„ამ დროისთვის,  ჩვენს პლატფორმაზე „შენ პარლამენტში“15 აქტუალური საკითხია გამოტანილი, რაზეც მომავალმა პარლამენტმა უნდა  იმსჯელოს და ხალხი უკვე აძლევს ხმას. ვხედავთ რამდენმა  მისცა ხმა და  რამდენი  არის ამა თუ იმ კანონპრექტის წინააღმდეგი,“ - „ლელოს“ ვაკის მაჟორიტარი დეპუტატობის კანდიდატმა ლევან კობერიძემ ახალ პლატფორმაზე  „შენ პარლამენტში“ პრეზენტაციის შემდეგ პლატფორმის მთავარი თავისებურებები მიმოიხილა. როგორც აღმოჩნდა,  ვაკის ამომრჩევლები უკვე აფიქსირებენ პოზიციას სხვადასხვა ინიციატივებზე, რაც მომავალმა პარლამენტმა უნდა განიხილოს.

რა არის „შენ პარლამენტში“?  როდის შეძლებენ მოქალაქეები ონლაინ რეჟიმში კანონპროექტებისთვის ხმის მიცემას და დაცულია თუ არა ანონიმურობა? -  ამ თემებზე ლევან კობერიძემ „კომერსანტთან“ ვრცლად ისაუბრა.

„ეს არის პოლიტიკის მართვის ინოვაციური პლატფორმა იმისათვის, რომ ადამიანები მხოლოდ 4 წელიწადში ერთხელ კი არ მონაწილეობდნენ პოლიტიკაში ხმის  მიცემის  მექანიზმით, არამედ მთელი 4 წლის განმავლობაში ყოველდღიურად  ჰქონდეთ შესაძლებლობა, იყვნენ  ჩართულები საპარლამენტო საქმიანობაში.  არ აქვს  მნიშვნელობა,  იქნებიან ისინი თბილისში, ქალაქგარეთ  თუ ქვეყნის  გარეთ. მათ  შეეძლებათ ნებისმიერი მოწყობილობით, მალე უკვე აპლიკაციითაც  მიიღონ მონაწილეობა პოლიტიკის შექმნაში. მე ყველა კანონპროექტს წინასწარ დავდებ და მექნება მსჯელობა ჩემს ამომრჩეველთან ერთად.

„შენ პარლამენტში“ იმიტომ დავარქვი, რომ მე კი არ შევდივარ პარლამენტში —  შენ, თითოეული 103 420 ამომრჩეველი ვაკის ოლქიდან შემოდის ფაქტობრივად საკანონმდებლო ორგანოში ჩემთან ერთად.

მოქალაქეებს იქვე  შეუძლიათ მომწერონ,  მითითებულია სპეციალური მეილი,  რომელზეც  ანონიმურად შეუძლიათ გამომიგზავნონ თავიანთ მოსაზრებები,   კომენტარები , კრიტიკა,  ანონიმურია და ტექნიკურად ისეა გაკეთებული, რომ რამე  უხერხულობა  არ  შეექმნას ამომრჩეველს,— ამბობს ლევან კობერიძე. 

თუკი კანონპროექტის ინიციატორის მოსაზრება მოქლაქის პოზიციისგან განსხვავებულია, ამ შემთხვევაში ხდება თუ არა უმრავლესობის აზრის გათვალისწინება?

„ დაუშვათ ჩემი მოსაზრება განსხვავებულია მოქალაქეების  მოსაზრებებისგან,  რომლებმაც  დააფიქსირეს ხმა  კანონპროექტთან მიმართებაში. ჩემთვის ეს უკვე  სიგნალია.

ერთი ვარიანტია, რომ უნდა  შევიცვალო აზრი,  შესაბამისად მოვისმინო არგუმენტები და ჩამოვყალიბდე. თურმე  მოქალაქეები ასე  ხედავენ ამ საკითხს და მე რაღაც არ გამომეპაროს, მერე  შევიცვალო მოსაზრება და ისე  მივიღო  კენჭისყრაში მონაწილეობა.

მეორე ვარიანტია ის, რომ მე შეიძლება მოქალაქეებამდე ვერ  მივიტანე  სრულყოფილად ინფორმაცია ამ კანონპროექტის ნიუანსების  შესახებ. ასეთ შემთხვევაში, სხვადასხვა ფორმატებში გავმართავ შეხვედრებს და  ვეცდები, რომ ავუხსნა ამომრჩეველს, თუკი რამე  ინფორმაცია მათ აკლიათ და თუ დამეთანხმებიან, უკვე მივიღებ კენჭისყრაში მონაწილეობას,“ - განმარტავს ლევან კობერიძე.

როგორც „ლელოს“ ვაკის მაჟორიტარობის კანდიდატი აღნიშნავს, მალე ვებგვერდს დაემატება ექსპერტების მოსაზრებები, ჩატი.  რათა განმარტებული იყოს  ამა თუ იმ კანონპროექტის მნიშვნელობა. მისივე თქმით, ვაკის ოლქის 103 420 ამომრჩეველი თავად გახდება საქართველოს პარლამენტის წევრი.