განახლებული და მასშტაბურად რეკონსტურირებული  „შერატონ გრანდ თბილისი მეტეხი პალასი“ თითქმის ერთი წელია დედაქალაქში საზეიმოდ გაიხსნა და  2019 წლის მარტიდან ოპერირებს. როგორი იყო „Marriott“-ის საერთაშორისო ქსელის წევრი „Sheraton Hotels & Resorts“-ის გრანდ კატეგორიის სასტუმროს ერთწლიანი მუშაობა თბილისში და გაამართლა თუ არა მოლოდინები ამის შესახებ „კომერსანტს“ „შერატონ გრანდ მეტეხი პალასის“ მარკეტინგის სამსახურის ხელმძღვანელი ნათია გავაშელიშვილი ესაუბრა.

„პირველი წელი, როგორც ყველა ახლად გახსნილი სასტუმროსათვის არის გამოწვევებით სავსე, თუმცა, ჩვენი პროფესიონალთა ჯგუფის დამსახურებით ვიტყოდით, რომ 2019 წელი წარმატებით დავხურეთ. 2019 წელს სასტუმრომ მრავალ სტუმარს უმასპინძლა როგორც ადგილობრივი, ასევე საერთაშორისო ბაზრებიდან. საწყისი მოლოდინები გამართლდა, თუმცა რუსეთის ბაზრის დაკარგვამაც გარკვეული ზეგავლენა იქონია.“ - ამბობს ნათია გავაშელიშვილი.

 რაც შეეხება გავრცელებულ ინფორმაციას, რომ  ბოლო პერიოდში  ბრენდულ სასტუმროებზე მოთხოვნა დედაქალაქში შემცირდა, ამ მხრივ  „შერატონ გრანდ თბილისი მეტეხი პალასში“  ამბობენ, რომ მაღალშემოსავლიანი ტურისტების მხრიდან უფრო მეტი დაინტერესებაა ბრენდულ სასტუმროზე და ამ მხრივ ქვეყნებიც საკმაოდ მრავალფეროვანია.

„იქიდან გამომდინარე, რომ წლის განმავლობაში ქვეყანას ბევრი მაღალშემოსავლიანი ტურისტი სტუმრობს, მათთვის მნიშვნელოვანია საერთაშორისო ბრენდის სასტუმროში განთავსება, შესაბამისად, ასეთი სეგმენტის ტურისტებს ვემსახურებით ჩვენ და ჩვენს სასტუმროზე მოთხოვნა მუდმივად მზარდია. ღამე დარჩენით უცხოელი სტუმრები აქტიურობენ, თუმცა საკონფერენციო სივრცეებით ადგილობრივები არიან დაინტერესებულები. საფასო სეგმენტი ხარისხის შესაბამისია, ძირითადად მოვიცავთ მაღალ შემოსავლიან სტუმრებს.

რაც შეეხება 2020-ის მოლოდინებს, ჯავშნები გვაქვს, რომელიც ჩვენთან  ადგილობრივი ტურ-ოპერატორებისაგან შემოდის, შესაბამისად, გვიჭირს დავაკონკრეტოთ რომელი ქვეყნები აქტიურობენ.“ - აღნიშნავენ შერატონის მარკეტინგის სამსახურში.

„შერატონ გრანდ თბილისი მეტეხი პალასი“ წლის მანძილზე გარკვეულ სიახლეებს გეგმავს, თუმცა ამის შესახებ  ინფორმაციას ამ ეტაპზე არ აჟღერებს.

„შერატონ გრანდ თბილისი მეტეხი პალასი“ აეროპორტიდან 15 წუთის სავალზე, ქალაქის ისტორიულ ცენტრში, მდინარე მტკვრის სანაპიროზეა გაშენებული. 220-ნომრიანი „შერატონ გრანდ თბილისი მეტეხი პალასის“ თითოეული ოთახის ინტერიერი გაფორმებულია ქართველი ფოტოგრაფების ექსკლუზიური ნამუშევრებით, რომლებზეც აღბეჭდილია საქართველოს სხვადასხვა კუთხის უნიკალურობა. სასტუმროში მოქმედებს ხუთი ბარი და რესტორანი და ღია აუზი.

სასტუმროში მდებარე Lobby Bar-ი ხელმისაწვდომია 24/7. მეათე სართულის რესტორნიდან  “ათი“, რომელიც თანამედროვე ქართულ სამზარეულოს სთავაზობს სტუმრებს, თბილისის  პანორამა იშლება.

სასტუმროს აქვს სრულად აღჭურვილი 2,000 კვ.მ სივრცე მრავალმხრივი შეკრებებისთვის, მათ შორის - 12 ოთახი საქმიანი შეხვედრებისთვის და ქალაქში ყველაზე დიდი - 1000 კვ.მ. ფართობის დარბაზი საერთაშორისო კონფერენციებისთვის, გამოფენებისთვის, კოქტეილ-წვეულებებისთვის, პერსონალური სადილებისა თუ მრავალრიცხოვანი ქორწილებისთვის.

მარიამ მორგოშია