უხარისხოდ შესრულებული სამუშაოები, კონკრეტულ ბიზნეს სუბიექტებზე მორგებული პირობები, გამქრალი კომპანიები და სამართლებრივი დავები - „კომერსანტი“ აგრძელებს მუშაობას საქართველოსთვის კარგად ნაცნობ იმ პრობლემაზე, რომელსაც სახელმწიფო შესყიდვები ჰქვია. მედიაჰოლდინგი გაგაცნობთ იმ კომპანიებს, რომელებიც საჯარო უწყებების მოთხოვნის საფუძველზე სახელმწიფო შესყიდვების სააგენტოს შავ სიაში აღმოჩნდნენ.
ამჯერად შპს „გეომენ“-ის შესახებ მოგიყვებით. კომპანია მეწარმეთა და არასამეწარმეო იურიდიული პირების რეესტრში 2020 წელს დარეგისტრირდა. მისი დირექტორი და წილის 100%–ის მფლობელი ტატო ქობალიაა.
მერიამ საინფორმაციო და სარეკლამო პროდუქციის შესყიდვის მიზნით ელექტრონული ტენდერი 2020 წლის 23 ივნისს გამოაცხადა. ტენდერში მონაწილეობას სამი კომპანია იღებდა: შპს „პრინტარეა“, შპს „პატიო არტ“ და შპს „გეომენ“. სატენდერო კომისიის გადაწყვეტილებით გამარჯვებულად შპს „გეომენი“ გამოვლინდა. კომპანიას უნდა გაეწია სხვადასხვა ტიპის ნაბეჭდი ბანერის მონტაჟის მომსახურება, ხელშეკრულების ღირებულებად 113 230 ლარი განისაზღვრა, ხოლო მოქმედების ვადად – 2021 წლის 30 ივნისი.
2020 წლის 21 აგვისტოს მერიამ შპს „გეომენ“- ს წერილი მისწერა, სადაც ნათქვამი იყო, რომ კომპანიამ ხელშეკრულების პირობები დაარღვია. კერძოდ, შემსყიდველმა 2020 წლის 13 აგვისტოს ხელშეკრულების ცალმხრივად შეწყვეტა მოითხოვა, რის გამოც „გეომენ“-ს ჯარიმა დაეკისრა, ხელშეკრულების საერთო ღირებულების (113230 ლარი) 5%-ის ოდენობით, 5661.5 ლარი. მერიაში მიაჩნიათ, რომ კომპანიამ არასრულად შეასრულა მხარეთა შორის გაფორმებული ხელშეკრულებით ნაკისრი ვალდებულებები. პირობების დარღვევის გამო დააკისრა ჯარიმა, ხელშეკრულების ღირებულების (113 230 ლარი) 0,2%-ის ოდენობით, 226.46 ლარი.
აღსანიშნავია, რომ ადმინისტრაციული წარმოების ფარგლებში მიმწოდებელს განმარტება არ წარმოუდგენია.
საქმეში არსებული მტკიცებულებებისა და გარემოებების შეფასებისა და ურთიერთშეჯერების საფუძველზე, შესყიდვების სააგენტო მიიჩნევს, რომ შპს „გეომენ“ უნდა დარეგისტრირდეს შავ სიაში. შესაბამისად 2020 წლის 13 ოქტომბერს კომპანია შავ სიაში შეიყვანეს.