ბოლო ერთ წელიწადში მიკროსაფინანსო ორგანიზაციების რიცხვი 19 ერთეულით შემცირდა. კერძოდ, ეროვნული ბანკის მონაცემებით, თუ 2018 წლის მეოთხე კვარტლის მდგომარეობით ბაზარზე 67 მის-ო ოპერირებდა, 2019 წლის ანალოგიურ პერიოდში, მათი რაოდენობა 48-მდე შემცირდა.
აღსანიშნავია, რომ მკვეთრად შემცირებულია მიკროსაფინანსო ორგანიზაციების წმინდა მოგება, აქტივები, მათ მიერ დასაკუთრებული ქონება, მიღებული საპროცენტო სარგებელი და დივიდენდები.
საქართველოს ეროვნული ბანკის მონაცემებით, ბოლო ერთ წელში მკვეთრად შემცირებულია მისო-ების წმინდა მოგება. კერძოდ, თუ წმინდა მოგება 2018 წლის მეოთხე კვარტალში 31 124 732 ლარს შეადგენდა, 2019 წლის ანალოგიურ პერიოდში 112 123 ლარი იყო.
ბოლო ერთ წელიწადში 7 263 911 მლნ ლარით შემცირდა დარიცხული მისაღები პროცენტები და დივიდენდები. სებ-ის მონაცემებით, 2019 წლის მეოთხე კვარტლის მდგომარეობით, მიკროსაფინანსოების მიერ მიღებულმა პროცენტებმა და დივიდენდებმა 20 373 727 ლარი შეადგინა. ეს მაშინ, როდესაც 2018 წლის ანალოგიურ პერიოდში ეს მაჩვენებელი 27 637 638 ლარს შეადგენდა.
რაც შეეხება დასაკუთრებულ უძრავ-მოძრავ ქონებას, 2019 წლის მეოთხე კვარტლის მდგომარეობით, მიკროსაფინანსო ორგანიზაციებმა 7 736 318 ლარის ქონება დაისაკუთრეს, 2018 წლის ანალოგიურ პერიოდში ის ორჯერ მეტი იყო და 14 006 551 ლარს შეადგენდა.
2019 წლის მეოთხე კვარტლის მდგომარეობით, მიკროსაფინანსო ორგანიზაციების მთლიანი აქტივები 1 378 550 187 ლარს შეადგენდა, მაშინ როდესაც 2018 წლის მდგომარეობით 1 457 978 967 ლარი იყო.
აღსანიშნავია, რომ მხოლოდ მცირედით არის გაზრდილი გაცემული სესხის ოდენობა. საქართველოს ეროვნული ბანკის მონაცემებით, თუ 2018 წლის მეოთხე კვარტლის მდგომარეობით, მიკროსაფინანსო ორგანიზაციებმა 1 101 531 374 ლარის სესხი გასცეს, 2019 წლის ანალოგიურ პერიოდში სესხების მოცულობა 1 129 140 119 ლარამდე გაიზარდა.
ცნობისთვის, მიკროსაფინანსო ორგანიზაციების მუშაობაზე ნეგატიური გავლენა ეროვნული ბანკის მიერ დაწესებულმა რეგულაციებმა, მათ შორის, საზედამხედველო კაპიტალის ზრდამ და ფიზიკური პირის დაკრედიტების შესახებ დებულებამ იმოქმედა, რომელიც გასული წლის 1-ლი იანვრიდან ამოქმედდა.
ნინო თამაზაშვილი