„ჯორჯიან ეარვეისის“ ყოფილი გენერალური დირექტორი იასე ზაუტაშვილი სოციალურ ქსელ facebookში სტატუსს აქვეყნებს, რომელსაც „კომერსანტი“ უცვლელად გთავაზობთ: „"შერჩევითი სამართლიდან" "შერჩევით მგზავრამდე"
რაც ეხლა ხდება ჩარჩენილი მგზავრების გამოყვანაზე, რბილად რომ ვთქვა უპასუხისმგებლობაა, თუ არა მავნებლობა.
პირადად მე მირეკავს ყოველდღე მინიმუმ 10-15 ადამიანი, რომლის მეგობარი, შვილი, და, ძმა, თუ მეუღლე ჩარჩენილია უპატრონოდ ევროპაში.
რას ვთავაზობთ ჩვენ მათ?
1. იყიდეთ ონლაინ ბილეთი აირზენაში - ნონსენსი. წარმოუდგენელია, 2 დღით ადრე ონლაინ ბილეთის შეძენა, სერვერი იტვირთება, პროგრამა ჭედავს და ა.შ.
2. მიმართეთ საელჩოებს - ისინი თავის მხრივ ადგენენ რაღაც პრიორიტეტულ მგზავრთა სიებს, შეიძლება მართებულადაც, მაგრამ აბსოლუტურად გაუგებარი პრინციპებით. შედეგად, საელჩოში მისულ გასაცოდავებულ ხალხს ამისამართებენ აირზენაში და პირიქით.
3. კვირაში 1-2 რეისი არ ყოფნის ჩარჩენილი მგზავრების გამოყვანას. - ეკონომიკის სამინისტრო არ ჩქარობს დაუკავშირდეს სხვა ავიაკომპანიებს ანალოგიური თხოვნით თუ დავალებით, რათა ინტენსიურად და გეგმაზომიერად გამოიყვანონ მგზავრები ევროპის ქალაქებიდან. ახსნა: საკარანტინო ადგილების და ექიმების შესაძლო დეფიციტი.
შედეგად, ჩვენ არ ვიცით ვინ და რატომ ადგენს ამ იდუმალებით მოცულ "მგზავრთა სიას" და რატომ აბრიყვებენ ხალხს ე.წ. ვირტუალური ონლაინ ბილეთებით.
რჩევა მთავრობას:
შეადგინეთ ქვეყნების მიხედვით ჩარჩენილი მგზავრების ღია და გამჭვირვალე სია და აუხსენით მათ, რომ ეტაპობრივად მოხდება უკლებლივ ყველას გამოყვანა. დაელაპარაკეთ ავიაკომპანიებს, შეადგინეთ რეალისტური ფრენების გრაფიკი, გამოისყიდეთ ყველა ჩარტერული რეისი თვითღირებულების ფასში და პრიორიტეტის მიხედვით (ავადმყოფები, ასაკობრივი კატეგორიის, ადრე შეძენილი ბილეთების მქონე, ჩარჩენილი ტურისტი, თუ სტუდენტი) რიგითობით წამოიყვანეთ და არა ისე შერჩევით, როგორც ახლა აკეთებთ. აქ, ადგილზე იზრუნეთ საველე -საკარანტინო პირობების შექმნაზე, დაელაპარაკეთ სხვა სასტუმროებსაც და ექიმის დიპლომიანი ყველა მოქალაქე,დარწმუნებული ვარ,სიამაყით ჩაერთვება ამ საქმეში.
p.s. მე რომ თქვენი ვიყო "რაინეარს" უფასოდ ჩამოვაყვანინებდი ამ ხალხს, რაში გადაუხადეთ აბა 30 მილიონი ევრო რამოდენიმე თვის წინ? თუმცა სად გაქვთ თქვენ მაგის შნო და უნარი?!!!!!!“-წერს ზაუტაშვილი.