საკოორდინაციო საბჭომ 22 თებერვალს გამართულ სხდომაზე თითქმის ყველა მანამდე არსებული კოვიდრეგულაცია გააუქმა. როგორც რესტორატორთა ასოციაციის თავმჯდომარე შოთა ბურჯანაძე „კომერსანტთან” საუბარში აღნიშნავს, საკოორდინაციო საბჭოს ეს გადაწყვეტილება მოსალოდნელი და ადეკვატური იყო. მისივე თქმით, რამდენიმე კვირაში დარჩენილი მცირედი რეგულაციებიც სრულად მოიხსნება.
„კორონავირუსის არსებულ შტამთან “ომიკრონთან“ მიმართებით საკოორდინაციო საბჭოს გადაწყვეტილება ადეკვატური და მოსალოდნელი იყო, შეიძლებოდა რომ ეს გადაწყვეტილება 2-3 კვირით ადრე მიეღოთ, თუმცა არც დღეს ყოფილა დაგვიანებული.
შეზღუდვებს, რომლებიც დღეს გვაქვს, რეალურად “ომიკრონის“ მოქმედებასთან მიმართებაში არანაირი შეხება არ ჰქონია და რაც არ უნდა დაწესდეს, ეს მხოლოდ და მხოლოდ ფურცელზე დაწერილი გამოვა და მხოლოდ და მხოლოდ ეკონომიკას და სახელმწიფოს დააზარალებს. აქედან გამომდინარე, ის მცირედი შეზღუდვები, რაც დარჩენილია, ეგეც რამდენიმე კვირაში მოიხსნება“, - აღნიშნა შოთა ბურჯანაძემ.
ბურჯანაძის თქმით, საბჭოს დღევანდელი გადაწყვეტილება ფაქტობრივად შეზღუდვების სრულიად მოხსნაა და ძალიან მცირე ბერკეტია დატოვებული იმისთვის, რომ თუ ეპიდსიტუაცია გაუარესდება, რაღაც შეზღუდვა მაინც არსებობდეს.
„დღევანდელი გადაწყვეტილება, ფაქტობრივად, შეზღუდვების სრულიად მოხსნას ნიშნავს, დატოვეს მხოლოდ მცირე შეზღუდვა რაოდენობაზე, თუმცა ამ რაოდენობის შემმოწმებელიც ხომ უნდა არსებობდეს? რეალურად, ის ნაბიჯი, რაც გადაიდგა, არის ის მოტივაცია, რომ მომავალში ყველაფრის მოხსნა უფრო მარტივი იყოს. თუმც რაღაც ბერკეტი დატოვებულია იმისთვის, რომ სასწაული რომ მოხდეს და სიტუაცია გამწვავდეს რაღაც შეზღუდვა არსებობდესს, რომ ისევ დიდ შეზღუდვებს არ დავუბრუნდეთ. ეს არის უბრალოდ ფიქცია, რომელზეც ვფიქრობ რომ ყურადღება დიდად არ მიექცევა“, – თქვა შოთა ბურჯანაძემ.
საკოორდინაციო საბჭოს 22 თებერვლის გადაწყვეტილებით ქორწილებზე და ქელეხებზე აკრძალვა მოიხსნა, ერთ მაგიდასთან დასაშვები რაოდენობა კი 10 ადამიანამდე გაიზარდა, გარდა ამისა მოიხსნა დეზობარიერის თერმოსკრინინგის და ე.წ. ჟურნალის წარმოებაც.
თაკო კვაჭანტირაძე