„ანტიკრიზისული გეგმის პრეზენტაციაზე მნიშვნელოვანი ინიციატივები გაჟღერდა, რაც სექტორს გამოაცოცხლებს. ახლა სექტორს სწორედ შოკური მდგომარეობიდან გამოყვანა სჭირდება, რისთვისაც ეს წინ გადადგმული ნაბიჯია“, - ასე შეაფასა „არსის“ გენერალურმა დირექტორმა ბესო ორთოიძემ მთავრობის მიერ წარმოდგენილი დეველოპერული სექტორის მხარდაჭერის ანტიკრიზისული გეგმა.
„ზოგადად რთულია ხვალინდელი დღის პროგნოზირება, თუმცა, დღევანდელი გადასახედიდან ეს არის კარგი და სწორი ნაბიჯი, რასაც სახელმწიფო დგამს, ამ გეგმამ სექტორი უნდა გამოაცოცხლოს. თუმცა 2-3 თვის შემდეგ შესაძლოა მივიღოთ ის რეალობა, რომ მარტო ეს არ იყოს საკმარისი, თუმცა ახლა მთავარია გაყიდვების სტიმულირება. სამშენებლო სექტორში გამოცოცხლება უკვე შეინიშნება და სახელმწიფოს მიერ გადადგმული ნაბიჯები კიდევ უფრო ხელს შეუწყობს იმ მყიდველებს, რომლებსაც ბინის ყიდვა გადაწყვეტილი ჰქონდათ, თუმცა გარკვეული მიზეზების გამო გადადეს, სწორედ მათკენაა მიმართული ეს გეგმა, რომ დროულად შეძლონ უძრავი ქონების შეძენა და დროულად მოხდეს ეკონომიკაში ამ თანხების ჩაშვება. თუ დეველოპერული სექტორის გამოცოცხლების ტენდენცია გაგრძელდა და ამას სახელმწიფოს მხრიდან მსგავსი ხელიშეწყობა დაემატება, რა თქმა უნდა ეს საკმარისი იქნება სექტორისთვის, მაგრამ მთავარია ასევე გარე ფაქტორები, თუ როგორ განვითარდება მოვლენები მსოფლიოში“, - განმარტა ბესო ორთოიძემ.
შეგახსენებთ, რომ მთავრობა მოქალაქეებს, ბინის შეძენის მსურველებს იპოთეკური სესხების 4%-ს, 5 წლის განმავლობაში დაასუბსიდირებს. საუბარია, ყველა იმ ხელშეკრულებაზე, რომელიც წლის ბოლომდე დაიდება. ამის შესახებ საქართველოს პრემიერ-მინისტრმა გიორგი გახარიამ დღეს დეველოპერული სექტორის მხარდაჭერის ანტიკრიზისული გეგმის პრეზენტაციაზე განაცხადა.
ნინო თამაზაშვილი