მიმდინარე წლის 13 ნოემბერს, შპს „შუქრუთი +“-ს ყოფილმა დასაქმებულებმა, ნოდარ ტეფნაძემ და თორნიკე ნოზაძემ სოციალური ქსელის მეშვეობით საზოგადოებას მიაწოდეს ცრუ ინფორმაცია, თითქოს მათ კომპანიამ შრომითი ხელშეკრულება კანონდარღვევით, ახსნა-განმარტების გარეშე შეუწყვიტა. ამავდროულად, აღნიშნულმა პირებმა გაავრცელეს ფოტო და ვიდეომასალა და „შუქრუთი+“-ს წაუყენეს პრეტენზია მძიმე სამუშაო პირობებისა და არასათანადო კვების შესახებ. 

ინფორმაციაში, რომელსაც „ჯორჯიან მანგანეზი“ ავრცელებს, აღნიშნულია რომ „ეს ინფორმაცია არ შეესაბამება სიმართლეს და არის სრული სიცრუე. აქვე განვმარტავთ, რომ თორნიკე ნოზაძე შპს „შუქრუთი +“- ში 2020 წლის 28 ივლისს, სატვირთო საბაგირო გზაზე სამთო ოსტატად, ხოლო ნოდარ ტეფნაძე ამავე წლის 23 ივლისს, სატვირთო-საბაგირო გზის მკვებავის მემანქანედ დაინიშნენ. კომპანიამ გაითვალისწინა მათი არაერთგზის თხოვნა და მიუხედავად იმისა, რომ აღნიშნულ პირებს არ ჰქონდათ შესაბამისი კვალიფიკაცია, პროფესიული გადამზადების შემდეგ მათ მისცა გამოსაცდელი ვადით მუშაობის შესაძლებლობა“, — აცხადებენ კომპანიაში.

„გაცნობებთ, რომ აღნიშნულმა პირებმა მუშაობის 3 თვის განმავლობაში, არაერთგზის უხეშად დაარღვიეს დისციპლინარული ნორმები და შრომის შიდა განაწესი, ასევე სამუშაო ადგილზე ალკოჰოლური სასმელის მოხმარების, აზარტული თამაშებით დაკავებისა და სამუშაო საათების გაცდენის გამო, მიიღეს სასტიკი საყვედურები. ამ მიზეზების გამო, კომპანიამ მიიღო აღნიშნული პირების სამსახურიდან დათხოვნის სამართლიანი გადაწყვეტილება, რაც მათ ეცნობათ როგორც სამსახურის უშუალო ხელმძღვანელის მხრიდან, ასევე წერილობით.

რაც შეეხება აღნიშნული პირების მიერ სოციალურ ქსელში გავრცელებულ ვიდეო და ფოტომასალას, კომპანია სრული პასუხისმგებლობით აცხადებს, რომ გადაღებული კადრები არ ასახავს შპს „შუქრუთი + „-ს მოქმედ ობიექტს. იგი არის ერთ-ერთი ძველი ობიექტი, სადაც იგეგმება სარემონტო სამუშაოების დაწყება.
მოგახსენებთ, რომ შპს „შუქრუთი+“-მა რეგიონში ოპერირება მიმდინარე წლის ივლისიდან დაიწყო. 4 თვის განმავლობაში კომანიამ მის დაქვემდებარებაში არსებული საწარმოო ობიექტების სარემონტო სამუშაოები და კეთილმოწყობის სამუშაოების ეტაპობრივად დაიწყო.

ამ ეტაპზე, კომპანიამ უკვე კაპიტალურად გაარემონტა ე.წ სანატორიუმის შენობა, სადაც ვახტურ რეჟიმზე მომუშავე თანამშრომლები არიან განთავსებული, მათ შორის გარემონტდა სამზარეულო და შეიცვალა კვების კომპანია, რომელიც დასაქმებულებს მრავალფეროვან მენიუს და მაღალი ხარისხის საკვებით უზრუნველყოფს.
შპს „შუქრუთი +“-ს მიერ მაღაროების ტერიტორიაზე მომუშავე დასაქმებულებს სამუშაო ადილებზე მიეწოდებათ მშრალი ულუფებიც, რომლებიც ასევე არის მაღალხარისხიანი.

ასევე, ხაზგასმით გვინდა აღვნიშნოთ, რომ შპს „ შუქრუთი +“ პანდემიის დაწყების დღიდან, ზედმიწევნით იცავს საქართველოს ხელისუფლებისა და ჯანდაცვის სამინისტროს რეკომენდაციებს და ვიდრე მშრალი ულუფები დასაქმებულებამდე მივა, ის მკაცრ კონტროლს გადის. სასადილოს თანამშრომლები სპეციალური სანიტარული ფორმებით არიან აღჭურვილნი, ხოლო თითოეული პროდუქტი სასურსათო ამანათებში თავსდება, რათა სანიატრული ნორმები და უსაფრთხოება სათანადოდ იყოს დაცული.

სამუშაოები, რაც დასაქმებულთა შრომითი პირობებისა და საწარმოო პროცესის გაუმჯობესებას ემსახურება, მიმდინარეობს ეტაპობრივად და მომავალშიც გაგრძელდება.

მაშინ, როდესაც ქვეყანა კორონავირუსის ეპიდემიის გავრცელების საშიშ ეტაპზე იმყოფება და საქართველოს ეკონომიკისთვის სასიცოცხლოდ მნიშნელოვანია ადგილობრივი წარმოების შეუფერხებელი მუშაობა, აღნიშნული პირების მიერ გავრცელებული ცილისმწამებლური განცხადებები მავნებლურად მიგვაჩნია. ის არამხოლოდ კომპანიის იმიჯს აზიანებს, ამავდროულად შეურაცხმყოფელია კომპანიაში დასაქმებულთათვის.

შპს „შუქრუთი+“ გავრცელებული ბრალდებების საპასუხოდ, მზად არის, თემით დაინტერესებულ ყველა მხარეს კომპანიის სამუშაო პირობებისა თუ სხვა საკითხების შესახებ დეტალური ინფორმაცია მიაწოდოს“, — აღნიშნულია განცხადებაში.