ბარებისა და კლუბების წარმომამდგენლები კორონავირუსის პანდემიით გამოწვეული კრიზისის გამო სახელმწიფოსგან ყურადღებას და სივრცეების გახსნის თარიღის დადგენას ითხოვენ. ამის პარალელურად, ხელისუფლება ღამის კლუბებისთვის სექტორულ შეღავათებს ამ დრომდე არ განიხილავს. 

„კომერსანტი“ დაინტერესდა რა ნაბიჯების გადადგმას გეგმავს ღამის ეკონომიკის განვითარების პროექტის ხელმძღვანელი სერგი გვარჯალაძე ბიზნესის დასახმარებლად. 

-თბილისის ღამის ეკონომიკის განვითარების პროექტი 2018 წლის აპრილში დაიწყო. პროექტის მიზანია მიკრო, მცირე და საშუალო ბიზნესების განვითარება, ახალი სამუშაო ადგილების შექმნა, განხორციელებული აქტივობებით თბილისის ტურისტული პოტენციალის და კულტურული მრავალფეროვნების გაზრდა. დღეს არსებული მდგომარეობის გათვალისწინებით, რა ძირითადი ნაბიჯების გადადგმა იგეგმება იმისათვის, რომ ბიზნესის განვითარებას, სამუშაო ადგილების შექმნას და ტურისტული პოტენციალის გაზრდას შეეწყოს ხელი?

-ამ ეტაპზე, ჩვენი მთავარი მიზანია, შევინარჩუნოთ ღამის ეკონომიკის და მთლიანად აღნიშნული სექტორის ისეთი ერთეულები, როგორიცაა კ

ლუბები, საკონცერტო დარბაზები, ბარები, რესტორნები და ის სამუშაო ადგილები, რომლებიც პანდემიამდე არსებობდა. ასევე, ჩვენი მიზანია, მედიკოსების რეკომენდაციებისა და უსაფრთხოების ნორმების  გათვალისწინებით, რაც შეიძლება სწრაფად მოხდეს ამ სექტორის ჩვეულ სამუშაო რეჟიმში დაბრუნება.  

-თქვენი ინფორმაციით, რა მასშტაბის დარტყმა მიადგა პანდემიის შედეგად საკლუბო სექტორს და როდიდან იგეგმება მათი ფუნქციონირების აღდგენა? 

-საკლუბო სცენა ერთ-ერთი პირველი იყო, რომელმაც ვირუსის გავრცელების შემდეგ მუშაობა შეაჩერა, რის გამოც, ასობით ადამიანი შემოსავლის გარეშე დარჩა. გარკვეულ ნაწილს ჯერ კიდევ უწევს იჯარის გადახდა. 20:00-დან 08:00 საათამდე პერიოდში, დედაქალაქის მასშტაბით, საშუალოდ, 7 000-მდე ადამიანი იყო დასაქმებული. აღნიშნული სექტორის ფუნქციონირების აღდგენა დამოკიდებულია ჯანდაცვის მსოფლიო ორგანიზაციის რეკომენდაციებსა და საქართველოს მთავრობის მიერ დაწესებულ რეგულაციებზე. 

-რამდენიმე დღის წინ თბილისის მერმა კახა კალაძემ განაცხადა, რომ ონლაინ გამოკითხვის მეშვეობით, პანდემიის დროს დაზარალებული ღამის კლუბების პრობლემები სრულად შეისწავლეს და მათ დახმარებასაც გეგმავენ. კონკრეტულად რა სახის დახმარებაზე არის საუბარი?

-საუბარი არ არის დახმარების მხოლოდ ღამის კლუბებისთვის აღმოჩენის საკითხზე. ვმსჯელობთ, თუ როგორ დავეხმაროთ მთლიანად თბილისის კულტურულ ერთეულებს. ამ ეტაპზე, მერიის კულტურის საქალაქო სამსახური სექტორის წარმომადგენლებთან შეხვედრებს მართავს, რომლებშიც მეც ვმონაწილეობ. რა ტიპის დახმარების გაწევა იქნება შესაძლებელი, ჯერ განხილვის ეტაპზეა. 

-ბარებისა და კლუბების მეპატრონეები ამბობენ, რომ იმ შემთხვევისთვის, თუ დახურული ობიექტების გახსნის შესაძლებლობა დროულად არ მიეცემათ, საჭიროა სახელმწიფოს ბალანსზე არსებულ ცენტრალურ, მაგრამ გამოუყენებელ ღია სივრცეებში შეიქმნას „გადარჩენის პარკი“, სადაც უკვე არსებული დახურული ბარები თავიანთ ღია ვარიანტს წარმოადგენენ. რამდენად განხორციელებად ინიციატივად მიგაჩნიათ ეს და თქვენი აზრით რამდენად დაეხმარება ეს სექტორს?

-ვფიქრობ, მსგავსი ალტერნატივის წარმატება დამოკიდებული იქნება იმაზე, თუ როგორი რეგულაციები იქნება შეთავაზებული და რამდენად უსაფრთხო იქნება ასეთი სივრცეები. ნებისმიერი წინგადადგმული ნაბიჯი, რომელიც აღნიშნულ სექტორს მუშაობის განახლების საშუალებას მისცემს, წარმატებული იქნება. 

-რამდენიმე თვის წინ, თქვენ განაცხადეთ, რომ გამოწვევად შემდეგი საკითხები რჩებოდა: „ქალაქში არ არის 24 საათიან რეჟიმში მოქმედი ბიზნესებისა და დაწესებულებების საკმარისი რაოდენობა. არის რიგი ბიზნესმიმართულება, რომელიც აუთვისებელია, მაგალითად,მოძრავი კვების ობიექტები, “სთრითფუდი”. გამოწვევა არის ის, რომ გვაკლია დიდი საერთაშორისო მასშტაბის, უნიკალური და ორიგინალური ღონისძიებები, რომლებიც ხელს შეუწყობდნენ თბილისის პოპულარიზაციას საერთაშორისო დონეზე და ახალ სამუშაო ადგილებს შექმნიან. ასევე, გამოწვევად რჩება მომსახურების ხარისხი სხვადასხვა დაწესებულებაში“. რა შეცვალა პანდემიამ, რა არის დღეს ღამის ეკონომიკის მთავარი გამოწვევა?

-პანდემიამ არა მხოლოდ ღამის ეკონომიკა, არამედ ყველა მიმართულებით, მსოფლიოს წეს-ჩვეულება შეცვალა. დღეს ყველას გვიწევს, ახალ წესებსა და რეგულაციებს მოვერგოთ, თუმცა, აქვე ხაზი უნდა გავუსვა იმ იმედისმომცემ სტატისტიკას, რომელმაც თბილისი ევროპის ყველაზე უსაფრთხო ტურისტულ მიმართულებად აქცია. ჩვენ სხვადასხვა საერთაშორისო პლატფორმის მეშვეობით, ქალაქის, როგორც კულტურული ჰაბის პოზიციონირებაზე მუშაობას განვაგრძობთ. დღეს მთავარია, ეტაპობრივად დავუბრუნდეთ სამუშაო რეჟიმს და უკვე ახალი გამოწვევების მიხედვით, სწრაფი და ეფექტური პროექტები შევიმუშაოთ.  

ინტერვიუს ჩაწერა წერილობით, ელექტრონული ფოსტის საშუალებით მოხდა.

ნინო თამაზაშვილი