შინდისში მრავალფუნქციური კომპლექსი შენდება. სარესტორნო კომპლექსს, პაბს, მასშტაბურ საბანკეტო დარბაზს და სამთავრობო დელეგაციების მისაღებ საცერემონიო დარბაზს, სააქციო საზოგადოება „დელუქს თიმ ჯორჯია“ აშენებს, პროექტის დამკვეთი კი ორგანიზაციის დირექტორი ეკა ცინცაძეა.

როგორც „კომერსანტმა“ გაარკვია 2007 წლის პროექტის შესაბამისად დაწყებული იყო მშენებლობა, ამოყვანილი იყო ფუნდამენტი და შენობის ცალკეული ნაწილები, თუმცა 2008 წლის ომის გამო მშენებლობა შეჩერდა. ახალი პროექტი, რომლის მშენებლობის ნებართვა კომპანიამ მიმდინარე წლის მარტში მიიღო, ზუსტად იმეორებს ძველი ფუნდამენტის კონტურებს. ფუნციურად წინა გზისპირა მხარეს განთავსებული შენობა რესტორანი, პაბი და საბანკეტო დარბაზი იქნება, ხოლო უკანა მხარეს განთავსდება საცერემონიო დარბაზი, მეათე და მეთვრამეტე საუკუნის საბანკეტო დარბაზები და ადმინისტრაციის ოთახები. სს „დელუქს თიმ ჯორჯიას“ ინფორმაციით, სარესტორნე კომპლექსი იძლევა მასშტაბური ბანკეტების და ქორწილების საშუალებას, ასევე კომპლექსი მზად იქნება მიიღოს სამთავრობო დელეგაციები. პროექტში გამოყენებულია ძვირადღირებული მოპირკეთება და ობიექტი სამი მხრიდან მთებითაა შემოსაზღვრული.

საპროექტო მიწის ნაკვეთის ფართობი 5000 კვ.მ.-ს  შეადგენს, განაშენიანების ფართობი 1225 კვ.მ, ხოლო საერთო ფართობი 3359.8 კვ.მ.-ია. პროექტის სამშენებლო მოცულობა 14168.45 კუბ.მ.-ია, ხოლო შენობა-ნაგებობის კონსტრუქციული სიმაღლე 22.24 მ.

არქიტეტქურის ვებ გვერდზე განთავსებული ინფორმაციის მიხედვით ირკვევა, რომ შენობაში იქნება 219.7 კვ.მ, 463.8 კვ.მ, 397კვ.მ, 480 კვ.მ საბანკეტო დარბაზები; 189.6 კვ.მ. - ცერემონიების დარბაზი; 41.9 კვ.მ. - ვიპ-დარბაზი; 111.9 კვ.მ. და 8.3 კვ.მ. - პაბი, 40.8 კვ.მ. - ღვინის სადეგუსტაციო; საკვების განაწილების ოთახები, სამზარეულოები, მარანი, კაბინეტები და სხვა.

განმარტებით ბარათში წერია, რომ შენობის ფასადი მოპირკეთებული იქნება ქვით და ტრავერტინით. ფასადზე კარ-ფანჯარა შესრულებული იქნება შავი ალუმინის მინა-პაკეტით და ალუმინის ვიტრაჟებით, მოაჯირები კი ლითონის იქნება. გარდა ამისა, შენობის საძირკვლის ტიპი ფილა იქნება.

ამონაწერით მეწარმეთა და არასამეწარმეო (არაკომერციული) იურიდიული პირების რეესტრიდან ირკვევა, რომ სს „დელუქს თიმ ჯორჯიამ“ 2019 წლის ოქტომბერში აღნიშნული ტერიტორია შპს „გბპ“-სგან შეიძინა. თავად სს „დელუქს თიმ ჯორჯია“ 2019 წლის ოქტომბრის დასაწყისში დარეგისტრირდა. კომპანიის დირექტორი ეკა ცინცაძეა.

ნინო თამაზაშვილი