შავი ზღვის წყალქვეშა კაბელის პროექტის ტექნიკურ-ეკონომიკური კვლევის დასრულების შემდეგ საქართველოს პროექტის რეალიზებისთვის საჭირო ინვესტიციის მოცულობა ეცოდინება. როგორც ეკონომიკისა და მდგრადი განვითარების მინისტრის მოადგილემ რომეო მიქაუტაძემ განაცხადა, პროექტის დაფინანსების მსურველები ბევრია, მათ შორის საერთაშორისო საფინანსო ინსტიტუტები.
მინისტრის მოადგილე ამბობს, რომ პროექტის რეალიზება ბევრ რამეზე იქნება დამოკიდებული, თუმცა ოპტიმისტური გათვლებით 5 წლის განმავლობაში უნდა განხორციელდეს. წინასწარი მონაცემებით, შავი ზღვის წყალქვეშა კაბელის სიგრძე 1195 კმ-ი იქნება.
„სასურველი ვადა არის, რომ 5 წლიან პერიოდში პროექტის განხორციელება მოხდეს, იმიტომ, რომ საკმაოდ გრძელი, 1195 კმ-ია მისი სიგრძე, რომელიც კიდევ უფრო დაზუსტდება პროექტირების ეტაპზე. 1100 კმ გახლავთ წყალქვეშ და დანარჩენი არის საქართველოს და რუმინეთის მიწა“,- განაცხადა რომეო მიქაუტაძემ გადაცემაში „ბიზნესი რუსთავი 2-ზე“.
მინისტრის მოადგილის თქმით, შავი ზღვის წყალქვეშა კაბელის რეალიზების შემდეგ ელექტროენერგიის გატარების შესაძლებლობა საქართველოს გარდა მეზობელ სახელმწიფოებსაც ექნებათ.
„ყველა მეზობელ ქვეყანას და რაც მთავარია საქართველოს ეძლევა დამატებითი საშუალება, რომ თავისი ადგილობრივი წარმოებული ელექტროენერგიის გატანა მოახდინოს. ეს არის ყველაზე მნიშვნელოვანი. ასევე იქნება ექსპორტ-იმპორტის საშუალება, სატრანზიტო ფუნქციაც და სხვა.
ჩვენი ქვეყნის გეოგრაფიული მდებარეობა გვაძლევს იმის საშუალებას, რომ სატრანზიტო ფუნქცია შევასრულოთ. ენერგეტიკის კუთხით ჩვენ ვმუშაობთ ძალიან აქტიურად. ეს ერთის მხრივ ნიშნავს იმას, რომ გავაძლიეროთ ის კავშირები რაც გაგვაჩნია ჩვენს მეზობელ ქვეყნებთან და ასევე ვიმუშაოთ ახალ პროექტზე. მინდა ვთქვა, რომ აქტიურად ვმუშაობთ შავი ზღვის წყალქვეშა კაბელის პროექტზე, რომელიც იქნება საშუალება, რომ ჩვენი ქვეყნის ენერგოსისტემა დაუკავშირდეს პირდაპირ ევროპის ენერგოსისტემას. ამის მეშვეობით მოხდება ელექტროენერგიის გატარება. ამ კაბელის ტევადობა გახლავთ 1000 მგვტ-ი. ახლა პროექტი ტექნიკურ-ეკონომიკური შესწავლის სტადიაზეა. მომდევნო წელს მივიღებთ მთლიან დოკუმენტაციას კონტრაქტორისგან, რომლის შემდეგაც დავიწყებთ მოძიებას თუ რა სახსრებით და რა დაფინანსებით უნდა მოხდეს პროექტის განხორციელება.
ამ პროექტის მნიშვნელობა არამხოლოდ ჩვენთვის არამედ მთელი რეგიონისთვის ძალიან მაღალია. ასევეა ევროპისთვისაც, იმიტომ რომ ეს იქნება ახალი გზა დივერსიფიკაციის და ახალი შესაძლებლობაც“, - განაცხადა მინისტრის მოადგილემ.
სსე-ს ინფორმაციით, შავი ზღვის წყალქვეშა კაბელის პროექტის ტექნიკურ-ეკონომიკური კვლევის მეშვეობით დადგინდება პროექტის პრაქტიკული განხორციელების შესაძლებლობები და საუკეთესო გზები. საკონსულტაციო კომპანიამ კვლევა 2022 წლის 11 მაისს დაიწყო და მისი დასრულება 18 თვის ვადაშია დაგეგმილი.
პროექტის სრულყოფილი კვლევა და შეფასება, საქართველოს ეკონომიკისა და მდგრადი განვითარების სამინისტროს მხარდაჭერითა და მსოფლიო ბანკის აქტიური ჩართულობით, „საქართველოს სახელმწიფო ელექტროსისტემის“ მიერ არის ინიცირებული. კვლევის ფარგლებში, სსე აქტიურად თანამშრომლობს რუმინეთის გადამცემი სისტემის ოპერატორთან - Transelectrica. საქართველოს ეკონომიკისა და მდგრადი განვითარების სამინისტროს მხრიდან პროექტის თაობაზე პერიოდული კონსულტაციები ტარდება რუმინეთის, სომხეთისა და აზერბაიჯანის რესპუბლიკების შესაბამის სამინისტროებთან, ხოლო სსე-ის მხრიდან - ზემოაღნიშნული ქვეყნების შესატყვის ენერგეტიკულ კომპანიებთან.
„საქართველო-რუმინეთის დამაკავშირებელი შავი ზღვის წყალქვეშა კაბელის პროექტი“ წყალქვეშა მაღალი ძაბვის გადამცემი ქსელის მოწყობას ითვალისწინებს. ინიციატივა მიზნად ისახავს სამხრეთ კავკასიის რეგიონის სამხრეთ-აღმოსავლეთ ევროპასთან დაკავშირებას შავი ზღვის წყალქვეშა ელექტროგადამცემი კაბელის საშუალებით, რომლის მთლიანი სიგრძე დაახლოებით 1195 კმ. (95 კმ. სახმელეთო და 1100 კმ. წყალქვეშა ნაწილი) იქნება, ხოლო სიმძლავრე - 1000 მგვტ. წყალქვეშა ელექტროგადამცემი კაბელი ასევე აღჭურვილი იქნება ციფრული კავშირით, რომელიც უზრუნველყოფს მაღალი ხარისხის ტელეკომუნიკაციას რუმინეთსა და საქართველოს შორის.
პროექტის განხორციელება ხელს შეუწყობს ევროპისა და კავკასიის რეგიონის ენერგეტიკული უსაფრთხოების განმტკიცებას, განახლებადი ენერგიის სექტორის განვითარებას და გაზრდის სატრანზიტო შესაძლებლობებს მითითებულ რეგიონებს შორის.