ღია სივრცის რესტორნები პირველი ივნისიდან ამუშავდნენ, 8 ივნისიდან კი რესტორნები და კაფე-ბარები ყველა სახის მომსახურებას აღადგენენ. შეზღუდვების მოხსნის მიუხედავად ძალაში რჩება გარკვეული რეგულაციები, რომლის შესრულება როგორც მომხმარებლებს ასევე ბიზნესსაც მოუწევს.

„კომერსანტი“ დაინტერესდა როგორ აისახება კორონავირუსის პანდემია სწრაფი კვების ობიექტებზე, დაწესებული რეგულაციებით შემცირებული დინამიკის გამო ხომ არ შეიცვლება სწრაფი კვების კონცეფცია. საკითხზე „ვენდის“ და „დანკინის“ მარკეტინგის ხელმძღვანელი, ლევან ედიშერაშვილი საუბრობს. მისი თქმით, სწრაფი კვების ინდუსტრიის ერთ-ერთი ყველაზე დიდი წარმომადგენელი კონცეფციის შეცვლას არ განიხილავს. როგორც ლევან ედიშერაშვილი განმარტავს, შეზღუდვების არსებობის შემთხვევაში, აქცენტი კვლავ მიტანის სერვისზე და „Drive Thru“ მომსახურებაზე გაკეთდება.

„ვფიქრობთ პირიქით, მოთხოვნა სწრაფი კვების რესტორნებზე დინამიკაში უფრო გაიზრდება. ჩვენ გამუდმებით ვცდილობთ და ვახერხებთ გავაუმჯობესოთ მიწოდების დრო და ხარისხი, ამიტომ შეზღუდულ საოპერაციო პირობებს, გაუმჯობესებით ვპასუხობთ და ვუპასუხებთ მომავალშიც“,- აცხადებს ლევან ედიშერაშვილი.

„ვენდის“ და „დანკინის“ მარკეტინგის ხელმძღვანელი, ლევან ედიშერაშვილი  აცხადებს, რომ არსებული მდგომარეობიდან გამომდინარე, წინასწარ რამის განსაზღვრა ან დაგეგმვა რთულია. მისი თქმით, ბიზნესის ცოცხალი ორგანიზმია, შესაბამისად, გარე ფაქტორებზე ადეკვატურად რეაგირებს. სწორედ ამიტომ ედიშერაშვილის განმარტებით, შესაძლებელია გარკვეული დროის მანძილზე მოხდეს ხარჯების ოპტიმიზაცია, სხვადასხვა მიმართულებით. „კომერსანტის“ კითხვაზე როგორ გეგმავს იმ დინამიკის შენარჩუნებას, რომელიც კოვიდ 19-ის გავრცელებამდე ჰქონდა რესტორანს „ვენდის“ და „დანკინის“ მარკეტინგის ხელმძღვანელი, ლევან ედიშერაშვილი  გვპასუხობს:

„ბევრი რამ შეიცვლება პოსტ კოვიდურ რეალობაში. ჩენ რაც შეგვიძლია რომ გავაკეთოთ არის ჩვენი საერთაშორისო და საქართველოს სახელმწიფოს რეკომენდაციების მკაცრი გათვალისწინება. როგორც აქამდე, ყოველდღიური ზრუნვა ხარისხზე და სამომავლოდ არსებული ცვლილებებზე სწრაფად გადაწყობა“, - განმარტავს ლევან ედიშერაშვილი.

ბაჩო ადამია