გუდაურში მდებარე 4 ვარსკვლავიანი სასტუმროს Quadrum Ski and Yoga Resort-ის მესამე სასტუმროს მშენებლობა პანდემიის გამო გადაიდო. ამის შესახებ „კომერსანტთან“ სასტუმროს ხელმძღვანელმა ირაკლი ერისთავმა ისაუბრა.

„გუდაურში წელს ახალი კორპუსი  გავხსენით, სადაც საცურაო აუზი, სპა და სავარჯიშო დარბაზია განთავსებული, თუმცა პანდემიამ მოგვისწრო და ორივე სასტუმროს დაკეტვა მოგვიწია. პანდემიამ ჩვენი სამომავლო გაფართოების გეგმებიც შეცვალა. ვაპირებდით, რომ გუდაურში, სადაც მიწა გვაქვს, კიდევ უფრო გავფართოებულიყავით და მესამე სასტუმრო აგვეშენებინა, მაგრამ კორონავირუსმა ეს გეგმები ალბათ დიდი ხნით გადადო. ამ ეტაპზე არსებულ სასტუმროებზე ვართ ორიენტირებულები, რადგან წელს ან თუნდაც მომავალ წელს არსებულ სასტუმროებშიც კი არ ვიცით როგორი დატვირთვა გვექნება. ორივე კორპუსს  სავარაუდოდ ივლისში გავხსნით, მაგრამ ზაფხულზე დიდ იმედებს არ ვამყარებთ, თუმცა ვიმედოვნებთ რომ ზამთარი მაინც იქნება უფრო მშვიდი და ტურისტებით დატვირთული“, - განაცხადა ირაკლი ერისთავმა.

Quadrum-ის ხელმძღვანელმა არსებულ გამოწვევებზეც ისაუბრა და აღნიშნა, რომ ამ ეტაპზე ჯავშნები საერთოდ არ არის. მისი თქმით, იქედან გამომდინარე, რომ სასტუმრო უცხოელ დამსვენებლებზეა ორიენტირებული, შიდა ტურიზმზე დიდ იმედებს არ ამყარებს.

„ჯერჯერობით დახურულები ვართ, ამ ეტაპზე მიმდინარეობს სასტუმროს გახსნისთვის აუცილებელი რეკომენდაციების შესრულება, შემდეგ შეგვამოწმებენ და ვიმედოვნებთ რომ ივლისიდან უკვე გავიხსნებით. ჯავშნები საერთოდ არ არის, გვქონდა წინასწარი ჯავშნები, რა თქმა უნდა უცხოელი ტურისტებისგან, რადგან ჩვენ ძირითადად მათზე ვართ ორიენტირებულები, თუმცა ფრენების არარსებობის გამო ყველა ჯავშანი გაუქმდა. შიდა ტურიზმზე დიდ იმედებს არ ვამყარებთ, ერთადერთი ის დაგვრჩენია რომ საზღვრების გახსნას დაველოდოთ, თან არამარტო საქართველოში არამედ სხვა ქვეყნებშიც. შიდა ტურიზმის იმედი იმიტომ არ გვაქვს, რომ თუ გადავხედავთ წინა წლების სტატისტიკას ქართველები დამსვენებლების მაქსიმუმ 10% იყო. ჩვენი ძირითადი სტუმრები რუსი და უკრაინელი ტურისტები არიან, მათგან ჯავშნები ბოლო პერიოდშიც შემოდიოდა, მაგრამ სიტუაციიდან გამომდინარე, როცა ხედავენ რომ საზღვრების გახსნის რეალური თარიღი ამ დრომდე არ არის ცნობილი, რა თქმა უნდა აუქმებენ. ამ ეტაპზე მხოლოდ დეკემბერი-იანვრისთვის გვაქვს ჯავშნები, თუმცა ძალიან მცირე რაოდენობით“, - განმარტა ირაკლი ერისთავმა.

გუდაურში Quadrum Ski & Yoga Resort-ის პირველი სასტუმრო 2017 წლის მარტში, ხოლო მეორე სასტუმრო 2020 წლის იანვარში გაიხსნა. სასტუმრო ხის კონტეინერებისგან არის დამზადებული.

ნინო თამაზაშვილი