„კორონავირუსის გამო დაწესებულმა აკრძალვებმა და ნებართვის არამიზნობრივად გაცემამ მეფუტკრეებს პრობლემები შეუქმნა, რაც აუცილებლად პროდუქტის ფასზე აისახება და მოკლე ვადაში ბაზარზე გაძვირებულ თაფლს მივიღებთ,“-ამის შესახებ „კომერსანტს“ „მომავლის ფერმერის“ ხელმძღვანელის რუსუდან გიგაშვილი ესაუბრა.
„მეფუტკრეების დიდი ნაწილს აკრძალვების დროს გაუჭირდათ ფუტკრებთან მისვლა და მოვლა. რაც სერიოზული პრობლემაა, რადგან ფუტკრის პროდუქტი გაძვირდება. ახლა მიაკითხავენ სკებს, თუმცა რა ფასი დაედება ადგილობრივ ბაზარზე პროდუქტს ჯერ არ ვიცით,“-ამბობს გიგაშვილი.
საქართველოს მეფუტკრეთა გაერთიანების წარმომადგენლის, ალეკო პაპავას ინფორმაციით, მცირე მეწარმეებზე დღემდე არა არის სრულყოფილი ნებართვა გაცემული. რიგ პრობლემებს ქმნის საგანგებო მდგომარეობა, რადგან „კომენდანტის საათის“ პირობებშიც სჭირდება ფუტკარს მოვლა, რასაც მეფუტკრეების დიდი ნაწილი ვერ ახერხებს.
“აკრძალვის დროს მცირე რაოდენობით დაუშვეს საშვები, დიდი მეურნეობის მესაკუთრეებზე გასცეს ნებართვა, თუმცა მხოლოდ პიროვნებაზე, როდესაც სამუშაო ჯგუფი უნდა უვლიდეს მეურნეობას. მცირე მეურნეობის მეპატრონეებს კი დღესაც არ აქვთ ნებართვა. დღეს მოძრაობა აღდგა და გაიხსნა საგზაო მიმოსვლა, თუმცა, „კომენდანტის საათი“ ისევ მოქმედებს.ფუტკარს კი ღამის საათებშიც სჭირდება მოვლა. კარგი იქნება თუ ბაზა შეიქმნება, სადაც ფერმერები იქნებიან და მათთვის ნებისმიერ დროს გადაადგილება, რა თქმა უნდა საქმინობის კუთხით არ გახდება პრობლემა.“-აცხადებს ალეკო პაპავა.
მეფუტკრე ირინა ლორთქიფანიძე განმარტავს, რომ აკრძალვების გამო მეურნეობის შეფერხებით მუშაობა აუცილებლად აისახება თაფლის ფასზე და შემოდგომაზე პროდუქტი საგრძნობლად გაძვირდება.
“ფუტკარი მყავს, ერთი სამეგრელოში, მეორე აღმოსავლეთ საქართველოში და ადგილზე უვლიან, გადაადგილების შეზღუდვის გამო ამ მხრივ პრობლემა არ შეგვქმნია რადგან ადგილზე არიან და პატრონობენ ფუტკარს, თუმცა სხვა მხრივ შეგვექმნა პრობლემა, შეკვეთები ვერ მიმაქვს ადგილზე.ამ დროის განმავლობაში შეკვეთა ვერ შევასრულე, მიზეზი იყო ის რომ ჩემი თაფლი განსხვავებული ბრენდინგის გამო თიხის ქოთანშია, ამდენად, მე დამოკიდებული ვარ კერამიკოსზე, რომელიც ამზადებს თიხის ქოთნებს.ის შეფერხდა, ვერ გადაადგილდებოდა და მასალაც ვერ მიიღო. თაფლი ადგილზე მქონდა თუმცა ქოთნები არა, შეკვეთა ვერ შევასრულე და ბაზარზე ჩემი თაფლის რეალიზაცია შემცირდა.
რაც შეეხება სამომავლოდ პროცესის გაგრძელებას. ჯერ ფუტკრები ეზოში ჰყავს ჩემს მეფუტკრეს, თუმცა, როდესაც მთის პერიოდი დადგება და ფუტკარი გაფრინდება მაღალი ზონისკენ ყვავილებისთვის, თუ ამ დროსაც შეზღუდვები იარსებებს საკმაოდ დავზარალდებით. ამის გამო თაფლით ადგილობრივი ბაზრის უზრუნველყოფა გაგვიჭირდება, ხოლო რაც იქნება, იმაზე ფასი საგრნობლად აიწევს. ახლაც მომატებულია ღირებულება, თუმცა, შემოდგომაზე მეტად შესამჩნევი იქნება.“-აცხადებს ირინა ლორთქიფანიძე.
ნათია ლომიძე
თაფლი 
