მინი კივი, ოკრა, პეპინო, კივანო, ფიზალისი და ახლა უკვე შავი სიმინდი - „ლოლაძეების ფერმა“ საქართველოს ბაზარზე ეგზოტიკურ სასოფლო-სამეურნეო პროდუქტებს უკვე 5 წელია აწარმოებს. საზღვარგარეთიდან ჩამოტანილი სანერგე და სათესლე ხილის ტექნოლოგიური დამუშავების შემდეგ,  ლაგოდეხში მოყვანილი ფერმის სხვადასხვა პროდუქცია მსხვილ სუპერმარკეტებში იყიდება.  

როგორც „ლოლაძეების ფერმის“ დამფუძნებელმა ლაშა ლოლაძემ „კომერსანტთან“  განაცხადა, მომავალ წელს მექსიკური შავი სიმინდის პროდუქტი საქართველოში, მექსიკური „ტორტილიას“ ფორმითაც გაიყიდება. მისივე თქმით, პროდუქტის ფასი ხელმისაწვდომი იქნება.

„შავი სიმინდის წარმოება ამჟამად სატესტო რეჟიმშია, ორი წელია ამ პროდუქტზე ვმუშაობთ და ახლა მიმდინარეობს ტექნოლოგიური დამუშავება. მისი გასაყიდად მომზადება წელს სავარაუდოდ ვერ მოესწრება, მომავალ წელს უფრო შევითვისებთ ბაზარს.  ბოლო დროს, საზღვარგარეთ შავი სიმინდი ძალიან პოპულარულია, მისგან ამზადებენ სხვადასხვა პურ-პროდუქტებს. ჩვენი ბაზრის სიმცირიდან გამომდინარე იმედია საექსპორტო რაოდენობაც მალე იქნება, “ - აღნიშნავს ლაშა ლოლაძე.

რაც შეეხება კიდევ ერთ პროდუქტს, რასაც საქართველოში გამოხმაურება მოჰყვა ეს იყო კივანო, მისი მოსავლის მიღება ფერმაში ივლისის ბოლოს მოხდება და „აგროჰაბსა“ და „გუდვილში“ კვლავ გაიყიდება. კივანო, იგივე აფრიკული კიტრი გოგრისებრთა ოჯახს ეკუთვნის და წარმოშობით აფრიკიდანაა. დღეისთვის მას აწარმოებენ სამხრეთ ამერიკაში, ისრაელში, იტალიასა და ახალ ზელანდიაში. პროდუქტი გამოიყურება, როგორც 10–15 სმ სიგრძის ეკლებიანი გოგრა, მისი რბილობი მწვანეა და უმეტესად გრძელი, 5–10 მმ სიგრძის მქონე თეთრი თესლები აქვს. საკვებად გამოიყენება როგორც კოქტეილების, ისე ხილის სალათების დასამზადებლად. პროდუქტის ღირებულება 1 კგ-ზე 28 ლარია.

როგორც ლაშა ლოლაძე განმარტავს, საქართველოს ბაზარი მცირეა ისეთი ძვირადღირებული პროდუქტებისთვის, როგორებიც „ლოლაძეების ფერმის“ მიერ წარმოებული კივანო, ფიზალისი, პეპინო და სხვა ეგზოტიკური ხილი.  

„ზოგადად, ჩვენი ბაზარი დიდი  არ არის. ამ პროდუქტების წარმოებასა და დამუშავებას კი იმდენი რესურსი სჭირდება, რომ  ექსპოტზე  გასვლა უმჯობესი იქნება. ძალიან ბევრ პროდუქტს გაუჭირდა, თავის დამკვიდრება, რადგან ძვირადღირებულია.  ალბათ მინი კივის საექსპორტო რაოდენობის მოყვანას შევძლებთ, ივლისიდან გვექნება ამ ხილის რამდენიმე ჯიში,“ - აღნიშნა ლაშა ლოლაძემ.

რაც შეეხება პეპინოს, „ლოლაძეების ფერმაში“ ეს ხილი წელს პირველად ტექნოლოგიურ დამუშავებაში. ოკრა კი ერთწლიანი კულტურაა, რომლის ახალი მოსავალი, ივლისში იქნება.

მცირე ზომის უბუსებო მინი კივის პლანტაციები  ლაგოდეხში პირველად 15 წლის წინ დაირგო. მინი კივი ტრადიციულისგან არა მხოლოდ ზომით, არამედ გემო თვისებებითაც განსხავდება. ამასთან, პროდუქტს არ აქვს ბუსუსები და მისი დაგემოვნება კანითაც შესაძლებელია.

ფიზალისის, იგივე ოქროსფერი კენკრის წარმოება „ლოლაძეების ფერმაში“ 2019 წელს დაიწყო. ეს არის მრავალწლიანი მცენარე. ფიზალისს ხალხურ მედიცინაში მრავალი დაავადების სამკურნალოდ გამოიყენებენ, მდიდარია A, B და C ვიტამინებით. გარდა ამისა, მისგან ამზადებენ მარინადს. ფიზალისის მოყვანა უფრო რთულია და მცირე მოსავალსაც იძლევა, თუმცა ბაზარზე ერთი კილოგრამის ფასი, შესაძლოა 60 ლარიც იყოს.

მარიამ მორგოშია