„შესაძლოა წელს უპირატესობა ისეთ 1 წლიან კულტურებს მივანიჭოთ, როგორიც არის ხორბალი, მზესუმზირა და ქერი“,- ამის შესახებ „კომერსანტს“ კომპანია “კახური ტრადიციული მეღვინეობის“ (KTW ჯგუფი) დამფუძნებელმა ზურაბ ჩხაიძემ განუცხადა. ბიზნესმენის განმარტებით, აღნიშნული გადაწყვეტილება ქვეყანაში შექმნილი მდგომარეობითაა განპირობებული. როგორც ზურაბ ჩხაიძე აცხადებს, ერთ წლიანი კულტურების გაშენება ქართულ ეკონომიკას წაადგება. აღსანიშნავია, რომ კომპანია გასულ წელს მნიშვნელოვან ინვესტიციას ახორციელებდა ზეთის ხილის წარმოების კუთხით. KTW ჯგუფი დედოფლისწყაროში ზეთის ხილის ბაღებსა და საწარმოს აშენებს გეგმავდა.ზურაბ ჩხაიძის განმარტებით, ახლა ნიადაგის შესწავლა მიმდინარეობს და უახლოეს მომავალში კომპანიას ზეთისხილის განაშენიანების გეგმა ექნება.
„ჩვენ ხელშეკრულება გვაქვს გაფორმებული ზეთისხილის მწარმოებელ მსხვილ ესპანურ კომპანიასთან „Todolivo“, რომლის დელეგაციის ჩამოსვლა და გასაშენებელი 400 ჰექტარი მიწის დათვალიერება ამ გაზაფხულზე იყო დაგეგმილი. პანდემიის გამო ამ ეტაპზე მიმდინარეობს მათი მხრიდან ნიადაგის დისტანციური ანალიზი და ველოდებით ზეთისხილის განაშენიანების გეგმას.
ჩვენ, შესაძლოა წელს ასევე უპირატესობა მივანიჭოთ 1 წლიან კულტურებს, როგორიც არის ხორბალი, მზესუმზირა და ქერი. ესენი გახლავთ პირველადი დანიშნულების პროდუქცია, რომლებიც საკმაოდ მოთხოვნადია და მნიშვნელოვნად წაადგება ქართულ ეკონომიკას. რაც შეეხება ამ პერიოდში დაგროვილ გამოცდილებას ზეთისხილის მიმართულებით, ჩვენ მას ეტაპობრივად გამოვიყენებთ, რადგან ზეთისხილი არის შედარებით მაღალფასიანი და განსხვავებული პროდუქტი“, -განაცხადა ზურაბ ჩხაიძემ.
შეგახსენებთ, რომ გასულ წელს ზეთისხილის მწარმოებელ ქართულ კომპანია „ჯეოლაივსა“ და „კახურ ტრადიციულ მეღვინეობას“(KTW) შორის ერთწლიანი მოლაპარაკებები დასრულდა. მხარეებმა ზეთისხილის წარმოების ერთობლივი ძალებით გაფართოება გადაწყვიტეს. აღნიშნულ პროექტი მიზნად საქართველოში ზეთისხილის კულტურის განვითარება ისახავს და მაში 10 მილიონი აშშ დოლარი დაიხარჯება.
„ჯეოლაივი“ რამდენიმე წელია საქართველოში ზეთისხილის პლანტაციების გაშენებით არის დაკავებული. ძირითადი პლანტაციები და ქარხანა კახეთშია განთავსებული.
რაც შეეხება „კახური ტრადიციულ მეღვინეობას“ , ის ღვინის და სპირტიანი სასმელების მწარმოებელი ერთ-ერთი უმსხვილესი კომპანიაა საქართველოში და კავკასიის რეგიონში. კომპანია 2001 წელს დაფუძნდა, „KTW“ აწარმოებს ღვინოს, ბრენდს, შუშხუნა ღვინოს და ჭაჭას ტრადიციული ქართული ტექნოლოგიებით. 16 წლის განმავლობაში, „KTW“ ღვინის ექსპორტს მსოფლიოს 20–ზე მეტ ქვეყანაში ახორციელებს.კომპანიის წარმოების უმრავლესობა მისივე ვენახის ყურძნისგან მოდის. კომპანიის ვენახები ამჟამად 600 ჰექტარზე მთელი საქართველოს გარშემოა განლაგებული. ამჟამად „KTW“ 50-ზე მეტ ძირძველ ყურძნის ჯიშთან მუშაობს.
ბაჩო ადამია