4 პროცესი ჩატარდა, რომელშიც დავით ზეიკიძე და მისი 4 ადვოკატი მონაწილეობდა და დეტალურად იქნა მოსმენილი ორივე მხარის არგუმენტები, განხილული იქნა ექსპერტიზის დასკვნები. ეს დასტურდება საქმეში არსებული სასამართლო სხდომის ოქმებით. ალბათ სასამართლო პრაქტიკაში არ მოიძებნება საქმე, როდესაც დაუსწრებელი გადაწყვეტილებების გაუქმების მოთხოვნა ასე სკურპულოზურად შეესწავლა სასამართლოს.
4. ახლა კი, როდასაც გამოცლილი აქვს ყველა სამართლებრივი არგუმენტი, ინტენსიურად ცდილობს მტკიცებულებებით მანიპულირებას, აჟღერებს ცრუ და შეურაცხმყოფელ ბრალდებებს, რომ როგორმე გადაფაროს მისი უპასუხისმგებლო დამოკიდებულება და ზეგავლენა მოახდინოს სასამართლოზე.