ფინანსთა სამინისტროს შემოსავლების სამსახურის უფროსის მოადგილემ ვლადიმერ ხუნდაძემ აზიის განვითარების ბანკის (ADB) საერთაშორისო ექსპერტთან რადომირ ჯურიჩთან, საქართველო აზერბაიჯანის რესპუბლიკის საზღვარზე, ახალი, ერთობლივი საბაჟო გამშვები პუნქტის მშენებლობის საკითხებზე სამუშაო შეხვედრა გამართა. მხარეებმა ერთობლივი პუნქტის მშენებლობასთან დაკავშირებულ ტექნიკურ საკითხებზე ისაუბრეს და სამომავლო გეგმები განიხილეს.
შეხვედრის ფარგლებში, აზიის განვითარების ბანკის ექსპერტმა, რომელიც აღნიშნული საბაჟო გამშვები პუნქტის კონცეფციის შექმნაზე მუშაობს, მონაწილეებს ობიექტის მოწყობის პირობებისა და გამართული ფუნქციონირების შესახებ მომზადებული პრეზენტაცია წარუდგინა.
აღნიშნული შეხვედრა უწყებათაშორისი სამუშაო ჯგუფების ჩართულობით (შინაგან საქმეთა სამინისტროს საპატრულო პოლიციის დეპარტამენტის, სასაზღვრო პოლიციის, საქართველოს ეკონომიკისა და მდგრადი განვითარების სამინისტროს, სახმელეთო სატრანსპორტო სააგენტოს და საქართველოს საავტომობილო გზების დეპარტამენტის წარმომადგენლები) გაიმართა და მას საბაჟო დეპარტამენტის ხელმძღვანელი ზურაბ სიჭინავა, ასევე საერთაშორისო ურთიერთობათა დეპარტამენტის უფროსი სამსონ ურიდია და სხვადასხვა დეპარტამენტის წარმომადგენლები ესწრებოდნენ.
შემოსავლების სამსახურის უფროსის მოადგილემ მადლობა გადაუხადა მონაწილეებს პროცესში ჩართულობისთვის და იმედი გამოთქვა, რომ ეს მნიშვნელოვანი პროექტი უმოკლეს ვადაში წარმატებით განხორციელდება.
შემოსავლების სამსახური
