2020-21 წლებში ჩატარებული შვიდი აუქციონის მიუხედავად, საზოგადოებრივი მაუწყებლის შენობა მაინც ვერ გაიყიდა.
პირველი აუქციონი 122 432 000 ლარის საწყისი ღირებულებით, 2020 წლის 16 ივნისს მაქსიმალური, ერთთვიანი ვადით გამოცხადდა, თუმცა აუქციონი არ შედგა. საზოგადოებრივი მაუწყებლის მენეჯმენტმა განმეორებით აუქციონ 16 ივლისს გამოაცხადა. ამჯერად საზოგადოებრივი მაუწყებლის საკუთრებაში არსებული მიწის ნაკვეთის და მასზე არსებული შენობების ფასი 110 343 600 ლარამდე შემცირდა, თუმცა ინვესტორების დაინტერესება ობიექტმა ვერ შეძლო.
ფასდაკლებების სერია მესამე აუქციონზეც გაგრძელდა, თუმცა სამ აგვისტოს გამოცხადებული ტენდერიც წარუმატებელი აღმოჩნდა. საზოგადოებრივი მაუწყებლის მენეჯმენტმა ქონება ამჯერად 99 536 040 ლარად გამოიტანა.
მეოთხე აუქციონზე, რომელიც 2021 წლის 15 მარტს გამოცხადდა, საზოგადოებრივი მაუწყებლის შენობის ფასი კიდევ ერთხელ შემცირდა, თუმცა 3 მლნ ლარის ფასდაკლების მიუხედავად, 96 904 512 ლარის ღირებულების ობიექტს მყიდველი არ გამოუჩნდა.
დედაქალაქის ცენტრში, 33 209 კვ. მ.-ზე განთავსებული ქონება არც მეხუთედ გასხვისდა. 21 მაისს კიდევ უფრო შემცირებულ — 82 455 450 ლარად, საზოგადოებრივი მაუწყებლის შენობა ვერ გაიყიდა.
მომავალი ინვესტორისთვის უინტერესო აღმოჩნდა მიმდინარე წლის ივნისში, იდენტური ფასითა და პირობებით მეექვსედ გამოტანილი მაუწყებლის საკუთრებაში არსებული უძრავი ქონება.
პირველი არხის მენეჯმენტმა ფასი უცვლელი დატოვა ივლისშიც. ეს იყო მიმდინარე წელს გამოცხადებული ბოლო აუქციონი, თუმცა უძრავი ქონების მყიდველი არც ამჯერად გამოჩნდა.
ამასთან, აქტიურად მიმდინარეობს საზოგადოებრივი მაუწყებლის ახალი შენობის სამშენებლო სამუშაოები - აგებულია სტუდიების/პავილიონების კონსტრუქცია და ამოყვანილია ძირითადი შენობის ოთხივე სართული. დასკვნით ეტაპზეა რკინა-ბეტონის კონსტრუქციის აგება. პირველი არხი ახალ შენობაში სავარაუდოდ 2023 წლის ბოლოს შევა.
ბაჩო ადამია