თბილისის მერის კახა კალაძის მიერ გაკრიტიკებული საგზაო კომპანია „მილენიუმ ბილდერს გრუპის“ დირექტორი თეიმურაზ ბოჭორიშვილი, კომენტარს „კომერსანტთან“ აკეთებს. როგორც ცნობილია, თბილისის მერმა დედაქალაქის მთავრობის სხდომაზე ინფრასტრუქტურულ სამუშაოებთან დაკავშირებით ისაუბრა. კალაძემ გლდანში რამდენიმე ქუჩაზე წარმოებულ სამუშაოებზე გაამახვილა ყურადღება და სამუშაოების შესრულების ხარისხთან დაკავშირებით უკმაყოფილება გამოთქვა.
შპს „მილენიუმ ბილდერს გრუპმა“ ხიზაბავრისა და ხარაძის ქუჩებზე გლდანის რაიონის გამგეობის დაკვეთით, გზის საფარის კაპიტალური რეაბილიტაცია განახორციელა. თეიმურაზ ბოჭორიშვილის თქმით, გზა 18 თებერვალს გაიხსნა და მისთვის უცნობია, რატომ კეთდება აქცენტი ისევ იმ ქუჩებზე, როდესაც რეალურ პრობლემას გლდანის ცენტრალური ქუჩა, ხიზანიშვილი ქმნის.
„ხალხის პროტესტი გლდანში გადაკეტილი გზის გამო, უკავშირდება ხიზანიშვილის ქუჩას და ამ ქუჩასთან ჩემს კომპანიას არანაირი შეხება არ აქვს. არ ვიცი მერმა რატომ გამოთქვა უკმაყოფილება ამ ქუჩებთან დაკავშირებით, დასკვნა თქვენ გააკეთეთ, ალბათ შეცდომაში შეიყვანეს და ამის გამო ახსენა ის ქუჩები რომელიც მე მქონდა ჩაბარებული და სადაც სარეაბილიტაციო სამუშაოები 18 თებერვალს დასრულდა.“-ამბობს თეიმურაზ ბოწორიშვილი.
რაც შეეხება ხიზაბავრისა და ხარაძის ქუჩებს, „მილენიუმ ბილდერს გრუპის“ დირექტორის თქმით, სამუშაო პროცესში პრობლემები აღმოჩნდა, რომელიც საკუთარი ხარჯით გამოასწორა და პროექტი დათქმულ ვადაში დაასრულა.
„ის ასფალტი,რომელიც გზის მშენებლობისთვის ვიყიდე, ვერ დააკმაყოფილა სტანდარტის მაჩვენებელი. ასფალტის ქარხანამ თავისი ხარჯებით გაასწორა ჩვენთვის მიყენებული ზარალი. რაც შეეხება ტენდერში მონაწილეობას, რა თქმა უნდა მივიღებთ, რადგან ჩვენ არ დავჯარიმებულვართ, არც შავ სიაში ვართ. იმიტომ რომ ჩვენი ხარჯით დავასრულეთ პროცესი.“-ამბობს ბოჭორიშვილი.
„კომერსანტის“ კითხვაზე, თუ რატომ მიიჩნევენ ქართულ კომპანიებს არაკომპედენტურებად, თეიმურაზ ბოჭორიშვილი ამ მოსაზრებას არ ეთანხმება და აცხადებს:
„საქართველოში ამ სფეროში პროფესიონალები ჰყავს, თუმცა, საკვალიფიკაციო გამოცდილება არ ჰყოფნით, რომ საერთაშორისო ტენდერებში მიიღონ მონაწილეობა. შესაბამისად, საერთაშორისო კომპანიები, რომლებიც დიდ მაგისტრალებზე მუშაობენ, რა თქმა უნდა იგებენ ტენდერებს, შემდეგ კი ქართველ კომპანიებს ქვეკონტრაქტორად განიხილავენ,“-აღნიშნავს ბოჭორიშვილი.
ნათია ლომიძე