შუახევი ჰესის მფლობელი კომპანია „აჭარისწყალი ჯორჯია“, “საქსტატის“ 2022 წლის II კვარტლის მონაცემებით, ქვეყნის უმსხვილესი ინვესტორების ათეულშია.

მიმდინარე წლის პირველ შვიდ თვეში (იანვარი - ივლისი) შუახევი ჰესმა 332 მლნ კვტ/სთ ელექტროენერგია გამოიმუშავა, რაც 75%-ით აჭარბებს გასული წლის ანალოგიურ მაჩვენებელს. ამასთანავე, კომპანიამ წელს პირველად განახორციელა ელექტროენერგიის ექსპორტი თურქეთში. მისმა მთლიანმა მოცულობამ (მაისის, ივნისისა და ივლისის თვეებში) 115 მლნ კვტ/სთ შეადგინა.

კომპანია ,,აჭარისწყალი ჯორჯია’’ ენერგოსექტორის უმსხვილესი ინვესტორია. კომპანიის მფლობელებს წარმოადგენენ ნორვეგიული “Clean Energy Invest“ და ინდური “TaTa Power“. 187 მგვტ დადგუმული სიმძლავრის მქონე შუახევის ჰესების კასკადის მშენებლობაში განხორციელებულმა ინვესტიციამ 550 მილიონ დოლარზე მეტი შეადგინა. დღეს შუახევი ჰესი დადგმული სიმძლავრით საქართველოში ყველაზე დიდი ენერგოობიექტია ენგურჰესის შემდეგ. მის მიერ გამომუშავებული ელექტროენერგიის ოდენობა საქართველოს შიდა გენერაციის დაახლოებით 5%-ს უტოლდება.

ამჟამად შუახევი ჰესი ერთადერთი პროექტია საქართველოს ენერგოსექტორში, რომელიც სამი უმსხვილესი ფინანსური ინსტიტუტის - ევროპის რეკონსტრუქციისა და განვითარების ბანკის (EBRD), აზიის განვითარების ბანკისა (ADB) და მსოფლიო ბანკის ჯგუფის წევრი საერთაშორისო საფინანსო კორპორაცია IFC-ს მიერ იყო დაფინანსებული.