კურორტ შოვში, ყაზახური ინვესტიციით, თანამედროვე გამაჯანსაღებელი ცენტრის შექმნა 2017 წლიდან იგეგმება. ამის შესახებ კომპანია „ევრაზია ინვესტის" გენერალური დირექტორის ტიმირზან მეირამბეკოვისა და მაშინდელი პრემიერ-მინისტრის მამუკა ბახტაძის შეხვედრისას გახდა ცნობილი.
კურორტ შოვის ტერიტორიაზე მდებარე კომპლექსი „პანსიონატი მამისონი"-ს რეკონსტრუქცია კი უკვე მესამე წელია ჭიანურდება. სწორედ ამ კომპლექსის განახლება იყო ყაზახი ინვესტორების მიერ თანამედროვე გამაჯანსაღებელი ცენტრის მშენებლობის პროექტის ნაწილი.
„შოვის საკურორტო ადგილი, რომელიც მთლიანად კერძო საკუთრებაა არანაირად არ შეცვლილა ამ ხნის განმავლობაში. დიდი ხანია უკვე გაყიდულია და არაფერი გაკეთებულა,“ - ამის შესახებ „კომერსანტს“„პანსიონატი მამისონი"-ს თანამფლობელმა განუცხადა.
როგორც ცნობილია, 2017 წელს ინვესტორებსა და ადგილობრივ მესაკუთრეს შორის დაიწყო დავა, პანსიონატის ადმინისტრაციაში აცხადებენ, ყაზახი ინვესტორები ცდილობენ შეისყიდონ ადგილობრივების მიწა.
„ის მიწა რაც ყაზახებს აქვთ ბევრად მეტია იმ მიწაზე რაც ადგილობრივს აქვს.
თავიდან შეთანხმებაზე მოდიოდნენ, რომ ამა და ამ მიწას შევისყიდით, მაგრამ როგორც მათ მოგვწერეს, უნდათ, რომ მივცეთ სიმბოლურ ფასად ან უნდა ვაჩუქოთ და გადავცეთ უსასყიდლოდ.
ძაან ჩახლართული ამბავია ზოგადად, დაძაბულობაც არ გვინდა, ამჟამად სასამართლოში დავა მიმდინარეობს და ადგილობრივები ედავებიან თავად სააქციო საზოგადოების დირექტორს,“ - ამბობს პანსიონატი მამისონის დამფუძნებელი.
ასევე, პანსიონატის მფლობელის განცხადებით, შოვში განუვითარებელია ინფრასტრუქტურა და ძირითადი ტერიტორია, რაც ყაზახებს ეკუთვნით მიუკარებელია.
მარიამ მორგოშია