კომპლექს „შატო მერეში“ ახალი იტალიური სამზარეულოს რესტორანი გაიხსნა. ცნობილი იტალიელი მზარეული ენცო ნერის რესტორანი Enzo’s Ezo-ს სტუმარს ხმელთაშუაზღვისპირეთის სამზარეულოს სთავაზობს. როგორც „შატო მერეს“ სასტუმროს მენეჯერი „კომერსანტთან“ აღნიშნავს, კომპლექსი ახალი ობიექტების დამატებას მომავალშიც გეგმავს.  

„ივნისისდან, ისევე როგორც მთლიანმა სექტორმა, ჩვენც მივიღეთ მუშაობის უფლება და უნდა აღინიშნოს, რომ შაბათ-კვირები საკმაოდ დატვირთულია. გახსნილია ტერასები და როგორც კი იქნება ნებართვა, შიდა სივრცეებსაც გავხსნით. ქართველი სტუმრები საკმაოდ აქტიურობენ, თუმცა, შარშანდელ სეზონთან შედარება არ შეიძლება, თუმცა მოკლე დროა გასული და დავაკვირდებით სიტუაციას.  ფაქტია, რომ ყველა სასტუმროს გაუჭირდება ამ სეზონზე ტურისტების გარეშე, თუმცა ფრენების აღდგენამ შესაძლოა მდგომარეობა გააუმჯობესოს.

ვიცავთ ყველანაირ რეგულაციას - გვაქვს თერმოსკრინინგი, ნებისმიერი ნივთის გამოყენების შემდეგ(იქნება ეს სკამი, მაგიდა თუ საპირფარეშო)  ვატარებთ დეზინფექციას. ვიცავთ 2 მეტრიან დისტანციას და ვიყენებთ  პირბადეებს.

ამასთან გვემატება ახალი ობიექტები,  უკვე გავხსენით იტალიური სამზარეულო. მალე  დაგვემატება  სპა და ნებართვის მიღების შემდეგ დავიწყებთ მუშაობას,“ - აღნიშნავს სასტუმროს მენეჯერი ლიკა პარწინაკაშვილი.

კომპლექსი „შატო მერე“ ღვინის კომპანია ვინივერიას ბაზაზე თელავის მახლობლად, სოფელ ვარდისუბანში დაფუძნდა და 2011 წლის 18 სექტემბრიდან ფუნქციონირებს. ღვინის კომპანიასთან ერთად, შატოს კომპლექსი სასტუმროსა და რესტორანსაც მოიცავს. სასტუმროს ტერიტორიაზეა ასევე ღია აუზი, დიდი საკონფერენციო დარბაზი, მარანი, ღვინის სადეგუსტაციო განყოფილება, ბარი, ღია ჯაკუზი და საჯინიბო რამდენიმე არაბული ცხენით. სასტუმროს რესტორანი 150–250 პერსონაზეა გათვლილი და კახურ და ევროპულ კერძებთან ერთად ახლა უშუალოდ იტალიური სამზარეულო დაემატა.

მარიამ მორგოშია