სექტემბრიდან საქართველოში სეზონური ჟურნალ 4 Seasons Georgia-ს გამოცემა იწყება. ინგლისურენოვანი ჟურნალი 100 000-იანი ტირაჟით წელიწადში 4-ჯერ გამოვა და საქართველოსა და უცხოეთის საელჩოებში, საგარეო უწყებებში, ბიზნესცენტრებში, მსხვილ სასტუმროებსა და რესტორნებში გაიგზავნება. როგორც 4 Seasons Georgia-ს თანადამფუძნებელი ლინდა კიკოლაშვილი „კომერსანტთან“ განმარტავს, ჟურნალის შექმნა მიზნად ისახავს საქართველოს ტურისტულ პოპულარიზაციასა და ტურისტებისთვის  კულტურული ღირებულებების გაცნობას.

„ჟურნალი საგარეო საქმეთა სამინისტროს ეგიდით გამოვა და საელჩოები, თავიანთ ქვეყანაში დაარიგებენ ჩვენს  ჟურნნალს. აუდიტორია არის ტურისტი. ინფორმაცია იქნება საქართველოს შესახებ, მწერლების, კულტურული მემკვიდრეობის შესახებ. ჟურნალი აერთიანებს ისტორიულ  სტატიებს, საქართველოს შესახებ სხვადასხვა საინტერესო მახასიათებლებს - ერეკლე მეორე, კახეთი, სიღნაღი, ბათუმი, ქართული ღვინო, მარტვილის კანიონი, ლეგენდები თბილისზე და ა.შ. ჩვენ გვინდა, რომ მაქსიმალურად პოპულარიზაცია გავუკეთოთ არა მხოლოდ იმას, რომ ლამაზი ბუნება გვაქვს,  არამედ გვყავს არაჩვეულებრივი მწერლები,  მხატვრები და  კულტურული დატვირთვა.

ჟურნალი არის უმაღლესი ხარისხის ფურცლებით, სტატიების დამზადებაზე ვმუშაობთ 15 კაციანი გუნდი, გვყავს ფოტოგრაფი, ჟურნალისტები, დიზაინერები და თარჯიმნები. რაც შეეხება კომერციულ დატვირთვას, რეკლამები იქნება მინიმალური რაოდენობით, თითქმის 20 პროცენტამდე.

ადამიანი,რომელიც ფიქრობს სადმე მოგზაურობას ჩვენი ჟურნალის ხელმისაწვდომობა უცხოელებს დაეხმარება იმაში, რომ საქართველოსკენ გადმოვიბიროთ,“ - განმარტავს ჟურნალ 4 Seasons Georgia-ს თანადამფუძნებელი ლინდა კიკოლაშვილი.

პირველ ეტაპზე ჟურნალი  საქართველოში ტურიზმზე ორიენტირებული ობიექტების გარდა (აეროპორტები, ტურიზმის საინფორმაციო ცენტრები და სხვ.), მსოფლიოს 40 სამიზნე ქვეყანაში გაიგზავნება.

აღსანიშნავია, რომ საქართველოში კორონავირუსთან ბრძოლის წარმატებული ისტორია ჟურნალში ცალკე, გამორჩეულ  სტატიად აისახება.

4 Seasons Georgia-ს პირველი ნომერი 1 სექტემბერს გამოიცემა, ჟურნალი იქნება 160 გვერდიანი.

მარიამ მორგოშია