„შიკრიკი“ ქართული საკურიერო მომსახურეობის კომპანიაა, რომელიც მომხმარებლებს ტრადიციულ სკუტერებით და მანქანებით მომსახურეობასთან ერთად, პროდუქტის ცხენით მიტანასაც სთავაზობს მომხმარებელს.
შიკრიკის დამფუძნებლები სანდრო ლილუაშვილი და ირაკლი ბურჭულაძე „კომერსანტთან“ სტარტაპის შექმნის იდეაზე და სამომავლო გეგმებზე საუბრობენ.
„თავიდან გვქონდა Ginventor-ი - პირველი ქართული USB კაბელი. გვქონდა წვრილმანი და მსხვილი ტექნიკის ონლაინ მაღაზია და ვახორციელებდით შიდა საკურიერო მომსახურეობას. ჩვენივე ამანათები, რომლებიც ონლაინ იყიდებოდა, ჩვენ თვითონ მიგვქონდა მომხმარებლამდე. საბოლოო ჯამში, ჩამოვყალიბდით და გადავწყვიტეთ, რომ სხვა მომსახურებაც გვეცადა.
დავიწყეთ მეგობრების წრეში საქმიანობა.მაგალითად, წახვედი სამსახურში და დაგრჩა დამტენი სახლში ან ვერ ასწრებ მაღაზიაში გასვლას, რეკავდი შიკრიკში და მას მოჰქონდა პროდუქტი იქ, სადაც დაგჭირდებოდა,“ - აღნიშნავს ირაკლი ბურჭულაძე.
შიკრიკი მომხმარებელს ცხენით მომსახურეობასაც სთავაზობს, მაგრამ დამფუძნებლები აღნიშნავენ, რომ ეს რეალურად უფრო მარკეტინგული გათვლა იყო, თუმცა ვარაუდობენ, რომ შიკრიკით მომსახურეობა შეიძლება საყვარელი ადამიანისთვის ყვავილების ან რომანტიკული წერილების გასაგზავნად გამოიყენონ. კომპანია ამ ეტაპზე საფოსტო პრინციპით მუშაობს, აქვს როგორც სწრაფი, ასევე „ექსპრეს-მიტანაც“.
„ძირითადად შემთხვევაში ჩვენ კომპანიებს ვემსახურებით. ამანათები მოგვაქვს ოფისში, რომლებიც ნაწილდება, მერე გადიან კურიერები სხვადასხვა უბნების მიმართულებით და არიგებენ. კომპანიების გარდა გვაქვს ფიზიკური პირების მომსახურეობაც მთელი თბილისის მასშტაბით. ასევე ერთადერთი საკურიერო კომპანია ვართ, რომელიც თბილისის შემოგარენში, წავკისში ოქროყანაში და სხვა ადგილებში ემსახურება მომხმარებელს. თბილისის მასშტაბით გვაქვს ექსპრეს მიწოდება ერთ საათის განმავლობაში“ - აღნიშნავს ირაკლი ბურჭულაზე.
პანდემიის დროს, შიკრიკი 76-მდე კომპანიას ემსახურებოდა, ამჟამად მათი რიცხვი ასამდეა გაზრდილი. ხოლო, ყველაზე ფართო ქსელი მის მომხმარებლებს შორის სააფთიაქო ქსელი PSP-ა.
კომპანიის დამფუძნებელი აღნიშნავს რომ ამ ეტაპზე აპლიკაციის წერის პროცესში არიან და სამომავლოდ ყველა იმ მაღაზიის თუ რესტორნის დამატებასაც აპირებენ, რომლებსაც სხვა სადისტრიბუციო კომპანიები სთავაზობენ.
„აპლიკაცია საქართველოზე იქნება მორგებული, ამ ეტაპზე ვმუშაობთ რუკაზე, რომ კურიერმა ყველა კუთხე-კუნჭულს მარტივად მიაგნოს, რაც დროის რესურს დაზოგავს, რის შედეგადაც არც ერთი მხარე არ შეწუხდება“ - ირაკლი ბურჭულაძე
შიკრიკში ამ ეტაპზე 30-მდე ადამიანია დასაქმებული. კომპანია სამომავლოდ გაფართოებას და მომსახურეობის რეგიონებში დამატებასაც გეგმავს.
„ვაპირებთ რეგიონებში გასვლასაც , ვმუშაობთ მომხმარებელზე მორგებულ აპლიკაციაზე, რომელიც მარტივი იქნება და შევეცდებით, რომ ყველაფერი მოვიცვათ. ეს გამოიწვევს ადამიანური რესურსის ზრდას და ვფიქრობთ რომ ახალ წლამდე 150 თანამშრომელი გვეყოლება.
რეგიონებს რაც შეეხება ვფიქრობთ ბათუმი, ქუთაისი რუსთავი და სხვა მსგავსი დიდი ქალაქებიც დავამატოთ.“ - აღნიშნავს ირაკლი ბურჭულაძე
თაკო კვაჭანტირაძე