საქართველოს ტერიტორიული მთლიანობისთვის მებრძოლი ვეტერანების პენსიის საკითხთან დაკავშირებით მთავრობას მკვეთრად ჩამოყალიბებული პოზიცია არ აქვს, გარდა ზეპირი განცხადებისა, რომ ამ კატეგორიის მოქალაქეებისთვის პენსია უნდა გადაიხედოს. ცვლილება, სავარაუდოდ, 2022 წლიდან არის მოსალოდნელი.
22 ლარი, რასაც ეს ადამიანები სახელმწიფოსგან იღებენ, რეალურად სუბსიდიაა და მათი არაერთგზისი მოთხოვნის მიუხედავად, ცვლილება ამ მიმართულებით არ განხორციელებულა.
მინიმალური პენსია ომის ვეტერანებს ჯერ კდიევ 1994 წელს დაენიშნათ, რომელსაც 2019 წელს სუბსიდიის სტატუსი მიენიჭა. როგორც საგადასახადო სფეროს სპეციალისტი, ასევე ომის ვეტერანი აკაკი ჩარგეიშვილი ,,კომერსანტთან“ ამბობს, დაგეგმილი იყო, რომ 2022 წლიდან მოეხდინათ ვეტერანთა სუბსიდიის ინდექსირება, თუმცა საეჭვოა, პანდემიური გამოწვევების პირობებში ამისთვის რაიმე რესურსი გამოინახოს.
,,ვეტერანების პენსია მუდმივად არის განსჯის საგანი, ყოველწლიურად აყენებენ მოთხოვნას ეს ადამიანები, მაგრამ ნაბიჯები რეალურად არ გადადგმულა. ეს არის არა პენსია, არამედ სუბსიდირება. არ ვიცი, რა ნაბიჯს გადადგამს მთავრობა, გახარიას დაგეგმილი ჰქონდა, 2022 წლიდან მოეხდინათ ამ თანხის ინდექსირება, რაც გულისხმობს სოციალური სუბსიდირების ნაწილს - რა ცვლილებაც განიცადა ტარიფებმა, მის შესაბამისად მოეხდინათ. სოციალურ ნაწილში ეს არის ყველაზე ჩამორჩენილი პენსია, რომელსაც თითქმის მესამე ათეული წელია, ომის ვეტერანები იღებენ. ძნელად სავარაუდოა, ეს მაჩვენებელი ჯერჯერობით შეიცვალოს, სულ მცირე 2022 წლის ზაფხულამდე. ეს ის პერიოდია, როცა სუბსიდიაზე ნაკლები ტვირთია სახელმწიფოს მხრიდან და შეიძლება, რაღაც რესურსი გამოინახოს, მით უმეტეს, პოლიტიკურ წრეებში ამის შესახებ ზეპირი განცხადების დონეზე იყო საუბრები“, - ამბობს ჩარგეიშვილი, რომლის თქმითაც, შეიძლება თუნდაც 100 ლარამდე გაზრდილი პენსია ვეტერანების მდგომარეობას დიდად ვერ შეცვლის, მაგრამ ეს არის დაფასება მათი ღვაწლის, რაც გაიღეს. ეს არის სახელმწიფოს, ხალხის მადლიერება მათ მიმართ.
,,ვეტერანი არ ნიშნავს უპირობოდ პენსიონერს, ხანდაზმულს, ზოგი მათგანი არის ქმედითუნარიანი, ზოგი მრავალშვილიანი, შეიძლება იყოს კარგი ბიზნესმენი და ა.შ. ამიტომ იმის თქმა, რომ ყველა ვეტერანი აუცილებლად საჭიროებს დახმარებას, ასე არ არის, მაგრამ ამ ხალხს სჭირდება მხარდაჭერა, რაც შეიძლება პენსიის ზრდაში გამოიხატოს, არ აქვს მნიშვნელობა იმ ფაქტს, რომ ქვეყნის ტერიტორიული მთლიანობა დარღვეულია, ამ ადამიანებმა თავიანთი წილი ომი გადაიხადეს. მიმაჩნია, რომ ეს საკითხი ინდივიდუალრად არის განსახილველი, შეიძლება იყოს ვეტერანი, რომელსაც ბინა არ აქვს, უმუშევარია ან სოფლად ცხოვრობს და სხვა, ღირსეული პენსია უნდა დაენიშნოთ, მაგრამ ჯერჯერობით სახელმწიფო არ ზრუნავს მათზე და ეს არის ქვეყნის დიდი პრობლემა“, - უთხრა ჩარგეიშვილმა ,,კომერსანტს“.
აღსანიშნავია, რომ ომის ვეტერანების პენსიასთან დაკავშირებით ჯერ კიდევ მიმდინარე წლის ივნისში საუბრობდა პრემიერი ირაკლი ღარიბაშვილი, რომელმაც განაცხადა, რომ 2022 წელს გათვალისწინებული იქნება ბიუჯეტში ვეტერანებისთვის პენსიის გაზრდა.
პარტია მოქალაქეების ლიდერის, დეპუტატ ალეკო ელისაშვილის თქმით, დამამცირებელია 22 ლარი იმ ხალხისთვის, რომლებიც როდესაც სამშობლოს დასჭირდა, წავიდნენ და საკუთარი სხეულით გადაეფარნენ საქართველოს.
მისი თქმით, ვეტერანთა სამსახურს აქვს დაანგარიშებული, რომლის მიხედვითაც, 100 ლარამდე პენსიის ზრდას სახელმწიფოს წლიურად 37 მილიონი ლარი დაუჯდება.
შეგახსენებთ, რომ 22 ლარი სუბსიდია მთავრობამ „საქართველოს ტერიტორიული მთლიანობისათვის, თავისუფლებისა და დამოუკიდებლობისთვის საბრძოლო მოქმედების მონაწილეებს“ 2019 წლის 14 მაისს დაუნიშნა. ამ ფულს ვერ მიიღებენ ომის ის ვეტერანები, რომლებიც საჯარო სექტორში არიან დასაქმებულები, მათ შორის, დაცვის სამსახურში.
რაც შეეხება შეღავათებს, როგორც ცნობილია, საშემოსავლო გადასახადით არ იბეგრება მეორე მსოფლიო ომის ვეტერანი, საქართველოს ტერიტორიული მთლიანობის, თავისუფლებისა და დამოუკიდებლობისათვის საბრძოლო მოქმედების ვეტერანი და სხვა სახელმწიფოთა ტერიტორიაზე საბრძოლო მოქმედების ვეტერანი საქართველოს მოქალაქეთა მიერ კალენდარული წლის განმავლობაში მიღებული დასაბეგრი შემოსავალი 3000 ლარამდე. ასევე, მკვეთრად და მნიშვნელოვნად გამოხატული შეზღუდული შესაძლებლობის მქონე პირების შემოსავალი 6000 ლარამდე.
ვეტერანების საქმეთა სახელმწიფო სამსახურის მონაცემით, 2021 წლის 10 მაისის მონაცემებით, ვეტერანების, ვეტერანებთან გათანაბრებულ პირთა და მათი ოჯახის წევრების რაოდენობა 66 840 ადამიანს შეადგენს. აქედან 31 075 საქართველოს ტერიტორიული მთლიანობის, თავისუფლებისა და დამოუკიდებლობისათვის საბრძოლო მოქმედებების ვეტერანია.
მარი ჩიტაია