მე დამრჩა შთაბეჭდილება, რომ ალეკო ელისაშვილს პარლამენტში უნდა შესვლა და ახლა ეძებს საბაბს. ცდილობს, რომ ოპოზიციასთან კონფლიქტში შევიდეს რაღაც მოგონილი საბაბით. როგორც ჩანს, ახსნა ეს არის, იმიტომ, რომ წინააღმდეგ შემთხვევაში გაუგებარია ჩვენზე საბოტაჟის ბრალდება, - ასე აფასებს „ევროპული საქართველოს“ ერთ-ერთი წევრი სერგი კაპანაძე პარტია „მოქალაქეების“ ლიდერის, ალეკო ელისაშვილის განცხადებას, რომლის თანახმად, „ბოკერია და უგულავა ვერ მოხვდნენ პარლამენტში და ამიტომ უნდათ, რომ ყველაფერი არიონ - საბოტაჟით არიან დაკავებულები“.

სერგი კაპანაძე ელისაშვილის ამ განცხადებას გაუგებარს და უსაფუძვლო ბრალდებას უწოდებს.

„უსაფუძვლო ბრალდებებია, რომ ვითომ ჩვენ რაღაც ფულის აღება დავაბრალეთ, მსგავსი რამ უბრალოდ არასდროს ყოფილა და ის, რომ რაღაც საბოტაჟს ვეწევით. ძალიან სამწუხაროა, როგორც ჩანს, ბატონი ელისაშვილი საბაბს ეძებს, რომ შევიდეს და ახლა, გამოიყენა კოლეგა ოპოზიციურ პარტიაზე თავდასხმა ამ საბაბადაც. კიდევ ერთხელ ეს მასზე უფრო მეტყველებს ვიდრე სხვა რამეზე. თუ მას უნდა, რომ შევიდეს პარლამენტში, უნდა თქვას, რომ აპირებს შესვლას. ჩვენ ბოიკოტის რეჟიმში ვართ იმიტომ, რომ ეს არჩევნები გაყალბდა და იმიტომ, რომ ახლა წაართვეს ქართველ ხალხს ნება თავისუფალ არჩევნებზე. არ ჩაატარეს თავისუფალი არჩევნები და ამის გამო გვინდა, რომ ახალი არჩევნები ჩატარდეს. თუ მას მიაჩნია, რომ კოდექსში რაღაცის გაუმჯობესების შედეგად ის უნდა შევიდეს პარლამენტში, ამ არჩევნებს თავი დაანებოს და თქვას, რომ კი ბატონო, ეს არჩევნები სამართლიანი იყო და ივანიშვილს „გაუპრავოს“ ეს პარლამენტი და ლეგიტიმაცია მისცეს, ეს უნდა გადაწყვიტოს და თქვას. გაუგებარია, რატომ შემოაქვს ასეთი განხეთქილება ოპოზიციის შიგნით, მაშინ, როდესაც ყველა ოპოზიციური პარტია ჩამოყალიბებული ვართ. ეს კიდევ ერთხელ ეჭვებს აჩენს მის რაღაც ქვეზრახვებზე. აქ, სხვა არანაირი დასკვნის გაკეთება არ შემიძლია. საუბარი იმაზე, რომ „ევროპული საქართველო“ არის რაღაც საბოტაჟის რეჟიმში, უბრალოდ არასერიოზულია“, - განაცხადა კაპანაძემ.

მისი თქმით, „ევროპული საქართველო“ თავიდან ბოლომდე მონაწილეობდა ამ მოლაპარაკებებში, რომლებსაც მოლაპარაკებებში მონაწილეობის დიდი გამოცდილება გააჩნიათ.

„ჩვენი ამოცანა არის - მთავარი მოთხოვნები, რაც ყველა ოპიზიციურ პარტიას ჰქონდა, ბოლომდე იყოს გატანილი. ეს არის ახალი არჩევნები, პოლიტპატიმრები და საარჩევნო რეფორმა. მე დამრჩა შთაბეჭდილება, რომ მას პარლამენტში უნდა შესვლა და ახლა ეძებს საბაბს, ცდილობს, რომ ოპოზიციასთან კონფლიქტში შევიდეს რაღაც მოგონილი საბაბით. როგორც ჩანს, ახსნა ეს არის, იმიტომ, რომ წინააღმდეგ შემთხვევაში გაუგებარია ჩვენზე საბოტაჟის ბრალდება მაშინ, როდესაც ჩვენ და სხვა ყველა ოპოზიციური პარტია ვიცავთ ერთად წაყენებულ მოთხოვნებს. მას თუ უნდა პარლამენტში შესვლა, ეს უნდა თქვას და ამით მიიღოს შესაბამისი შედეგები. ასე არ გამოვა, რომ ჩვენ კიდევ აქეთ გვესროლოს ტალახი და ისაუბროს რაღაცა იმაზე, რომ წარუმატებელი შედეგი გვქონდა. ხო, არ გვქონდა წარმატებული შედეგი იმ მოლოდინთან მიმართებაში, რაც გვინდოდა. ოღონდ, ელისაშვილზე ოთხჯერ მეტი ხმა ავიღეთ მაინც. ის დამოკიდებულება, რომ თურმე ვიღაცებით ვერ გადიან პარლამენტში და ამიტომ საბოტაჟს ახდენენ ამ მოლაპარაკებების, უბრალოდ მის მორალურ კატეგორიაზე უფრო მეტყველებს. როგორც ჩანს, მას აქვს ეს პრობლემა და მიაჩნია, რომ თვითონ თუ არ იქნება, სხვაც არ უნდა იყოს, თორემ წინააღმდეგ შემთხევაში სრულიად გაუგებარი ამბავია“, - განაცხადა სერგი კაპანაძემ.

IPN.GE