ექს-პრეზიდენტის მიხეილ სააკაშვილის საქართველოში დაბრუნების შესახებ გავრცელებულმა ინფორმაციამ ბიზნესმენთა წრეში დაბნეულობა გამოიწვია. ნაწილს სჯერა, რომ სააკაშვილი საქართველოშია, ნაწილიც - მორიგ პროვოკაციად მიიჩნევს.  ალბათ,  ჭორ-მართალი მალე გაირკვევა, თუმცა, ბიზნესმენების აზრით, როგორიც არ უნდა იყოს იგი, არჩევნების შედეგზე გარკვეულ დონეზე ასახვას მოახდენს.  

როგორც ბიზნესმენი დავით ბეგიაშვილი ,,კომერსანტთან“ ამბობს, არა მარტო პოლიტიკური სიტუაცია აირევა,  სააკაშვილის ჩამოსვლით სერიოზული საფრთხე დაემუქრება ეკონომიკას, ინვესტიციებს და შესაძლოა ლარის კურსსაც, რომელიც გარკვეულ ცვლილებას არჩევნების წინ ტრადიციულად, ისედაც განიცდის.

,,მეეჭვება ფაქტი, რომ მიშა  სააკაშვილი ჩამოსულია საქართველოში. ასეთი ,,სიურპრიზი“  ყოველთვის იწვევს რყევებს როგორც სავალუტო ბაზარზე, ასევე ეკონომიკაშიც.  ალბათ მალე გაირკვევა სიტუაცია და უფრო ნათელი გახდება სააკაშვილის ქცევის გავლენა ქვეყნის პოლიტიკურ და ეკონომიკურ პროცესებზე. ცხადია, სერიოზულ დაძაბულობას გამოიწვევს.  არჩევნების გავლენა ყოველთვის იგრძნობა ლარის  კურსზე, ახლა მეტნაკლებად ამ პროცესის ზემოქმედების ქვშ არის ეროვნული ვალუტა, თუმცა არასტაბილურობა ამ მხრივაც გამოიწვევს არასასურველ შედეგს.  ცხადია, ბიზნესგარემოზეც ადეკვატურად იმოქმედებს.  სააკაშვილის მმართველობის პერიოდში ბიზნესი რა მდგომარეობაშიც იყო, ყველას გვახსოვს. რისკები ისეც გაჩნდება, უფრო მეტად შემცირდება ინვესტიციებიც. ეს იმ შემთხვევაში, თუ დავუშვებთ, რომ სააკაშვილი საქართველოშია. ჩემი აზრით, ეს სცენარი ვერ განვითარდება, რადგან საზოგადოების საღი ნაწილი არ დაუშვებს მის  დაბრუნებას საქართველოში და აუცილებლად  პროტესტიც მოყვება“, - ამბობს დავით ბეგიაშვილი.

განსხვავებული მოსაზრებისაა ბიზნესმენი თემურ ჭყონია, რომელიც დარწმუნებულია, რომ ექს–პრეზიდენტი საქართველოშია, თუმცა რა გავლენას მოახდენს ეს პროცესი ქვეყნის ეკონომიკურ გარემოზე, არ აკონკრეტებს. ჭყონია ფიქრობს, რომ ასეთი ფაქტი არჩევნების შედეგზეც გარკვეულ გავლენას მოახდენს.

,,ეჭვების დონეზე არ ვსაუბრობ, ნამდვილად მგონია, რომ მიშა საქართველოშია. როგორ და რანაირად მოახერხა ეს, ჩემთვის უცნობია, მაგრამ გამორიცხული არაფერია.  შედეგი ორშაბათს გამოჩნდება, როგორი გათენდება არჩევნებიდან პირველი დღე საქართველოში. სპეციალურად ამ დღისთვის ჩამოვიდა, აბა, სხვა რა აზრი უნდა ჰქონდეს მის გადაწყვეტილებას?!  ახლა საუბარი და ანალიზის გაკეთება ძალიან ნაადრევია,  ყველა ადამიანი თვითონ აგებს თავის საქციელზე პასუხს, ალბათ ასე ჩათვალა საჭირო იყო და ჩამოვიდა საქართველოში“, - ამბობს ჭყონია ,,კომერსანტთან“ საუბარში.

ცნობისთვის, მიხეილ სააკაშვილმა სოციალურ ქსელში ვიდეომიმართვა გაავრცელა, რომელშიც აცხადებს, რომ ის ბათუმშია. ვი­დე­ოს გა­მოქ­ვეყ­ნე­ბამ­დე სა­ა­კაშ­ვილ­მა სოციალურ ქსელში დაწერა, რომ ის უკვე საქართველოშია.

შინაგან საქმეთა სამინისტროში კი გაკეთდა განცხადება, რომ ექს-პრეზიდენტს  საქართველოს საზღვარი არ გადმოუკვეთავს.

განცხადება გაკეთდა ,,ქართულ ოცნებაშიც“. მმართველი პარტიის წარმომადგენლების თქმით,  სააკაშვილი საქართველოში არ ჩამოსულა და ის  უკრაინიდან არც გასულა.

მარი ჩიტაია