მარტში ფიზიკური პირებისთვის როგორც სესხებზე ასევე ანაბრებზე საპროცენტო განაკვეთი შემცირდა. კლების ტემპი გაცილებით მაღალი დეპოზიტების მიმართულებით იყო. ერთ თვეში ის 6.5%-დან 5.6%-მდე შემცირდა, სესხებზე კი 12.4%-დან 12.2%-მდე. თუ თებერვალში სპრედი 5.9%-ს შეადგენდა, მარტში კომერციული ბანკების სასარგებლოდ 6.6%-მდე გაიზარდა.
ანაბრებზე დარიცხული საპროცენტო განაკვეთის მკვეთრი ვარდნა უცხოურ ვალუტაში განთავსებული დეპოზიტების გაიაფებამ გამოიწვია. ფიზიკური პირებისთვის მარტში უცხოურ ვალუტაში გახსნილ ანაბრებზე დარიცხული სარგებელი 1.4%-მდე შემცირდა, რაც ისტორიული მინიმუმია. 9.2%-დან 9%-მდე შემცირდა ლარში განთავსებულ დეპოზიტზე დარიცხული პროცენტიც, რაც ბოლო 19 წლის საშუალოსთან შედარებით მხოლოდ 1%-ითაა ნაკლები, მაშინ როცა უცხოური ვალუტის შემთხვევაში სხვაობა 4.8%-ს შეადგენს. კომერციული ბანკები ფიზიკურ პირებს ლარში განთავსებულ ანაბრებზე 6.3-ჯერ მაღალ განაკვეთს სთავაზობენ. 1 თვის წინ განსხვავება 5-ჯერ მეტი იყო, 1 წლის წინ 4.2-ჯერ მეტი. მიუხედავად ამისა დეპოზიტების 78% მაინც უცხოურ ვალუტაშია განთავსებული. მიუხედავად იმისა, რომ ანაბარმა დოლარში საინვესტიციო ღირებულება დაკარგა, ის კვლავ რჩება დაგროვებისა და შენახვის საშუალებად, მაშინ როცა ლარის გაუფასურების ტემპი, მასზე დარიცხულ საპროცენტო განაკვეთზე მეტია. $1000-ის განთავსება დოლარში 1 წლის ვადით უფრო მომგებიანია, ვიდრე იმავე მოცულობის თანხის ლარის ანაბარზე შეტანა.
ანაბრებისგან განსხვავებით მარტში სესხები უმნიშვნელოდ გაიაფდა, კერძოდ, ფიზიკური პირებისთვის ლარში გაცემულს სესხებზე საპროცენტო განაკვეთი 18%-დან 17.9%-მდე შემცირდა, უცხოურ ვალუტაში კი 6.2%-დან 6.1%-მდე.
1-ლი აპრილის მდგომარეობით კომერციული ბანკების ჯამური საკრედიტო პორტფელი 37.940 მლრდ ლარს შეადგენს, რაც 1 თვის წინანდელ მაჩვენებელთან შედარებით 487 მლნ ლარით - 1.27%-ით ნაკლებია, გაცვლითი კურსის ეფექტის გარეშე 1.89%-ით. ანაბრების მოცულობა უმნიშვნელოდ 0.03%-ით 36.030 მლრდ ლარამდე გაიზარდა. 1.5%-ით 58.150 მლრდ ლარამდე გაიზარდა აქტივების მოცულობაც.
წლის პირველ კვარტალში რეკორდულად 412 მლნ ლარამდე გაიზარდა ბაკების წმინდა მოგებაც. მხოლოდ მარტში მოგებამ 166 მლნ-ს გადააჭარბა. აღნიშნული ძირითადად გასული წლის პირველი კვარტალის ზარალს უკავშირდება. 2020 წლის მარტში, როდესაც ბანკებმა სესხები გადაავადეს, 943 მლნ-იან ბუღალტრულ ზარალზე გავიდნენ, თუმცა კალენდარული წელი მაინც 99 მლნ-იანი მოგებით დაასრულეს.