2023 წლიდან ბანკებთან ერთად მოგების გადასახადი მიკროსაფინანსო ორგანიზაციებსაც 20%-მდე გაეზრდებათ. „კომერსანტი“ დაინტერესდა რამდენია 37 მიკროსაფინანსო ორგანიზაციის მოგება. 2022 წლის მესამე კვარტლის მდგომარეობით, მიკროსაფინანსო ორგანიზაციებმა 81 232 218 ლარის წმინდა მოგება მიიღეს, ეს კი 32 065 183 ლარით მეტია, წინა კვარტალთან შედარებით.

ანგარიშის თანახმად სექტორის წმინდა მოგების ნახევარზე მეტს ერთი ორგანიზაცია „რიკო კრედიტი” აგენერირებს, 9.5 მილიონი ლარით მეორე ადგილზეა „სვის კაპიტალი”, ხოლო მესამე პოზიციას 4.4 მილიონი ლარით მისო “ინტელექსპრესი” იკავებს.

„რიკო ექსპრესი“ არამხოლოდ წმინდა მოგების, არამედ აქტივებისა და საკრედიტო პორტფელის ზომითაც ბაზრის პირველ ადგილს იკავებს.

მიკროსაფინანსო ორგანიზაციების მოგება 2022 წლის 9 თვეში:

1. რიკო ექსპრესი - 43.4 მლნ ლარი;
2. სვის კაპიტალი - 9.5 მლნ ლარი;
3. მისო ინტელექსპრესი - 4.4 მლნ ლარი;
4. სმარტ ფინანსი - 4.3 მლნ ლარი;
5. ბერმელი - 3.6 მლნ ლარი;
6. ლიდერ კრედიტი - 3.5 მლნ ლარი;
7. კრისტალი - 2.9 მლნ ლარი;
8. კრედიტსერვისი+ - 2.9 მლნ ლარი;
9. ლაზიკა კაპიტალი - 0.2 მლნ ლარი;
10. მიკრო ბიზნეს კაპიტალი - 0.1 მლნ ლარი.

საქართველოს ეროვნული ბანკის ვებგვერდზე გამოქვეყნებული მონაცემების მიხედვით, 2021 წელს მიკროსაფინანსო ორგანიზაციებმა ჯამში 97 825 144 ლარის წმინდა მოგება მიიღეს, მოგების გადასახადის სახით კი 15 029 146 ლარი გადაიხადეს. მისო-ების მთლიანმა საპროცენტო შემოსავალმა 2021 წელს 324 463 284 ლარი შეადგინა, არასაპროცენტომ კი 48 924 452 ლარი.