საქართველოს ეროვნულმა ბანკმა სესხის გამცემი სუბიექტების მიერ გამოვლენილი დარღვევეის გამო ერთ სუბიექტს მუშაობის უფლება შეუჩერა, 3 სუბიექტი დააჯარიმა, 28-ს კი გაფრთხილება მისცა.
სებ-ში ამბობენ, რომ სანქციები გატარდა მათ შორის, მოსახლეობისთვის არასწორი ინფორმაციის მიწოდების გამო.
შეგახსენებთ, რომ სესხის გამცემი სუბიექტი, კერძოდ, ნებისმიერი მეწარმე სუბიექტი, რომლის მიმართაც ერთდროულად 20-ზე მეტ ფიზიკურ პირს აქვს სასესხო/საკრედიტო ვალდებულება 2019 წლის 1-ლი იანვრიდან, ეროვნული ბანკის რეგულირებასა და ზედამხედველობას ექვემდებარება. კანონმდებლობის მიხედვით, ეროვნულ ბანკს უფლება აქვს კანონით გათვალისწინებული მოთხოვნების შეუსრულებლობის შემთხვევაში სგს-ს მიმართ გამოიყენოს მოქმედი კანონმდებლობით გათვალისწინებული სანქციები და შეზღუდვები სესხის გამცემი სუბიექტების მიმართ.
,,ბიზნესპრესნიუსი“ დაინტერესდა, რამდენი კანონდამრღვევი გამსესხებელი გამოავლინა და რა სანქციები გამოიყენა ცენტრალურმა ბანკმა, კანონის ამოქმედებიდან დღემდე?
მონაცემები ასეთია:
-სესხის გამცემი სუბიექტებიდან - სარეგისტრაციო პირობების, დაკრედიტების კუთხით დადგენილი მოთხოვნების და მომხმარებელთა უფლებების დაცვის კუთხით გამოვლენილი დარღვევების გამო:
ფულადი ჯარიმა დაეკისრა - 3 სგს-ს;
ფილიალის საქმიანობის უფლება გაუუქმდა - 1 სგს-ს;
დარღვევების გამოსწორების მოთხოვნით წერილობითი მითითება გაეგზავნა - 28 სგს-ს.
,,ბიზნესპრესნიუსის“ კითხვაზე, რა ძირითადი დარღვევებისათვის დაჯარიმდნენ გამსესხებლები, სებ-ში პასუხობენ, რომ დარღვევები ძირითადად შეეხებოდა:
მომხმარებელთათვის არასწორი ინფორმაციის მიწოდება; სარეკლამო შეთავაზებასთან დაკავშირებით დადგენილი მოთხოვნების დარღვევა; ეთიკის ნორმების დარღვევა;
საკრედიტო-საინფორმაციო ბიუროში დარეგისტრირების ვალდებულების შეუსრულებლობა
საოპერაციო ფართის მოწყობასთან და აღრიცხვა/ანგარიშგებასთან დაკავშირებული მოთხოვნების დარღვევა.
ცნობისთვის, 23 სექტემბრის მდგომაროებით, რეგისტრირებულია სესხის გამცემი 199 სუბიექტი.
BPN.GE