შრომის უსაფრთხოების შესახებ კანონი, რომელიც ძალაში 2019 წლის 19 თებერვალს შევიდა, სექტემბრიდან კიდევ უფრო მეტ ნორმასა და ვალდებულებას უწესებს როგორც დამსაქმებელს, ისე შრომის ინსპექციის დეპარტამენტს. დამსაქმებელს უკვე კანონი ავალდებულებს, შექმნას უსაფრთხო სამუშაო გარემო.
„კომერსანტი“ დაინტერესდა, როგორ შეძლებენ ორგანიზაციები ,,შრომის უსაფრთხოების შესახებ“ საქართველოს ორგანული კანონის მოთხოვნის შესრულებას და სად გადაამზადებენ ორგანიზაციები თანამშრომლებს, რომლებიც შრომის უსაფრთხოების სპეციალისტის მოვალეობას შეასრულებენ.
როგორც გავარკვიეთ, დღეს არ მოქმედებს არცერთი სასწავლო ცენტრი, რომელიც სპეციალისტებს გადაამზადებს აკრედიტებული პროგრამით და გასცემს შესაბამის სერტიფიკატს. 14 ორგანიზაციიდან, რომლებიც სპეციალისტებს ამზადებდნენ, 2019 წლის ბოლოდან შრომის უსაფრთხოების სპეციალისტების მომზადების აკრედიტებული პროგრამის განხორციელების უფლება შეუჩერდათ.
შეჩერების მიზეზებზე საუბრობენ, როგორც სასწავლო ცენტრის ხელმძღვანელები, ასევე, შრომის პირობების ინსპექტირების დეპარტამენტშიც.
სასწავლო ცენტრებისთვის ლიცენზიის შეჩერების საკითხს შრომის უსაფრთხოების სასწავლო ცენტრ „ბაუსეიფტის“ დირექტორი ზურაბ გელაშვილის განცხადებით, სწავლების შეჩერების მიზეზი, 2019 წლის ბოლოს, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის ბრძანებაა, რითაც შეიცვალა პროგრამის მოცულობა, განხორციელების წესი და პირობები.
„ორგანიზაციები, რომლებიც სწავლებას ახორცილებენ, მინისტრის ახალი ბრძანებით დამტკიცებულ მოთხოვნებს უნდა აკმაყოფილებდნენ. ასევე, პროგრამის გავლის მსურველებისთვის შეიცვალა გამოცდის ჩაბარების მეოთოდიც, რაც იმას ნიშნავს, რომ სწავლების დასრულების შემდეგ სასერტიფიკატო გამოცდა სამინისტროში ან სამინისტროს მიერ კონკურსის წესით გამოვლენილ საგამოცდო ცენტრებში უნდა ჩააბარონ. აღსანიშნავია, რომ ასეთი საგამოცდო ცენტრები ჯერ კიდევ არ არის შექმნილი.“ - აცხადებს ზურაბ გელაშვილი.
მისი განცხადებით დიდი მოთხოვნის მიუხედავად კომპანია ორ თვეზე მეტია გაჩერებულია.
„შრომის უსაფრთხოების მიმართულებით, ბოლო წლებში მრავალი საკანონმდებლო აქტისა და განხორციელებული წარმატებული რეფორმის კვალდაკვალ, ალბათ, შესაძლებელი იყო აღნიშნული პროცესის უკეთესად წარმართვა, რათა არ მომხდარიყო სპეციალისტების მომზადების პროცესის შეჩერება, რაც საბოლოო ჯამში აზარალებს ბიზნესს და დამსაქმებლებისთვის ქმნის ბარიერს, დააკმაყოფილონ კანონის მოთხოვნა და დანიშნონ შრომის უსაფრთხოების სპეციალისტები თავიანთ ორგანიზაციებში“-აღნიშნავს გელაშვილი.
„კომერსანტი“ ჯანდაცვის სამინისტროს ინსპექტირების დეპარტამენტის უფროსს მაია მიქაიასაც დაუკავშირდა. როგორც მან ჩვენთან საუბარში განაცხადა, სასწავლო ცენტრებს ლიცენზია ახალი დადგენილების თანახმად შეუჩერდათ და მხოლოდ მას შემდეგ განაგრძობენ მუშაობას, როდესაც იმ ხარვეზებს გამოასწორებენ რაც აკრედიტაციის მისაღებად სამინისტროსთვის გაგზავნილ საბუთებში დაუფიქსირდათ.
„20 კომპანია, რომელმაც აკრედიტაციისთვის მოგვმართა ყველას დოკუმენტაციაში იყო გარკვეული ხარვეზები. როდესაც ყველა მოთხოვნა დაკმაყოფილდება ისევ მიენიჭებათ უფლება გააგრძელონ სწავლება. აქვთ ორგანიზაციებს შემოტანილი განცხადებები, თუმცა, დღევანდელი მდგომარეობით ვერცერთი მათგანი ვერ აკმაყოფილებს მოთხოვნას.“-ამბობს მაია მიქაია.
რა მოთხოვნას უნდა აკმაყოფილებდეს სასწავლო ცენტრი, რომელსაც ლიცენზიის მიღება და სასწავლო პროცესის გაგრძელება სურს, დეტალებზე ინსპექტირების დეპარტამენტში არ გვპასუხობენ, თუმცა, სამსახურის უფროსმა განაცხადა, რომ საჭიროა ინსპექტორმა სერთიფიკატის მისაღებად 125 სასწავლო საათის ნაცვლად, 235 საათი გაიაროს. არის თუ არა ეს ლიცენზიის შეჩერების მიზეზი, აღნიშნულზე სამინისტროში არ საუბრობენ.
შეგახსენებთ, რომ გასული წლის დასაწყისში, ქვეყნის პრეზიდენტმა, სალომე ზურაბიშვილმა, ხელი მოაწერა კანონს შრომის უსაფრთხოების შესახებ, რომელიც ძალაში გასული წლის 1 სექტემბრიდან შევიდა. კანონი, ძირითადად,აწესრიგებს დასაქმებულთა და სამუშაო სივრცეში მყოფ სხვა პირთა სიცოცხლისა და ჯანმრთელობის დაცვასთან დაკავშირებულ საკითხებს.
ნათია ლომიძე