საქართველოს მთავრობა ყოფილი წმ. მიქაელის სახელობის საავადმყოფოს გაყიდვას მეხუთედ ცდილობს. კულტურული მემკვიდრეობის ძეგლი ამჯერად 60 პროცენტიანი ფასდაკლებით 16 მლნ ლარად იყიდება. ქონების ეროვნულმა სააგენტომ აუქციონი კიდევ ერთხელ გამოაცხადა.
საპრივატიზებო პირობების მიხედვით, ხელშეკრულების გაფორმებიდან არაუმეტეს 6 წლის ვადაში XIX საუკუნეში აშენებული ერთ-ერთი გამორჩეული საავადმყოფო კომპლექსის ტერიტორიაზე მრავალფუნქციური კომპლექსი უნდა მოეწყოს, რომელიც მოიცავს ხელოვნების ცენტრს. აქ განთავსდება ხელოვნების ნიმუშების საგამოფენო დარბაზი, ბიბლიოთეკა, სალექციო დარბაზი, საგანმანათლებლო სივრცე და კვების ობიექტები. საპრივატიზებო პირობის შესრულების მიზნით, არანაკლებ 30 000 000 ლარის ინვესტიცია უნდა განხორციელდეს. ხოლო, ხელოვნების ცენტრებს პროფილი არანაკლებ 20 წლის განმავლობაში უნდა შეუნარჩუნდეს. აღსანიშნავია, რომ ხელშეკრულების გაფორმებიდან 6 წლის განმავლობაში უძრავ ქონებაზე მრავალბინიანი საცხოვრებელი სახლი არ უნდა აშენდეს.
ელექტრონულ აუქციონში მონაწილეობის მისაღებად გადასახდელი უპირობო და გამოუხმობი საბანკო გარანტიის ოდენობა 4 000 000 ლარით, ხოლო სავაჭრო ბიჯის ოდენობა 20 000 ლარით განისაზღვრა.
მიუხედავად იმისა, რომ საქართველოს მთავრობა ობიექტის გასხვისებას პროგრამის „100 საინვესტიციო შეთავაზება ბიზნესს“ ფარგლებშიც ცდილობს, პროექტმა განსაკუთრებული ინტერესი ჯერჯერობით ვერც ქართველ და ვერც უცხოელ ინვესტორებში ვერ გამოიწვია. ამ დრომდე აუქციონი 1000-მდე ადამიანმა ნახა, ბიჯი კი არავის გაუკეთებია.
შეგახსენებთ, რომ წმ. მიქაელის სახელობის ყოფილი საავადმყოფოს ტერიტორია 2015 წლის დასაწყისში 4 მლნ აშშ დოლარად გაიყიდა. მაშინ ინვესტორი ვალდებული იყო ტერიტორიაზე არანაკლებ 200-ოთახიანი, 5-ვარსკვლავიანი სასტუმრო და სამორინე განეთავსებინა. საინვესტიციო ვალდებულება არანაკლებ 100 მლნ ლარს შეადგენდა, ხოლო კომპანიას სამშენებლო სამუშაოები 2016 წლიდან უნდა დაეწყო. კომპანიამ ხელშეკრულებით ნაკისრი ვალდებულებები არ შეასრულა და იმავე წლის ბოლოს „აღმას“ ქონება ჩამოერთვა.
ქონების ეროვნულმა სააგენტომ ობიექტი საპრივატიზაციოდ 2018 წელს გამოიტანა. საავადმყოფო კომპლექსი საწყისი ფასი 35 მილიონი ლარი, ხოლო საინვესტიციო ვალდებულება კი 100 მილიონი ლარი იყო, თუმცა აუქციონი ვერ შედგა.
წარუმატებელი აღმოჩნდა 2019 წელის იანვარში იდენტური ღირებულებით და საინვესტიციო ვალდებულებებით გამოცხადებული აუქციონიც.
შედეგი ვერც საინვესტიციო ვალდებულებების 40 მილიონამდე შემცირებამ გამოიღო. აუქციონი მესამედ, 2019 წლის ნოემბერშიც ჩაიშალა.
ბოლოს, აუქციონი 2021 წლის 30 მარტს გამოცხადდა, რა დროსაც ობიექტის საწყისი ფასი 39,800,000 ლარამდე გაიზარდა. ამ შემთხვევაშიც საინვესტიციო ვალდებულება ისევ 40,000,000 ლარი იყო. აუქციონი მეოთხეჯერაც ჩაიშალა.
ეკონომიკისა და მდგრადი განვითარების ყოფილი მინისტრი 2019 წელს პრივატიზაციის პროცესს აჩქარებდა, თუმცა ნათია თურნავას მოუგვიანდა და წმ. მიქაელის სახელობის საავადმყოფო კომპლექსი ისევ სახელმწიფო ბალანსზეა. შემცირებული ფასით და შეცვლილი საინვესტიციო ვალდებულებებით გაიყიდება თუ არა კულტურული მემკვიდრეობის ძეგლი ლევან დავითაშვილის მინისტრობის პერიოდში, ამას 10 დღეში გავიგებთ.
ბაჩო ადამია